മരുഭൂമിയിലെ ഡ്രൈവിങ്ങിനിടെ അപകടം: കണ്ണീർ ഓർമയായി അബ്​നാസ്​

ദോഹ: കാലാവസ്ഥ തണുക്കുമ്പോൾ, അറബികൾക്കെന്ന പോലെ ഖത്തറിലെ പ്രവാസി സമൂഹത്തിനും ഹരമാണ്​ മരുഭൂമിയിലെ യാത്രയും ക്യാമ്പിങ്ങുമെല്ലാം. മാർച്ച്​ മാസം വരെ നീളുന്ന വിന്‍റർ ക്യാമ്പിങ്​ സീസണിന്‍റെ ത്രില്ലും വിനോദവുമെല്ലാം അപൂർവമായ അനുഭവവുമാണ്​.

എന്നാൽ, ഏറെ സാഹസികമായ ഡെസേർട്ട്​ സഫാരിയുടെ കണ്ണീരിൽ കുതിർന്ന ഓർമയായി മാറി വെള്ളിയാഴ്​ച രാവിലെ ഉംസഈദിൽ അപകടത്തിൽ മരിച്ച കണ്ണൂർ മട്ടന്നൂർ സ്വദേശി അബ്​നാസ്​ അബ്​ദുല്ല. ​സുഹൃത്തുക്കൾ നാലുപേർ ചേർന്ന്​ നടത്തിയ ഡെസേർട്ട്​ സഫാരിക്കിടയിൽ സാൻഡ്​ ഡ്യൂൺസിലെ ഡ്രൈവിങ്ങായിരുന്നു ഇവർക്ക്​ അപകടം ഒരുക്കിയത്​.

നിയ​ന്ത്രണം നഷ്ടമായ വാഹനം അപകടത്തിൽ പെട്ടപ്പോൾ തെറിച്ചുവീണ അബ്​നാസ്​ വാഹനത്തനടിയിലായി. ഉടൻ ആശുപത്രിയിലെത്തിച്ചെങ്കിലും മരണം സംഭവിക്കുകയായിരുന്നു. കൂടെയുണ്ടായിരുന്നവർ നിസ്സാര പരിക്കുകളോടെ രക്ഷപ്പെട്ടു.

അബ്‌നാസ് അബ്ദുല്ലയുടെ മയ്യിത്ത് നടപടിക്രമങ്ങൾ പൂർത്തിയാക്കിയ ശേഷം, ശനിയാഴ്ച രാത്രിയോടെ എയർ ഇന്ത്യാ എക്സ്​പ്രസ്​ വിമാനത്തിൽ നാട്ടിലേക്ക്‌ കൊണ്ടുപോവുമെന്ന് കെ.എം.സി.സി അൽ ഇഹ്‌സാൻ മയ്യിത്ത് പരിപാലന കമ്മിറ്റി ചെയർമാൻ മെഹബൂബ് നാലകത്ത് അറിയിച്ചു.

ഏറെ സാഹസികവും എന്നാൽ, ആസ്വാദ്യകരവുമായ മരുഭൂ സഫാരിക്കിടയിലെ അപകടങ്ങൾ ഒഴിവാക്കാൻ അധികൃതരുടെ നേതൃത്വത്തിൽ ഏറ്റവും മികച്ച ക്രമീകരണങ്ങളാണ്​ ഒരുക്കുന്നത്​. ക്യാമ്പിങ്​ സീസൺ ആരംഭിക്കുന്നത്​ മുതൽ വിവിധ പൊലീസ്-ട്രാഫിക്​​ വിഭാഗങ്ങളുടെയും ആരോഗ്യ പ്രവർത്തകരുടെയു​മെല്ലാം ബോധവൽകരണവും കാവലുമുണ്ട്​.

വെള്ളിയാഴ്ചയും ക്യാമ്പിങ്​ മേഖലയിലെ സുരക്ഷ സംബന്ധിച്ച്​ ആഭ്യന്തര മന്ത്രാലയം അറിയിപ്പ്​ പുറത്തുവിട്ടു. മരുഭൂമിയിലെ മണൽകൂനകളായി ഉയർന്നു കിടക്കുന്ന സാൻഡ്​ ഡ്യൂൺസിലെ ഡ്രൈവിങ്​ ഏറെ ശ്രദ്ധയും കരുതലും വേണ്ടതാണ്​. ക്യാമ്പിങ് നിയമങ്ങളെല്ലാവരും നിർബന്ധമായും പാലിക്കണമെന്നും പ്രത്യേകിച്ചും ഗതാഗത നിയമങ്ങൾ കൃത്യമായി അനുസരിക്കണമെന്നും അധികൃതർ നിരന്തരമായി ആവശ്യപ്പെടുന്നുണ്ട്​.