പ്രകൃതിസൗഹൃദമായി അൽ വാദി പാർക്ക്

ദോഹ: ലോകകപ്പിനെ വരവേൽക്കാനൊരുങ്ങുന്ന ഖത്തറിൽ ലോകമെങ്ങുമുള്ള സന്ദർശക​രെ സ്വാഗതംചെയ്ത്​ ഓരോ കേന്ദ്രങ്ങളും ഒരുങ്ങുകയാണ്​. അവയിൽ ഏറ്റവും പുതിയ കേന്ദ്രമാണ്​ പൊതുമരാമത്ത്​ വിഭാഗത്തിനുകീഴിൽ പണി പൂർത്തിയാക്കിയ അൽ വജ്​ബ ഈസ്റ്റിലെ അൽ വാദി പാർക്ക്​. പച്ചപ്പും മരുഭൂമിയിലെ മണൽതിട്ടകളും ഉൾപ്പെടെ പ്രകൃതിഭംഗി ആസ്വദിക്കാനുള്ള സൗകര്യങ്ങളോടെ ഒരുക്കിയ അൽ വാദി പാർക്കിന്‍റെ നവീകരണം പൂർത്തിയായതായി അശ്​ഗാൽ അറിയിച്ചു.

പൊതു ഇടങ്ങൾ സൗന്ദര്യവത്കരിക്കാനുള്ള പ്രത്യേക സൂപ്പർവൈസറി കമ്മിറ്റിയുമായി സഹകരിച്ചാണ് പാർക്കിനെ മോടിപിടിപ്പിച്ചത്. അൽ വാദി പ്രകൃതി സംരക്ഷണ കേന്ദ്രത്തിലെ കാഴ്ചകൾ പൂർണമായും ആസ്വദിക്കാനുള്ള സംവിധാനങ്ങളോടെയാണ്​ പാർക്ക്​ തയാറായത്​. അൽ വജ്‌ബയിൽ സ്ഥിതി ചെയ്യുന്ന പാർക്കിലെ ഒരുലക്ഷത്തോളം സ്‌ക്വയർ മീറ്റർ പ്രദേശത്ത് മരങ്ങൾ നട്ടുപിടിപ്പിച്ചതായി​ അശ്​ഗാൽ അറിയിച്ചു. പ്രകൃതിയുമായി ഇണങ്ങിനിൽക്കുന്ന പാർക്കിൽ നടപ്പാതകളും സൈക്ലിങ് സൗകര്യവും കാഴ്ചകൾ ആസ്വദിക്കാൻ ഇരിപ്പിടങ്ങളും തയാറാക്കിയിട്ടുണ്ട്. ഖത്തറിൽ സ്വാഭാവികമായി കാണപ്പെടുന്ന വൃക്ഷങ്ങളായ​ ലിസിയം ബാർബറം, വിവിധയിനം സിദ്​ർ ചെടികൾ, അക്കേഷ്യ, ജെറുസലേം തോൺ തുടങ്ങിയ തൈകളാണ് പാർക്കിലുടനീളം നട്ടിട്ടുള്ളത്. മരുഭൂമിയിൽ വളരാൻ കഴിയുന്ന ജീവജാലങ്ങളുടെ ആവാസവ്യവസ്ഥയും സജ്ജീകരിച്ചുകൊണ്ടാണ്​ പാർക്ക്​ തയാറാക്കിയത്​. ഒരു കിലോമീറ്റർ നീളത്തിൽ നടപ്പാതയും സൈക്ലിങ്​ ട്രാക്കുമുണ്ട്​.

അതോടൊപ്പം തന്നെ​ ജോഗിങ്​ നടത്താനുള്ള ഒരു കിലോമീറ്റർ പാതയുമുണ്ട്​. ആരോഗ്യകരമായ അന്തരീക്ഷത്തിൽ വ്യായാമം നടത്താനാണ്​ അധികൃതർ സൗകര്യമൊരുക്കിയത്​. ചെടികളും ജീവജാലങ്ങളും സംരക്ഷിച്ചുകൊണ്ടുള്ള പ്രകൃതി സൗഹൃദ നിർമാണമാണ്​ അൽവാദി പാർക്കിലൂടെ പൂർത്തിയാക്കിയതെന്ന്​ അശ്​ഗാൽ റോഡ്​സ്​ പ്രോജക്ട്​സ്​​ വിഭാഗം മാനേജർ എൻജിനീയർ സൗദ്​ അലി അൽ തമിമി പറഞ്ഞു.

കഴിഞ്ഞ ദിവസം നടന്ന ചടങ്ങിൽ വിവിധ വിഭാഗങ്ങളിൽ നിന്നുള്ള ഉദ്യോഗസ്ഥർ പാർക്കിൽ വിത്തുപാകിയും തൈകൾവെച്ചും ഹരിതവത്​കരണത്തിന്​ തുടക്കം കുറിച്ചു. പാർക്കിന്‍റെ പ്രകൃതി സൗഹൃദ അന്തരീക്ഷത്തിന്​ കോട്ടമില്ലാതെതന്നെ കാൽനടയും ജോഗിങ്ങും സൈക്ലിങ്ങും നടത്താൻ കഴിയുമെന്ന്​ സൂപ്പർവൈസറി കമ്മിറ്റി ഓഫ്​ ബ്യൂട്ടിഫിക്കേഷൻ ഓഫ്​ റോഡ്​സ്​ ആൻഡ്​​ പബ്ലിക്ക്​​ ​പ്ലേസ്​ പ്രോജക്ട്​ ഡിസൈൻ മാനേജർ എൻജി. മർയം അൽ കുവാരി പറഞ്ഞു. പാർക്കിന്​ ചുറ്റുമായി ഒന്നര കി.മീ നീളത്തിൽ വേലികൾ നിർമിച്ചിട്ടുണ്ട്​. മൂന്നു വശങ്ങളിൽ നിന്നായാണ്​ പ്രവേശന സൗകര്യമുള്ളത്​.