അഫ്​ഗാൻ: ഖത്തർ പ്രതിനിധി ഇന്ത്യൻ വിദേശകാര്യമന്ത്രിയുമായി കൂടിക്കാഴ്​ച നടത്തി

ദോഹ: ഇന്ത്യ സന്ദർശിക്കുന്ന ഖത്തർ വിദേശകാര്യ മന്ത്രാലയം പ്രത്യേക പ്രതിനിധി ഡോ. മുത്​ലാഖ്​ ബിൻ മാജിദ്​ അൽ കഹ്​താനി വിദേശ കാര്യമന്ത്രി എസ്​. ജയ്​ശങ്കറുമായി കൂടിക്കാഴ്​ച നടത്തി. രണ്ടു ദിവസത്തെ സന്ദർശനത്തിനാണ്​ ഖത്തർ വിദേശ മന്ത്രാലയത്തിൻെറ തീവ്രവാദ വിരുദ്ധ-മധ്യസ്ഥ ദൗത്യസംഘ വിഭാഗം പ്രത്യേക ദൂതൻ ഡോ. അൽ കഹ്​താനി ഇന്ത്യയിലെത്തിയത്​. അഫ്​ഗാനിസ്​താനിലെ യുദ്ധ സാഹചര്യങ്ങൾ കൂടിക്കാഴ്​ചയിൽ ചർച്ചയായി. മേഖലയിലെ സംഭവ വികാസങ്ങളിൽ ഇന്ത്യയുടെ ഉത്​കണ്​ഠയും നിലപാടും മനസ്സിലാക്കിയതായും അദ്ദേഹം ട്വീറ്റ്​ ചെയ്​തു. അടുത്തയാഴ്​ച റഷ്യൻ നേതൃത്വത്തിൽ ദോഹയിൽ നടക്കുന്ന രാജ്യാന്തര ഉച്ചകോടിയുടെ (വിപുലീകൃത ട്രോയിക്ക) ​മുന്നോടിയായാണ്​ ഖത്തർ വിദേശകാര്യ മന്ത്രിയുടെ പ്രതിനിധി ന്യൂഡൽഹിയിലെത്തിയത്​.

അഫ്​ഗാനിലെ രാഷ്​ട്രീയ അരക്ഷിതാവസ്ഥക്ക്​ പരിഹാരം കാണുന്നതിൻെറ ഭാഗമായി, ചൈന, അമേരിക്ക, പാകിസ്​താൻ, റഷ്യ എന്നീ രാജ്യങ്ങൾ പ​ങ്കെടുക്കുന്ന 'എക്​സ്​റ്റൻഡഡ്​ ട്രോയിക്ക' ആഗസ്​റ്റ്​ 11നാണ്​ ദോഹയിൽ ചേരുന്നത്​. അഫ്​ഗാനിലെ സമാധാന സ്​ഥാപനത്തിന്​ ഈ ചർച്ച വഴിയൊരുക്കുമെന്ന പ്രതീക്ഷയിലാണ്​ രാജ്യാന്തര സമൂഹം.

ഇന്ത്യൻ വിദേശകാര്യ വിഭാഗത്തിൽ പാകിസ്​താൻ, അഫ്​ഗാൻ, ഇറാൻ ചുമതലയുള്ള ജോയൻറ്​ സെ​ക്രട്ടറി ജെ.പി. സിങ്ങുമായും ഡോ. അൽ കഹ്​താനി കൂടിക്കാഴ്​ച നടത്തി.അഫ്​ഗാൻ വിഷയത്തിൽ ഇന്ത്യയുടെ നിലപാടും രാജ്യത്ത്​ സമാധാനം പുനഃസ്ഥാപിക്കേണ്ടതിൻെറ ആവശ്യവും അദ്ദേഹം അൽ കഹ്​താനിയെ അറിയിച്ചു.