പ്രവാസം നൽകിയത്​ നഷ്​ടങ്ങൾ; ഏഴുവർഷത്തിന്​ ശേഷം സനിൽ നാടണഞ്ഞു 

മസ്​കത്ത്​: മലയാളി തൊഴിലുടമയുടെ കെണിയെ തുടർന്ന്​ ഒമാനിൽ കുടുങ്ങിയ മലയാളി യുവാവ്​ ഒടുവിൽ നാടഞ്ഞു. കോടതിയുടെ അതിവേഗ ഇടപെടലാണ്​ തിരുവല്ല പുറമറ്റം സ്വദേശി സനിൽ നായരുടെ ഏഴുവർഷത്തിന്​ ശേഷമുള്ള തിരിച്ചുപോക്കിന്​ വഴിയൊരുക്കിയത്​. പ്രവാസം നഷ്​ടങ്ങളുടെ കണക്ക്​ മാത്രമാണ്​ നൽകിയതെങ്കിലും ദൈവം തനിക്ക്​ വേണ്ടി നല്ലത്​ എന്തെങ്കിലും കരുതിവെച്ചിട്ടുണ്ടാകുമെന്ന പ്രതീക്ഷയിലാണ്​ ഇൗ യുവാവി​​​െൻറ മടക്കം. വെള്ളിയാഴ്​ച രാത്രിയുള്ള വിമാനത്തിൽ മടങ്ങിയ സനിൽ ശനിയാഴ്​ച പുലർച്ചെ നാട്ടിലെത്തി. 

അലൂമിനിയം ഫാബ്രിക്കേഷൻ ഉൽപന്നങ്ങളും മറ്റും വിപണനം നടത്തുന്ന ചങ്ങനാശേരി സ്വദേശികളുടെ സ്​ഥാപനത്തിലെ വെൽഡർ വിസയിൽ 2010 സെപ്​റ്റംബറിലാണ്​ സനിൽ ഒമാനിലെത്തുന്നത്​. പുതുതായി  തുടങ്ങുന്ന വർക്ക്​ഷോപ്പിലേക്ക്​ എന്ന്​ പറഞ്ഞാണ്​ വിസ നൽകിയത്​​. ഒമാനിലെത്തിയ ശേഷം വർക്ക്​ഷോപ്പ്​ ൈവകുമെന്നും അതുവരെ സൂറിലെ ഹോൾസെയിൽ കടയിൽ ഇരിക്കാനും പറഞ്ഞു. ജോലിക്ക്​ കയറി ഏതാണ്ട്​ പത്തുമാസത്തിന്​ ശേഷം നടന്ന സ്​റ്റോക്ക്​ വെരിഫിക്കേഷനോടെയാണ്​ സനിലി​​​െൻറ ജീവിതത്തിലെ ദുരിതത്തിന്​ തുടക്കമായത്​. സ്​റ്റോക്കിൽ 36000 റിയാലി​​​െൻറ സാധനങ്ങൾ കുറവുണ്ടെന്നായിരുന്നു കമ്പനിയുടെ വാദം. അന്നത്തെ വിനിമയ നിരക്കനുസരിച്ച്​ 44 ലക്ഷം രൂപ നൽകണമെന്നും അല്ലാത്ത പക്ഷം ആജീവനാന്തകാലം ജയിലിൽ ഇടുമെന്നും ഭീഷണിപ്പെടുത്തി നിരവധി പേപ്പറുകളിൽ ഒപ്പിട്ടുവാങ്ങി. തനിക്ക്​ ഇതിൽ യാതൊരു മനസറിവുമില്ലെന്ന്​ പറഞ്ഞെങ്കിലും പ്രയോജനമുണ്ടായില്ല. അതേ സ്​ഥാപനത്തിൽ തന്നെ ജോലി ചെയ്യുന്ന  സഹോദരി ഭർത്താവിനെയും കേസിൽ കുടുക്കുമെന്ന്​ ഭീഷണി മുഴക്കി. ഇതിന്​ ഏതാനും ദിവസങ്ങൾക്ക്​ ശേഷം സ്​ഥാപന ഉടമകളിൽ ഒരാൾ നാട്ടിലെത്തി സനിലി​​​െൻറ പിതാവിനെ കണ്ട്​ ഭീഷണി മുഴക്കി. തുടർന്ന്​ 18 ലക്ഷം രൂപയും ഒമ്പത്​ സ​​െൻറ്​ സ്​ഥലവും കൈക്കലാക്കി. എന്നാൽ ഏഴായിരം റിയാൽ കൂടി ​നൽകാതെ നാട്ടിൽ വിടില്ലെന്ന നിലപാടാണ്​ കമ്പനി അധികൃതർ പിന്നീട്​ എടുത്തത്​. തുടർന്ന്​ സൂറിൽ നിന്ന്​ മസ്​കത്തിലെ കമ്പനി ഹെഡ്​ഒാഫീസിലേക്ക്​ മാറ്റിയ സനിലിനെ പിന്നീട്​ വിവിധ ജോലികൾക്കായി നിയോഗിക്കുകയാണ്​ ചെയ്​തിരുന്നത്​. ഒന്നര വർഷക്കാലം മാസത്തിൽ ചെലവിനായി മുപ്പത്​ റിയാൽ വീതവും പിന്നീട്​ അമ്പത്​ റിയാൽ വീതവുമാണ്​ നൽകിയിരുന്നത്​. കടം വീട്ടി നാട്ടിൽ പോകാമെന്ന പ്രതീക്ഷയിൽ സാധാരണ ജോലിക്ക്​ പുറമെ ഒാവർടൈമും ഇക്കാലയളവിൽ ചെയ്​തിരുന്നതായി സനിൽ പറയുന്നു. 

