ഒമാനിൽ 15 മുതൽ മസ്​ജിദുകൾ തുറക്കും; ജുമുഅക്ക്​ അനുവാദമില്ല

മസ്​കത്ത്​: ഒമാനിൽ മസ്​ജിദുകൾ തുറക്കാൻ സുപ്രീം കമ്മിറ്റി തീരുമാനം. ചൊവ്വാഴ്​ച ആഭ്യന്തര മന്ത്രി ഹമൂദ്​ ബിൻ ഫൈസൽ അൽ ബുസൈദിയുടെ അധ്യക്ഷതയിൽ നടന്ന സുപ്രീം കമ്മിറ്റി യോഗമാണ്​ ഇത്​ സംബന്ധിച്ച്​ തീരുമാനമെടുത്തത്​. കർശനമായ സുരക്ഷാ മാർഗനിർദേങ്ങളോടെ നവംബർ 15ാം തീയതി മുതൽ തുറക്കാനാണ്​ അനുമതി. നാനൂറും അതിലധികം പേരെയും ഉൾക്കൊള്ളാൻ ശേഷിയുള്ളവയാകും ആദ്യഘട്ടത്തിൽ തുറക്കുക. അഞ്ചു നേരത്തേ നമസ്​കാരത്തിന്​ മാത്രമാണ്​ അനുമതിയുള്ളത്​. ജുമുഅ പ്രാർഥനക്ക്​ അനുവാദം നൽകിയിട്ടില്ല.

ഒാരോ നമസ്​കാരത്തിനുമായി പരമാവധി 25 മിനിറ്റ്​ മാത്രമാണ് തുറക്കുക. ഇൗ സമയത്തിനുള്ളിൽ ബാങ്ക്​ കൊടുത്ത്​ നമസ്​കാരം പൂർത്തിയാക്കി ആളുകൾ പുറത്തുകടക്കണം. സ്വന്തമോ അല്ലെങ്കിൽ കുടുംബാംഗങ്ങൾക്കോ കോവിഡ്​ ലക്ഷണങ്ങൾ ഉള്ളവർ പള്ളികളിൽ പോകരുത്​. പള്ളികളിൽ ഖുർആൻ വെക്കരുത്​. പ്രാർഥനക്ക്​ എത്തുന്നവർ സ്വന്തം ഖുർആൻ കൊണ്ടുവരികയോ അല്ലെങ്കിൽ മൊബൈലിൽ ഡൗൺലോഡ്​ ചെയ്​ത ഖുർആൻ ഉപയോഗിക്കുകയോ വേണം. സ്വന്തം മുസല്ലയും കൊണ്ടുവരണം.

വാട്ടർ കൂളറുകൾ അടച്ചുവെക്കണം. ടോയ്​ലെറ്റുകളും ഉപയോഗിക്കാൻ അനുവദിക്കില്ല​. പള്ളിക്കുള്ളിൽ മുഖാവരണം ധരിക്കേണ്ടത്​ നിർബന്ധമാണ്​. പ്രവേശിക്കു​േമ്പാഴും പുറത്തിറങ്ങു​േമ്പാഴും കൈകൾ സാനിറ്റൈസ്​ ചെയ്യണം. നമസ്​കരിക്കാൻ നിൽക്കു​േമ്പാൾ കുറഞ്ഞത്​ ഒന്നര മീറ്ററെങ്കിലും അകലം പാലിക്കണം. ഒൗഖാഫ്​ മതകാര്യ മന്ത്രാലയം തയാറാക്കിയ ഇൗ മുൻകരുതൽ നിർദേശങ്ങൾ പാലിക്കുന്നുണ്ടെന്ന്​ ഉറപ്പുവരുത്തുന്നതിനുള്ള ഉത്തരവാദിത്വം പള്ളികളുടെ ചുമതലപ്പെട്ടവർക്കാണെന്നും സുപ്രീം കമ്മിറ്റി അറിയിച്ചു. ഏഴ്​ മാസത്തെ ഇടവേളക്ക്​ ശേഷമാണ്​ മസ്​ജിദുകൾ തുറക്കാൻ ഒരുങ്ങുന്നത്​. കോവിഡ്​ വ്യാപനത്തെ തുടർന്ന്​ കഴിഞ്ഞ മാർച്ച്​ പകുതിയോടെയാണ്​ ആരാധനാലയങ്ങൾ അടച്ചിടാൻ സുപ്രീം കമ്മിറ്റി നിർദേശിച്ചത്​.