ലുലു ഹൈപ്പർമാർക്കറ്റിന്‍റെ പുതിയ ഔട്ട്​ലെറ്റ്​ സുഹാറിൽ പ്രവർത്തനം തുടങ്ങി

മസ്കത്ത്​: രാജ്യത്തെ മുൻനിര റീട്ടെയിൽ ശൃംഖകളിലൊന്നായ ലുലു ഹൈപ്പർമാർക്കറ്റിന്‍റെ പുതിയ ഔട്ട്​ലെറ്റ്​ സുഹാറിലെ ഫലജ് അൽ ഖബൈലിൽ പ്രവർത്തനം തുടങ്ങി. സുഹാറിലെ രണ്ടാമത്തെയും ഒമാനിലെ 29-ാമത്തെയും ശാഖയാണ്​ കഴിഞ്ഞ ദിവസം സുഹാറിൽ പ്രവർത്തനം തുടങ്ങിയത്​.

ലുലു ഗ്രൂപ്പ് ചെയർമാനും മാനേജിങ്​ ഡയറക്ടറുമായ എം.എ. യൂസഫലിയുടെ സാന്നിധ്യത്തിൽ വടക്കൻ ബത്തിന ഗവർണർ ഷെയ്ഖ് സെയ്ഫ് ബിൻ ഹിംയാർ അൽ മാലിക് അൽ ഷെഹി പുതിയ ഔട്ട്​ലെറ്റ്​ ഉദ്​ഘാടനം ​ചെയ്തു. മുതിർന്ന മാ​നേജ്​മെന്‍റ്​ പ്രതിനിധികളും ജീവനക്കാരും പ​ങ്കെടുത്തു.

75,000 ചതുരശ്ര അടി വിസ്തൃതിയിൽ വ്യാപിച്ചുകിടക്കുന്ന പുതിയ ശാഖ രാജ്യത്തെ പ്രധാന വ്യാവസായിക കേന്ദ്രമായ സുഹാറിലെ ജനങ്ങൾക്ക്​ വേറിട്ട ഷോപ്പിങ്ങ്​ അനുഭവമായിരിക്കും നൽകുക. പലചരക്ക്, പഴം, പച്ചക്കറികൾ, പാലുൽപ്പന്നങ്ങൾ, കോഴി, മാംസം, മത്സ്യം, ബേക്കറി തുടങ്ങിയ വിഭാഗങ്ങൾക്കായി വിശാലമായ സൗകര്യങ്ങളോടെ പ്രത്യേക സജ്ജീകരണവും ഏർ​പ്പെടുത്തിയിട്ടുണ്ട്​.

വസ്ത്രങ്ങൾ, ഇലക്ട്രോണിക്സ്, ഐ.ടി ഉൽപ്പന്നങ്ങൾ, സ്റ്റേഷനറി, വീട്ടുപകരണങ്ങൾ എന്നിവയ്ക്കായി പ്രത്യേക വിഭാഗങ്ങളും ഉണ്ട്. ഒന്നിലധികം ചെക്ക്-ഔട്ട് കൗണ്ടറുകളും വിശാലമായ പാർക്കിങ്​ സ്ഥലങ്ങളും ശാന്തമായ ഷോപ്പിങ്​ അനുഭവമാണ്​ ഉപഭോക്​താക്കൾക്ക്​ നൽകുന്നത്​.

റമദാനോടനുബനധിച്ച്​ ഭക്ഷണം, പലചരക്ക്, ഇലക്ട്രോണിക്സ്, ഗൃഹോപകരണങ്ങൾ എന്നിവക്ക്​ ആകർഷകമായ ഓഫറുകളും ഒരുക്കിയിട്ടുണ്ട്​. കൂടാതെ ഉദ്​ഘാട​നത്തോടനുബന്ധിച്ച്​ വ്യത്യസ്തങ്ങളായ ഉൽപ്പനങ്ങൾക്ക്​ ആകർഷകമായ വിലയിൽ പ്രത്യേക ഇളവുകളും നൽകും.

പ്രമോഷന്‍റെ ഭാഗമായി ഈ വർഷം ലുലു ഔട്ട്​ലെറ്റുകളിൽ ഉപഭോക്​താക്കൾക്കായി 100,000 റിയാൽ മൂല്യമുള്ള ക്യാഷ് പ്രൈസുകൾ നേടാൻ അവസരമൊരുക്കിയിട്ടുണ്ട്​. മേയ്​ ഏഴ്​ വരെ നടക്കുന്ന പ്രമോഷന്‍റെ ഭാഗമായി ഒന്നിലധികം ആളുകൾക്ക്​ വാരാന്ത്യത്തിൽ 5000, 750, 500, 200, 100 റിയാൽ ക്യാഷ്​ പ്രൈസുകളും നേടാൻ അവസരവുമുണ്ടാകും.

സുൽത്താൻ ഹൈതം ബിൻ താരിഖിന്‍റെ മാർഗനിർദേശത്തിൽ രാജ്യം എല്ലാ മേഖലയിലും മുന്നേറുകയാണെന്ന്​ ഉദ്​ഘാടന വേളയിൽ ലുലു ഗ്രൂപ്പ് ചെയർമാനും മാനേജിങ്​ ഡയറക്‌ടറുമായ എം.എ. യൂസഫലി പറഞ്ഞു. ബിസിനസ്​ അനുകൂല സമീപനം സ്വീകരിക്കുന്ന സുൽത്താനോടും ഗവൺ​മെന്‍റിനോടും നന്ദി പറയുകയാണെന്നും അദ്ദേഹം പറഞ്ഞു.

നഗരങ്ങളിൽ മാത്രമല്ല, രാജ്യത്തെ ചെറിയ പട്ടണങ്ങളിൽപോലും ഉപഭോക്​താക്കൾക്ക്​ മികച്ച ഷോപ്പിങ്​ അനുഭവം നൽകുന്ന മികച്ച ഇടമാക്കി മാറ്റുകയാണ്​ ഞങ്ങളുടെ ലക്ഷ്യമെന്നും അദ്ദേഹം പറഞ്ഞു. ഫലജിലെയും സമീപ പ്രദേശങ്ങളിലെയും ഉപഭോക്താക്കൾക്ക് ലുലുവിന്‍റെ തനതായ വൈവിധ്യവും മൂല്യവും സേവനവും നൽകുന്നതിൽ ഞങ്ങൾ സന്തുഷ്ടരാണെന്ന്​ ലുലു ഹെപ്പർമാർക്കറ്റ്​ ഇന്ത്യ-ഒമാൻ ഡയറക്ടർ എ.വി. ആനന്ദ്​ പറഞ്ഞു.

ഫലജ് അൽ ഖബൈലിലെ പുതിയ സ്​റ്റോർ സമീപവാസികൾക്ക് പുത്തൻ ഷോപ്പിങ്​ അനുഭവം പ്രദാനം ചെയ്യുമെന്ന്​ ലുലു ഗ്രൂപ്പ്​ ഒമാൻ റീജനൽ ഡയറക്ടർ കെ.എ. ഷബീർ പറഞ്ഞു.