ഒമാൻ-സൗദി റോഡ്​ നിർമാണം അന്തിമ ഘട്ടത്തിൽ –അംബാസഡർ

മസ്​കത്ത്​: ഒമാനെയും സൗദി യെയും ബന്ധിപ്പിച്ച്​ ലോകത്തെ ഏറ്റവും വലിയ മണല്‍ക്കാടായ റുബുഉല്‍ ഖാലി വഴിയുള്ള 726 കിലോമീറ്റര്‍ റോഡി‍െൻറ നിർമാണം അന്തിമ ഘട്ടത്തിലാണെന്ന്​ സൗദി അറേബ്യയിലെ ഒമാൻ അംബാസഡർ സയ്യിദ്​ ഫൈസൽ ബിൻ തുർക്കി അൽ സൈദ്​. സമീപഭാവിയിൽതന്നെ റോഡ്​ ഗതാഗതത്തിന്​ തുറന്നുകൊടുക്കാൻ കഴിയുമെന്നാണ്​ പ്രതീക്ഷ. ഇരു രാഷ്​ട്രങ്ങളിലെയും ബന്ധപ്പെട്ട ഉദ്യോഗസ്​ഥർ നടപടികൾ സ്വീകരിച്ചുവരുന്നതായും സയ്യിദ്​ ഫൈസൽ പ്രസ്​താവനയിൽ പറഞ്ഞു.

ഒമാനും സൗദി അറേബ്യയുമായുള്ള ബന്ധം ദൃഢമാണെന്നും സയ്യിദ്​ ഫൈസൽ പറഞ്ഞു. പൊതു താൽപര്യങ്ങളും പരസ്​പരമുള്ള ബഹുമാനവും അടങ്ങിയതാണ്​ ഇരു രാജ്യങ്ങളും തമ്മിലെ സഹോദര തുല്യമായ ബന്ധം. ഈ ബന്ധം സാംസ്​കാരികവും സാമൂഹികവും സാമ്പത്തികവുമായ ബന്ധങ്ങളിൽ പ്രതിഫലിക്കുന്നതായും അംബാസഡർ പറഞ്ഞു.

ഒമാൻ വിഷൻ 2040 പദ്ധതിക്കും സൗദി വിഷൻ 2030 പദ്ധതിക്കും പൊതുവായ നിരവധി പദ്ധതികളുണ്ട്​. ഭരണതലത്തിലും മറ്റും വരുത്തിയ മാറ്റങ്ങളുടെ ഫലമായി ഒമാനിലെ നിക്ഷേപങ്ങൾ വർധിപ്പിക്കാൻ സൗദി ബിസിനസുകാർക്ക്​ ആലോചനയുണ്ടെന്നും അംബാസഡർ പ്രസ്​താവനയിൽ പറഞ്ഞു. യമൻ വിഷയത്തിൽ എല്ലാവരെയും ഒരു കുടക്കീഴിൽ കൊണ്ടുവന്ന്​ പ്രശ്​നപരിഹാരത്തിനുള്ള ശ്രമങ്ങൾ പുരോഗമിക്കുന്നതായും അംബാസഡർ കൂട്ടിച്ചേർത്തു.