ഉഷ്ണമേഖല ന്യൂനമർദം: ഞായറാഴ്ച ദോഫാറിലും അൽ വുസ്തയിലും കനത്ത മഴക്ക്​ സാധ്യത

മസ്കത്ത്​: അറബിക്കടലിന്റെ തെക്കുകിഴക്ക് ഭാഗത്ത് ന്യൂനമർദം രൂപപ്പെടാൻ സാധ്യതയുണ്ടെന്ന് ദേശീയ കാലാവസ്ഥ കേന്ദ്രം അറിയിച്ചു. ഇത്​ അടുത്ത 48 മണിക്കൂറിനുള്ളിൽ ഉഷ്ണമേഖല ന്യൂനമർദമായി മാറുമെന്നാണ്​ പ്രതീക്ഷിക്കുന്നത്​. മണിക്കൂറിൽ 31 കി.മീറ്ററിൽ​ താഴെ വേഗതയിലാണ്​ കാറ്റ്​ വീശിക്കൊണ്ടിരിക്കുന്നത്​. നിലവിൽ ഒമാൻ തീരത്തുനിന്ന്​ 1440 കി.മീറ്റർ അകലെയാണ്​ ന്യൂനമർദം​.

ഉഷ്ണമേഖല ന്യൂനമർദം ഒമാൻ, യമൻ തീരങ്ങളിലേക്ക് നീങ്ങുമെന്നാന്ന്​ പ്രാരംഭ സൂചനകൾ​. ഇത് മേഘങ്ങളുടെ ആവിർഭാവത്തിനും ഞായറാഴ്ച ഉച്ചക്ക് ശേഷം അൽ വുസ്ത, ദോഫാർ ഗവർണറേറ്റുകളിൽ കനത്ത മഴക്കും കാരണമാകുമെന്നും മുന്നറിയിപ്പിൽ പറയുന്നു.

അതേസമയം, രാജ്യത്തെ വിവിധ ഗവർണറേറുകളിൽ ബുധനാഴ്ച കനത്ത മഴക്കും കാറ്റിനും സാധ്യതയുണ്ടെന്ന്​ ഒമാൻ കാലാവസ്​ഥ നിരീക്ഷണ കേന്ദ്രം അറിയിച്ചു. തെക്ക്​-വടക്ക്​ ബാത്തിന, ദാഖിലിയ, മസ്‌കത്ത്​, ദാഹിറ, ശർഖിയ ഗവർണറേറ്റുകളിലെ പർവതപ്രദേശങ്ങളിലാണ്​ മഴ പെയ്യുക. വിവിധ ഇടങ്ങളിൽ 15 മുതൽ 40 മില്ലിമീറ്റർവരെ മഴ ലഭിച്ചേക്കും. വാദികൾ മുറിച്ച്​ കടക്കാൻ ശ്രമിക്കരുതെന്നും താഴ്ന്ന സ്ഥലങ്ങളിൽനിന്ന്​ മാറി നിൽക്കണമെന്നും അധികൃതർ നിർദേശിച്ചു.