ഒമാൻ സ്വകാര്യ മേഖലയിൽ കൂടുതൽ സ്വദേശിവത്​കരണം പ്രഖ്യാപിച്ചു

മസ്​കത്ത്​: സ്വകാര്യ മേഖലയിൽ കൂടുതൽ തസ്​തികകളിൽ ഒമാൻ സ്വദേശിവത്​കരണം പ്രഖ്യാപിച്ചു. ആറ്​ മേഖലകളിലെ ഫൈനാൻസ്​, അക്കൗണ്ടിങ്​ ജോലികളിലാണ്​ വിദേശികൾക്ക്​ വിലക്ക്​ ഏർപ്പെടുത്തിയത്​. ഇൻഷൂറൻസ്​ കമ്പനികളിലെയും ഇൻഷൂറൻസ്​ ബ്രോക്കറേജ്​ രംഗത്ത്​ പ്രവർത്തിക്കുന്ന കമ്പനികളിലെയും ഫൈനാൻഷ്യൽ, അഡ്​മിനിസ്​ട്രേറ്റീവ്​ തസ്​തികകളാണ്​ സ്വദേശിവത്​കരണം ഏർപ്പെടുത്തിയ ആദ്യത്തെ വിഭാഗം. ഷോപ്പിങ്​ മാളുകൾക്ക്​ ഉള്ളിലെ സ്​ഥാപനങ്ങളിലെ വിൽപന, അക്കൗണ്ടിങ്​, മണി എക്​സ്​ചേഞ്ച്​, അഡ്​മിനസ്​ട്രേഷൻ, സാധനങ്ങൾ തരംതിരിക്കൽ തുടങ്ങിയ ജോലികളിലും വിദേശികൾക്ക്​ വിലക്ക്​ ഏർപ്പെടുത്തി. വാഹന ഏജൻസികളിലെ അക്കൗണ്ട്​

ഒാഡിറ്റിങ്​, പഴയതും പുതിയതുമായ വാഹനങ്ങളുടെ വിൽപനയുമായി ബന്ധപ്പെട്ട എല്ലാ തസ്​തികകൾ എന്നിവയും സ്വദേശിവത്​കരിച്ചിട്ടുണ്ട്​. കാർ ഏജൻസികളിലെ പഴയതും പുതിയതുമായ വാഹന വിൽപനയുമായി ബന്ധപ്പെട്ട എല്ലാ അക്കൗണ്ടിങ്​ ജോലികളിലും ആ​േട്ടാ ഏജൻസികളിലെ പുതിയ വാഹനങ്ങളുടെ സ്​പെയർപാർട്​സ്​ വിൽപനയുമായി ബന്ധപ്പെട്ട തസ്​തികകളിലും വിദേശികൾക്ക്​ വിലക്ക്​ ഏർപ്പെടുത്തിയതായി ഞായറാഴ്​ച പുറത്തിറങ്ങിയ മന്ത്രിതല ഉത്തരവിൽ പറയുന്നു. മലയാളികളെ കാര്യമായി തന്നെ ബാധിക്കുന്നതാണ്​ പുതിയ സ്വദേശിവത്​കരണ നീക്കം. പല തസ്​തികകളിലും തൊഴിലെടുക്കുന്നവരിൽ കൂടുതലും മലയാളികളാണ്​.