പെരുന്നാൾ പ്രതീക്ഷ കൈവിട്ട്​ ചെറുകിട കച്ചവടക്കാർ

സുഹാർ: പെരുന്നാൾ കച്ചവട പ്രതീക്ഷ കൈവിട്ട്​ സൂഖുകൾ കേന്ദ്രീകരിച്ചുള്ള ചെറുകിട വ്യാപാരികൾ.നല്ലനിലയിൽ വ്യാപാരം നടത്തിയിരുന്ന ഇവരുടെ സീസൺ കച്ചവടം പ്രതീക്ഷിച്ചുള്ള കാത്തിരിപ്പിന്​ രണ്ടു​ വർഷമാവുകയാണ്​. ലോക്‌ഡൗണും കോവിഡ്​ വ്യാപനവും മൂലം കൊണ്ട് രണ്ടു വർഷമായി പെരുന്നാൾ, സ്‌കൂൾ വെക്കേഷന് നാട്ടിൽ പോകുന്നതി‍െൻറ അവധിക്കാല വിൽപന എന്നിവ ഇല്ലാതെയായി. ഹൈപ്പർ മാർക്കറ്റുകൾ വ്യാപകമായതിനെ തുടർന്നുണ്ടായ കച്ചവടക്കുറവിനൊപ്പമാണ്​ ഇടിത്തീപോലെ മഹാമാരിയും എത്തിയത്​. പല കടകളിലും കഴിഞ്ഞ സീസണിൽ ഇറക്കിയ സാധനങ്ങൾ വരെ ചെലവാകാതെ കിടക്കുന്നുണ്ട്​.

വിമാന സർവിസുകൾ ഇല്ലാത്തതിനാൽ തിരിച്ചുവരാനുള്ള വഴി തെളിയാത്തതുകൊണ്ട് ആരും നാട്ടിലേക്കു പോകുന്നില്ലെന്ന്​ സുഹാർ സൂഖിലെ പഴയ കച്ചവടക്കാരൻ തലശ്ശേരി സ്വദേശി എ.പി. അസീസ് പറയുന്നു. പെരുന്നാളിന്​ സാധാരണ ധാരാളമായി നടക്കുന്ന വസ്ത്രങ്ങൾ, ചെരിപ്പ്, സുഗന്ധവസ്​തുക്കൾ തുടങ്ങിയവയുടെ കച്ചവടമൊന്നും ഈ സീസണിലും നടന്നിട്ടില്ല. കോവിഡി‍െൻറ ഒന്നാം തരംഗത്തിൽ കെട്ടിടവാടകയിൽ ചില ഉടമകൾ ചില ഇളവുകൾ അനുവദിച്ചിരുന്നു. എന്നാൽ, രണ്ടാം തരംഗത്തിൽ ഒരു വാടകയിളവും അനുവദിക്കുന്നില്ല. അതുകൊണ്ടുതന്നെ സീസൺ കച്ചവടം കൂടിയില്ലാതായാൽ പിടിച്ചുനിൽക്കാനാകില്ലെന്ന്​ ഇവിടത്തെ കച്ചവടക്കാർ പറയുന്നു.

അതേസമയം, പെരുന്നാൾതിരക്കിന്​ കുറവൊന്നുമില്ലെന്നാണ്​ സീബ് സൂഖിൽ റോസ്​റ്ററി സ്​ഥാപനത്തിൽ ജോലി ചെയ്യുന്ന അബ്​ദുറസാഖിന്​ പറയാനുള്ളത്​. പ​േക്ഷ, പഴയതുപോലെ ആളുകൾ സാധനങ്ങൾ വാങ്ങുന്നില്ല. സാധനങ്ങളുടെ അളവ്​ പകുതിയും അതിൽ താഴെയുമൊക്കെയായി കുറച്ചു.

കനത്ത മഴയിൽ മറ്റിടങ്ങളിൽ നിന്ന് സ്ഥിരം വരാറുള്ള ആളുകൾ എത്താതിരുന്നതും കച്ചവടത്തെ ബാധിച്ചിട്ടുണ്ട്​.അടുത്ത വർഷം മുതൽ സീബ് സൂഖ്​ മൊത്തമായി സ്വദേശിവത്​കരിക്കുന്നുവെന്ന വാർത്തയും കച്ചവടക്കാരെ ആശങ്കയിലാക്കുന്നുണ്ട്​.നിരവധി മലയാളികളടക്കം വിദേശികൾ ജോലി ചെയ്യുന്ന ഇടമാണ് സീബ് സൂഖ്​.