ക​ർ​വ മോ​ട്ടോ​ഴ്‌​സ്​ പു​തി​യ ബ​സു​ക​ൾ പു​റ​ത്തി​റ​ക്കി

മ​സ്ക​ത്ത്​: വാ​ഹ​ന നി​ർ​മാ​ണ രം​ഗ​ത്തെ രാ​ജ്യ​ത്തെ മു​ൻ​നി​ര ക​മ്പ​നി​യാ​യ ക​ർ​വ മോ​ട്ടോ​ഴ്‌​സ്​ പു​തി​യ ഇ​ന്‍റ​ർ​സി​റ്റി ബ​സു​ക​ൾ പു​റ​ത്തി​റ​ക്കി. ഗ​ൾ​ഫ്​ സ്റ്റാ​ൻ​​ഡേ​ഡ്​ സ്​​പെ​സി​ഫി​ക്കേ​ഷ​ന​ുകൾ​ക്ക്​ അ​നു​സ​രി​ച്ചാ​ണ്​ ബ​സ്​ ത​യാ​റാ​ക്കി​യി​രി​ക്കു​ന്ന​ത്. 45 യാ​ത്ര​ക്കാ​രെ ഉ​ൾ​ക്കൊ​ള്ളാ​ൻ ശേ​ഷി​യു​ള്ള ബ​സ് എ​ണ്ണ, ഗ്യാ​സ് എ​ന്നി​വ കൊ​ണ്ട്​ പ്ര​വ​ർ​ത്തി​പ്പി​ക്കാ​ൻ ക​ഴി​യു​ന്ന വി​ധ​ത്തി​ലാ​ണ്​ രൂ​പ​ക​ൽ​പ​ന ചെ​യ്​​തി​രി​ക്കു​ന്ന​ത്. പു​തി​യ ബ​സു​ക​ൾ ഒ​മാ​നി​ലെ പ്ര​മു​ഖ ഗ​താ​ഗ​ത ക​മ്പ​നി​യാ​യ സു​ൽ​ത്താ​ൻ അ​ൽ ഷി​സാ​നി ക​മ്പ​നി​ക്ക് കൈ​മാ​റി. ബ​സു​ക​ൾ പ്രാ​ദേ​ശി​ക വി​പ​ണി​യി​ൽ ഇ​റ​ക്കു​ന്ന​തി​നു​ള്ള സു​പ്ര​ധാ​ന ചു​വ​ടു​വെ​പ്പാ​ണ്​ പു​തി​യ ര​ണ്ട്​ ബ​സു​ക​ളു​ടെ കൈ​മാ​റ്റ​മെ​ന്ന്​ ക​ർ​വ മോ​ട്ടോ​ഴ്‌​സ് ക​മ്പ​നി വൃ​ത്ത​ങ്ങ​ൾ പ​റ​ഞ്ഞു. ഈ ​പു​തി​യ ബ​സ് വി​ഭാ​ഗ​ത്തി​ലൂ​ടെ പ്രാ​ദേ​ശി​ക​വും മേ​ഖ​ല​യി​ലെ​യും വി​പ​ണി​ക​ളി​ലേ​ക്ക് പ്ര​വേ​ശി​ക്കാ​നാ​ണ്​ ക​ർ​വ ല​ക്ഷ്യ​മി​ടു​ന്ന​ത്. ഒ​മാ​ന്‍റെ​യും ഖ​ത്ത​റി​ന്‍റെ​യും സം​യു​ക്​​ത സം​രം​ഭ​മാ​ണ്​ ക​ർ​വ മോ​ട്ടോ​ഴ്‌​സ്. ക​മ്പ​നി​യു​ടെ 70 ശ​ത​മാ​നം ഓ​ഹ​രി ഖ​ത്ത​ർ ദേ​ശീ​യ ഗ​താ​ഗ​ത ക​മ്പ​നി​യാ​യ ഖ​ത്ത​ർ ട്രാ​ൻ​സ്‌​പോ​ർ​ട്ടി​നും 30 ശ​ത​മാ​നം ഒ​മാ​ൻ ഇ​ൻ​വെ​സ്റ്റ്‌​മെ​ന്റ് അ​തോ​റി​റ്റി​ക്കു​മാ​ണു​ള്ള​ത്. ക​ർ​വ മോ​ട്ടോ​ഴ്‌​സി​ന് ബ​സ് നി​ർ​മാ​ണ​ത്തി​ൽ പ്ര​ത്യേ​ക​മാ​യ ഒ​രു ഫാ​ക്ട​റി​യു​ണ്ട്. പ്ര​തി​വ​ർ​ഷം ശ​രാ​ശ​രി 600 ബ​സു​ക​ളാ​ണ്​ ഇ​വി​ടെ നി​ർ​മി​ക്കു​ന്ന​ത്​. 2022ലെ ​ഖ​ത്ത​ർ ലോ​ക​ക​പ്പി​നു​ള്ള ബ​സു​ക​ൾ നി​ർ​മി​ക്കു​ന്ന​തി​ൽ ശ്ര​ദ്ധ കേ​ന്ദ്രീ​ക​രി​ച്ച ഫാ​ക്ട​റി 2021ൽ ​ഉ​ത്പാ​ദ​നം ആ​രം​ഭി​ച്ചു. വി​വി​ധ​ത​രം സി​റ്റി ബ​സു​ക​ൾ, സ്കൂ​ൾ ബ​സു​ക​ൾ, ദീ​ർ​ഘ​ദൂ​ര ബ​സു​ക​ൾ, ല​ക്ഷ്വ​റി ബ​സു​ക​ൾ എ​ന്നി​വ നി​ർ​മി​ക്കു​ന്നു. ദു​ക​ത്തെ പ്ര​ത്യേ​ക സാ​മ്പ​ത്തി​ക മേ​ഖ​ല​യി​ൽ 600,000 ച​തു​ര​ശ്ര മീ​റ്റ​ർ വി​സ്തൃ​തി​യി​ലാ​ണ് ക​മ്പ​നി​യു​ടെ ഫാ​ക്ട​റി നി​ർ​മി​ച്ചി​രി​ക്കു​ന്ന​ത്.

സ്‌​കൂ​ൾ ബ​സു​ക​ൾ വി​ത​ര​ണം ചെ​യ്യു​ന്ന​തി​നാ​യി ക​ർ​വ മോ​ട്ടോ​ഴ്‌​സ് ക​മ്പ​നി വി​ദ്യാ​ഭ്യാ​സ മ​ന്ത്രാ​ല​യ​വു​മാ​യും ഒ​മാ​ൻ വി​ക​സ​ന ബാ​ങ്കു​മാ​യും ധാ​ര​ണപ​ത്രം (എം.​ഒ.​യു) അ​ടു​ത്തി​ടെ ഒ​പ്പു​വെ​ച്ചി​ട്ടു​ണ്ട്. ഈ ​വ​ർ​ഷ​ത്തി​ന്‍റെ തു​ട​ക്ക​ത്തി​ൽ പ്രാ​ദേ​ശി​ക വി​പ​ണി​യി​ൽ സ്കൂ​ൾ ബ​സു​ക​ൾ എ​ത്തു​മെ​ന്നാ​ണ്​ ക​രു​തു​ന്ന​ത്. പ​ഴ​യ വാ​ഹ​ന​ങ്ങ​ൾ​ക്ക് പ​ക​രം പ്ര​തി​വ​ർ​ഷം 1,000 ബ​സു​ക​ൾ എ​ന്ന നി​ര​ക്കി​ൽ ഇ​റ​ക്കാ​നാ​ണ്​ ക​മ്പ​നി ല​ക്ഷ്യ​മി​ടു​ന്ന​ത്. 23 മു​ത​ൽ 25 വ​രെ വി​ദ്യാ​ർ​ഥി​ക​ളെ ഉ​ൾ​ക്കൊ​ള്ളാ​ൻ ശേ​ഷി​യു​ള്ള​താ​യി​രി​ക്കും ബ​സു​ക​ൾ.