ഒമാനിൽ ടൂറിസ്​റ്റ്​ വിസകൾ പുനരാരംഭിക്കാൻ സുപ്രീം കമ്മിറ്റി തീരുമാനം

മസ്​കത്ത്​: ഒമാനിൽ ടൂറിസ്​റ്റ്​ വിസകൾ അനുവദിക്കുന്നത്​ പുനരാരംഭിക്കുന്നു​. ആഭ്യന്തര മന്ത്രി ഹമൂദ്​ അൽ ബുസൈദിയുടെ അധ്യക്ഷതയിൽ തിങ്കളാഴ്​ച നടന്ന സുപ്രീം കമ്മിറ്റി യോഗമാണ്​ ഇതുസംബന്ധിച്ച തീരുമാനമെടുത്തത്​.

ആദ്യഘട്ടത്തിൽ ഹോട്ടലുകൾക്കും ടൂറിസം കമ്പനികൾക്കും മാത്രമായിരിക്കും ടൂറിസ്​റ്റ്​ വിസകൾ അനുവദിക്കുക. ഇവരുടെ കീഴിൽ ഗ്രൂപ്പായി വരുന്ന സഞ്ചാരികൾക്കാണ്​ ടൂറിസ്​റ്റ്​ വിസ ഉപയോഗിക്കാൻ സാധിക്കുക. കോവിഡ്​ വ്യാപനത്തെ തുടർന്ന്​ കഴിഞ്ഞ മാർച്ച്​ മുതലാണ്​ ഒമാൻ ടൂറിസ്​റ്റ്​ വിസകൾ അനുവദിക്കുന്നത്​ നിർത്തിവെച്ചത്​.

നവംബർ ആദ്യത്തിൽ എക്​സ്​പ്രസ്​, ഫാമിലി വിസിറ്റിങ്​ വിസകളും കഴിഞ്ഞ ദിവസം തൊഴിൽ വിസയും അനുവദിക്കുന്നത്​ പുനരാരംഭിച്ചിരുന്നു. കോവിഡ്​ സാഹചര്യത്തിൽ സർക്കാർ ഒാഫിസുകളിൽ കുറഞ്ഞ എണ്ണം ജീവനക്കാർ മാത്രം ഹാജരായാൽ മതിയെന്ന നേരത്തേയുള്ള ഉത്തരവും സുപ്രീം കമ്മിറ്റി പിൻവലിച്ചു. ഡിസംബർ ആറ്​ മുതൽ മുഴുവൻ ജീവനക്കാരും ഒാഫിസുകളിൽ ഹാജരാകണമെന്ന്​ സുപ്രീം കമ്മിറ്റി നിർദേശിച്ചു.

മുൻകരുതൽ നടപടികൾ ഉറപ്പാക്കി കൂടുതൽ വ്യവസായ, വാണിജ്യ പ്രവർത്തനങ്ങൾക്ക്​ അനുമതി നൽകാനും തീരുമാനിച്ചു. ബന്ധപ്പെട്ട അധികൃതർ ഇതി​െൻറ വിശദാംശങ്ങൾ അറിയിക്കും.

കോവിഡ്​ രോഗവ്യാപനത്തിൽ കാര്യമായ കുറവ്​ ദൃശ്യമാണ്​. ആശുപത്രികളിലും ​തീവ്രപരിചരണ വിഭാഗങ്ങളിലും പ്രവേശിക്കപ്പെടുന്നവരുടെ എണ്ണം കുറഞ്ഞതായും സുപ്രീം കമ്മിറ്റി വിലയിരുത്തി. രോഗ വ്യാപനം തടയാനുള്ള മുൻകരുതൽ നടപടി പാലിക്കുന്നതിൽ ജനങ്ങൾ പുലർത്തുന്ന പ്രതിബദ്ധത സുപ്രീം കമ്മിറ്റി അനുമോദിക്കുകയും ചെയ്​തു.