മസ്​കത്തിൽ ജോലി ചെയ്യുന്ന തിരുവല്ല സ്വദേശി എബി മാത്യുവി​​​െൻറ അടുത്ത്​ സനിലി​​​െൻറ പിതാവ്​ സഹായം അഭ്യർഥിച്ച്​ എത്തിയതോടെയാണ്​ വിഷയത്തിൽ വഴിതിരിവുണ്ടായത്​. അഡ്വ.പ്രസാദി​​​െൻറ നിർദേശപ്രകാരം കഴിഞ്ഞ മാർച്ചിൽ എംബസിയിൽ പരാതി നൽകി. രണ്ടാം തവണ വിളിപ്പിച്ചപ്പോൾ എത്തിയ കമ്പനി പ്രതിനിധി പണം ഇനിയും നൽകാനുണ്ടെന്ന വാദമാണ്​ ഉയർത്തിയത്​. എന്നാൽ ഏഴായിരം റിയാൽ ഇതിനകം പിടിച്ചതായും 1535 റിയാൽ തനിക്ക്​ കിട്ടാനുണ്ടെന്നുമുള്ള അക്കൗണ്ട്​ സ്​റ്റേറ്റ്​മ​​െൻറ്​ സനിൽ ഹാജരാക്കിയതോടെ ഉടൻ നാട്ടിൽ വിടാമെന്ന നിലപാടിൽ കമ്പനി എത്തി. 

എന്നാൽ ഇക്കാര്യത്തിൽ തുടർ നടപടിയില്ലാതായതോടെയാണ്​ കേസ്​ കോടതിയിലേക്ക്​ കൈമാറിയത്​. കഴിഞ്ഞ സെപ്​റ്റംബർ 12ന്​ രണ്ടാം തവണ വിളിപ്പിച്ചപ്പോൾ കോടതിയിൽ ഹാജരായ സ്​പോൺസർക്ക്​ കമ്പനി ഉടമകളുടെ നടപടികളെ കുറിച്ച്​ യാതൊരു ധാരണയുമുണ്ടായിരുന്നില്ല. കാര്യങ്ങൾ ബോധ്യപ്പെട്ടപ്പോൾ നാട്ടിൽ വിടാൻ നടപടിയെടുക്കാമെന്ന്​ അറിയിക്കുകയായിരുന്നു. എംബസിയെ സമീപിച്ച മാർച്ച്​ മുതൽ ചെലവിന്​ നൽകിവന്നിരുന്ന തുകയും സനിലിന് കമ്പനിയിൽ നിന്ന്​​ ലഭിച്ചിരുന്നില്ല. 
ഇതടക്കം അറുനൂറ്​ റിയാലും പാസ്​പോർട്ടും ടിക്കറ്റും വേണമെന്ന സനിലി​​​െൻറ ആവശ്യവും കോടതി സ്​പോൺസറെ അറിയിച്ചു. കേസ്​ തുടർന്ന്​ പരിഗണിക്കുന്ന ഒക്​ടോബർ മൂന്നിന്​ ഇക്കാര്യത്തിൽ മറുപടി അറിയിക്കാമെന്ന്​ സ്​പോൺസർ പറഞ്ഞു. ഇതിനിടെ കമ്പനിയിൽ നിന്ന്​ വിളിച്ച്​ 200 റിയാലും ടിക്കറ്റും പാസ്​പോർട്ടും സനിലിന്​ നൽകി. ഇക്കാര്യം കഴിഞ്ഞ മൂന്നിന്​ സനിൽ കോടതിയെ അറിയിക്കുകയും ചെയ്​തു.  

പാസ്​പോർട്ടി​​​െൻറ കാലാവധി കഴിഞ്ഞതിനാൽ സുഹൃത്തുക്കളുടെ സഹായത്തോടെ 88 റിയാൽ മുടക്കി എമർജൻസി പാസ്​പോർട്ട്​ സംഘടിപ്പിച്ചു. ഇൗ മാസം 24ന്​ കേസി​​​െൻറ അന്തിമ വിധി കോടതി പുറപ്പെടുവിക്കുമെങ്കിലും എത്രയും പെ​െട്ടന്ന്​ നാട്ടിലെത്തിയാൽ മതിയെന്നതിനാലാണ്​ മടങ്ങാൻ തീരുമാനിച്ചതെന്നും സനിൽ പറയുന്നു. 
നിയമത്തെ കുറിച്ചുള്ള ധാരണയില്ലായ്​മ മൂലമാണ്​ ഇതുവരെ എംബസിയെയും ലേബർ കോടതിയെയും സമീപിക്കാതിരുന്നത്​. സമാനരീതിയിൽ കെണിയിൽ കുരുങ്ങികിടക്കുന്ന ഒന്നിലധികം പേർ കമ്പനിയിൽ ഉണ്ടെന്നും സനിൽ പറഞ്ഞു. അടിമപണിക്ക്​ തുല്ല്യമായ അവസ്​ഥയിൽ നിന്നാണ്​ സനിൽ മോചിതനായതെന്ന്​ അഡ്വ.പ്രസാദും പറഞ്ഞു.