ഇന്ത്യൻ സ്കൂൾ ഫിലിം ഫെസ്റ്റിവൽ; മബേല സ്കൂൾ ജേതാക്കൾ
text_fieldsമസ്കത്ത്: ഇന്ത്യൻ സ്കൂൾ ഡയറക്ടർ ബോർഡിന്റെ നേതൃത്വത്തിൽ സംഘടിപ്പിച്ച ഇന്ത്യൻ സ്കൂൾ ഫിലിം ഫെസ്റ്റിന്റെ (ഐ.എസ്.എഫ്.എഫ്) അഞ്ചാമത് പതിപ്പിൽ ഇന്ത്യൻ സ്കൂൾ മബേല ഓവറോൾ ചാമ്പ്യന്മാരായി. സീബ് ഇന്ത്യൻ സ്കൂൾ ഓഡിറ്റോറിയത്തിൽ നടന്ന ചടങ്ങിൽ സ്കൂൾ ടീം കോഓർഡിനേറ്റർ ട്രോഫി ഏറ്റുവാങ്ങി
മസ്കത്ത് ഗവർണറേറ്റിലെ ലേബർ ഡയറക്ടർ ജനറൽ മഹ്ഫൂദ മുബാറക് അൽ അറൈമി മുഖ്യാതിഥിയായും പ്രശസ്ത ദക്ഷിണേന്ത്യൻ ചലച്ചിത്ര സംവിധായകനും നിർമാതാവും നടനുമായ ലാൽ ജോസ് ചടങ്ങിൽ സെലിബ്രിറ്റി അതിഥിയായും പങ്കെടുത്തു. ഇന്ത്യൻ സ്കൂൾസ് ഒമാൻ ഡയറക്ടർ ബോർഡ് ചെയർമാൻ ഡോ.ശിവകുമാർ മാണിക്കം അധ്യക്ഷത വഹിച്ചു.
പരിപാടിയിൽ വൈസ് ചെയർമാൻ പി.ടി.കെ. ഷമീർ , ഡയറക്ടർ ഇൻ ചാർജ് നിധീഷ് കുമാർ, ഡയറക്ടർ ഓൺ ബോർഡ് വിജയ് ശരവണൻ, സീനിയർ പ്രിൻസിപ്പലും വിദ്യാഭ്യാസ ഉപദേഷ്ടാവുമായ എം.പി. വിനോഭ, സ്കൂൾ മാനേജ്മെന്റ് കമ്മിറ്റി പ്രസിഡന്റ് കൃഷ്ണൻ രാമൻ സ്കൂൾ മാനേജ്മെൻറ് കമ്മിറ്റി അംഗങ്ങൾ, ഒമാനിലെ വിവിധ ഇന്ത്യൻ സ്കൂളുകളിലെ പ്രിൻസിപ്പൽമാർ, അധ്യാപകർ, വിദ്യാർഥികൾ എന്നിവർ പങ്കെടുത്തു. ഐ.എസ്.എഫ്.എഫിന്റെ അഞ്ചാം പതിപ്പിൽ ‘സങ്കൽപ്പിക്കുക, ജ്വലിപ്പിക്കുക, സ്വാധീനിക്കുക’ എന്നീ ടാഗ്ലൈനിൽ ഷോർട്ട് ഫിലിം, ആനിമേറ്റഡ് ഫിലിം, എച്ച്.എസ്.ഇ വീഡിയോ ക്രിയേഷൻ, പരസ്യ നിർമാണം, റീലുകൾ, യാത്രാവിവരണം, വിദ്യാഭ്യാസ ചിത്രം തുടങ്ങിയ നിരവധി വിഭാഗങ്ങളുണ്ടായിരുന്നു. വിദ്യാർഥികളുടെ ക്രിയാത്മകത വെളിവാക്കുന്നതായിരുന്നു ഓരോ ചിത്രങ്ങളും.
ഫിലിം ഫെസ്റ്റിന്റെ പ്രാധാന്യത്തെക്കുറിച്ച് സ്വാഗത പ്രസംഗത്തിൽ സ്കൂൾ മാനേജ്മെന്റ് കമ്മിറ്റി പ്രസിഡന്റ് കൃഷ്ണൻ രാമൻ സൂചിപ്പിച്ചു. വിദ്യാർഥികൾക്ക് ചലച്ചിത്ര നിർമാണത്തത്തെയും അതിന്റെ സാങ്കേതിക വശങ്ങളെയും കുറിച്ച് മനസ്സിലാക്കാൻ ഫിലിം ഫെസ്റ്റിവൽ സഹായകമാകുമെന്ന് ഡോ. ശിവകുമർ മാണിക്കം പറഞ്ഞു. ഫിലിം ഫെസ്റ്റിവലുമായി ബന്ധപ്പെട്ട കാര്യങ്ങൾ പ്രിൻസിപ്പൽ ഡോ. ലീന ഫ്രാൻസിസും അവതരിപ്പിച്ചു.
വിദ്യാർത്ഥികൾ അവതരിപ്പിച്ച നൃത്താഞ്ജലി ചടങ്ങിനു മാറ്റുകൂടി. സിനിമ തന്നിൽ വരുത്തിയ പരിവർത്തനങ്ങളെകുറിച്ച് ലാൽജോസ് വിശദീകരിച്ചു. ഫെസ്റ്റിവലിലെ വിവിധ വിഭാഗങ്ങളിലെ വിജയികൾക്ക് മുഖ്യാതിഥി മഹ്ഫൗദ മുബാറക് അൽ അറൈമി, ലാൽജോസ് എന്നിവർ സമ്മാനങ്ങളും സർട്ടിഫിക്കറ്റുകളും നൽകി. ആറ് മുതൽ എട്ടുവരെ ക്ലാസുകളിലുൾപ്പെടുന്നവർക്കായി ജൂനിയർ, ഒമ്പത്മുതൽ പന്ത്രണ്ടാം ക്ലാസുവരെ ഉൾപ്പെടുന്ന സീനിയർ, എല്ലാ കുട്ടികൾക്കും പങ്കെടുക്കാവുന്ന ഓപൺ കാറ്റഗറി എന്നിങ്ങനെ മൂന്നു വിഭാഗങ്ങളിലായിരുന്നു മത്സരം.
ചലച്ചിത്രനിർമാണത്തിന്റെ സൂക്ഷ്മതലങ്ങളിൽ പങ്കെടുക്കുന്നവർക്ക് മാർഗനിർദേശവും പരിശീലനവും നൽകുന്നതിനായി കഴിഞ്ഞ മാസം ആദ്യം ശിൽപശാലകൾ നടന്നിരുന്നു.
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.