ഒമാനിലേക്കുള്ള വിമാനയാത്രക്ക്​ മുമ്പ്​ പി.സി.ആർ പരിശോധന: നിബന്ധന ഒഴിവാക്കി

മസ്​കത്ത്​: ഒമാനിലേക്കുള്ള വിമാനയാത്രക്ക്​ മുമ്പ്​ പി.സി.ആർ പരിശോധന വേണമെന്ന നിബന്ധന ഒഴിവാക്കിയതായി ആരോഗ്യ മന്ത്രി ഡോ. അഹമ്മദ്​ അൽ സഇൗദി പറഞ്ഞു. എന്നാൽ പി.സി.ആർ പരിശോധനാ ഫലം നൽകിയാലേ യാത്ര അനുവദിക്കൂവെന്ന നിബന്ധന ചില വിമാന കമ്പനികൾക്ക്​ ഉണ്ടെന്നും ആരോഗ്യ മന്ത്രി സുപ്രീം കമ്മിറ്റിയുടെ വാർത്താസമ്മേളനത്തിൽ പറഞ്ഞു. യാത്രക്കാരുടെ കൈവശം ആ​േരാഗ്യ ഇൻഷൂറൻസ്​ നിർബന്ധമായും ഉണ്ടായിരിക്കണം. വിമാനത്താവളത്തിലെ പി.സി.ആർ പരിശോധനയടക്കം നിബന്ധനകൾ നിലനിൽക്കുകയും ചെയ്യും. കര അതിർത്തി വഴി വരുന്നവരുടെ കൈവശം പി.സി.ആർ പരിശോധനാ ഫലം വേണമെന്നതിന്​ മാറ്റമില്ലെന്നും ആരോഗ്യ മന്ത്രി പറഞ്ഞു.

ഒക്​ടോബർ പകുതി മുതൽ ഒമാനിലെ രോഗബാധ കുറഞ്ഞുവരുകയാണ്​. ജനങ്ങൾ മുൻകരുതൽ നടപടികൾ കർശനമായി പാലിക്കുന്നതിനാലാണ്​ രോഗവ്യാപനവും മരണവും കുറഞ്ഞുവരുന്നത്​. കോവിഡ്​ വാക്​സിൻ ഇൗ വർഷം അവസാനം തന്നെ എത്തുമെന്നാണ്​ കരുതുന്നതെന്നും ആരോഗ്യ മന്ത്രി പറഞ്ഞു. 65 വയസിന്​ മുകളിൽ പ്രായമുള്ളവർ, പ്രമേഹം, ഗുരുതര രോഗങ്ങളുള്ളവർ, മുൻ നിര പ്രതിരോധന പ്രവർത്തകർ, കോവിഡ്​ ഡിപ്പാർട്ട്​മെൻറുകളിൽ ജോലി ചെയ്യുന്നവർ എന്നിവർക്ക്​ സൗജന്യമായി വാക്​സിനേഷൻ നൽകും. ഇൗ വിഭാഗത്തിൽ പെടുന്ന അറുപത്​ ശതമാനം പേർക്ക്​ വാക്​സിനേഷൻ നൽകുകയാണ്​ ലക്ഷ്യമിടുന്നത്​. കോവിഡ്​ വാക്​സനേഷൻ എടുക്കണമെന്നത്​ നിർബന്ധമായിരിക്കില്ലെന്നും ആരോഗ്യ മന്ത്രി പറഞ്ഞു.

മസ്​ജിദുകളിലെ പ്രവേശനത്തിന്​ പ്രായപരിധി ഏർപ്പെടുത്തിയിരുന്ന നിബന്ധന ഒഴിവാക്കിയതായി ആരോഗ്യ മന്ത്രി അറിയിച്ചു. 12 വയസിൽ താഴെയും 65 വയസിന്​ മുകളിലും പ്രായമുള്ളവർക്കും ഇനി പ്രാർഥനക്ക്​ പള്ളിയിൽ പ്രവേശിക്കാം. എന്നാൽ മതിയായ ആരോഗ്യ മുൻ കരുതൽ നടപടികൾ പാലിക്കണമെന്നും മന്ത്രി അറിയിച്ചു.