ഇബ്രി ക്വാറി അപകടം: ഒരാളുടെ മൃതദേഹം കൂടി കണ്ടെത്തി

മസ്കത്ത്​: ദാഹിറ ഗവർണറേറ്റിലെ ഇബ്രിയിലെ സ്വകാര്യ മാർബിൾ ഫാക്ടറിയിലുണ്ടായ അപകടത്തിൽ കാണായ ഒരാളുടെ മൃതദേഹം കൂടി കണ്ടെത്തി. ഇതോടെ നാടിനെ നടുക്കിയ അപകടത്തിൽ മരിച്ചവരുടെ എണ്ണം 11 ആയി. മൂന്നുപേരെ ഇനിയും ക​ണ്ടെത്താനുണ്ടെന്നാണ്​ അധികൃതർ നൽകുന്ന വിവരം. ഇവർക്കായി സിവിൽ ഡിഫൻസ്​ ആൻഡ്​ ആംബുലൻസ്​ അതോറിറ്റിയുടെ നേതൃത്വത്തിൽ ഊർജിതമായ തിരച്ചിൽ നടന്നുകൊണ്ടിരിക്കുകയാണ്​.

അത്യാധുനിക യന്ത്ര സംവിധാനങ്ങളുടെ സഹായത്താലാണ്​ തിരച്ചിൽ പുരോഗമിക്കുന്നത്​. ഇടക്ക്​ പാറ ഇടിഞ്ഞ്​ വീഴുന്നതിനാൽ തിരച്ചിലിന്​ നേരിയ തടസ്സങ്ങൾ നേരിടുന്നുണ്ട്​. കഴിഞ്ഞ ശനിയാഴ്​ച അർധരാത്രി 12 മണിയോടെ ഇബ്രി വിലായത്തിലെ അൽ-ആർദ്​ പ്രദേശത്തുണ്ടായ അപകടത്തിൽ ആറുപേരായിരുന്നു മരിച്ചിരുന്നത്​. തുടർ ദിവസങ്ങളിൽ നടത്തിയ രക്ഷാ പ്രവർത്തനത്തിലാണ്​ അഞ്ചുപേരുടെ മൃതദേഹങ്ങൾ കണ്ടെത്തിയത്​.

ചൊവ്വ, ബുധൻ ദിവസങ്ങളിൽ രണ്ട്​ വീതവും വ്യാഴാഴ്​ച ഒരാളുടെ മൃതദേഹങ്ങളുമാണ്​ ക​ണ്ടെത്തിയത്​. മരിച്ചവരിൽ മൂന്ന്​ ഇന്ത്യക്കാരും ഉൾപ്പെട്ടിട്ടുണ്ടെന്ന്​ സ്ഥിരീകരിക്കാത്ത റിപ്പോർട്ടുകളുണ്ട്​. മൂന്ന്​ മീറ്റർ ഘനവും 200 മീറ്റർ ഉയരവുമുള്ള മാർബിൾ പാളിയാണ്​ ആദ്യം ഇടിഞ്ഞ്​ വീണ​ത്​. അപകട സമയത്ത്​ ഇന്ത്യക്കാരും പാക്കിസ്ഥാനികളുമായ തൊഴിലാളികളായിരുന്നു സ്ഥലത്തുണ്ടായിരുന്നത്​. ദാഹിറ ഗവർണറേറ്റിലെ സെർച്ച് ആൻഡ് റെസ്‌ക്യൂ ടീമുകളുടെ നേതൃത്വത്തിലാണ്​ തിരച്ചിൽ നടന്നുവരുന്നത്​.

കരാർ കമ്പനികൾ തൊഴിലിടങ്ങളിലെ സുരക്ഷ അവഗണിക്കുന്നതിനാലാണ് ഇത്തരം സംഭവങ്ങൾ ഉണ്ടാകുന്നതെന്ന്​ പ്രദേശവാസികളും വ്യവസായ വിദഗ്ധരും പറഞ്ഞു. രക്ഷാപ്രവർത്തനത്തിന്‍റെ പുരോഗതി അറിയാൻ ഇൻസ്പെക്ടർ ജനറൽ ഓഫ് പൊലീസ് ആൻഡ് കസ്റ്റംസ്, നാഷണൽ കൗൺസിൽ ഫോർ എമർജൻസി മാനേജ്‌മെന്‍റ്​ അംഗങ്ങളും സ്ഥലം കഴിഞ്ഞ ദിവസം സന്ദർശിച്ചിരുന്നു. സംഭവത്തിൽ അന്വേഷണം നടത്തണമെന്ന്​ അധികൃതർ ആവശ്യപ്പെട്ടിട്ടുണ്ട്​.