ഇതാ, അമാ ദബ്​ലാം കൊടുമുടി കീഴടക്കിയ ആദ്യ ഖത്തരി

ദോഹ: ഹിമാലത്തിെൻറ മാറ്റർഹോൺ എന്നറിയപ്പെടുന്ന അമാ ദബ്​ലാം കൊടുമുടി കീഴടക്കി ഖത്തരി പർവതാരോഹകനായ ശൈഖ് മുഹമ്മദ് ആൽഥാനി ചരിത്രത്തിലിടം പിടിച്ചു. അമാ ദബ്​ലാമിെൻറ ഉച്ചിയിലെത്തുന്ന ആദ്യ ഖത്തരി പൗരനെന്ന ഖ്യാതിയാണ് മോയ് ആൽഥാനി എന്ന വിളിപ്പേരിലറിയപ്പെടുന്ന ശൈഖ് മുഹമ്മദ് ആൽഥാനി സ്വന്തമാക്കിയത്. ഇക്കഴിഞ്ഞ നവംബർ 11നാണ് പർവതത്തിെൻറ ഏറ്റവും ഉയരം കൂടിയ ഭാഗത്ത് അദ്ദേഹം കാലുകുത്തിയത്. എവറസ്​റ്റ് കൊടുമുടിയെക്കാൾ പ്രയാസമേറിയതാണ് അമാ ദബ്​ലാമെന്ന് 6812 മീറ്റർ ഉയരമുള്ള പർവതംകീഴടക്കിയ ശേഷം അദ്ദേഹം ഇൻസ്​റ്റഗ്രാമിൽ കുറിച്ചു.

11 മണിക്കൂർ തുടർച്ചയായ ശ്രമത്തിലൂടെയാണ് നെറുകയിലെത്തിയത്​. എല്ലാവരുടെയും പിന്തുണക്കും സ്​നേഹത്തിനും നന്ദി അറിയിക്കുകയാണെന്നും അദ്ദേഹം എഴുതി.ഖത്തരി ഉദാരമതിയും സംരംഭകനും അതിലുപരി മികച്ച പർവതാരോഹകനും കായികതാരവുമാണ്​ മോയ് അൽഥാനി. എവറസ്​റ്റ് കൊടുമുടിയുൾപ്പെടെ ഏഴ് കൊടുമുടികൾ കീഴടക്കിയ പ്രഥമ ഖത്തരിയാണ്. ഏഴ് കൊടുമുടികളും ദക്ഷിണ, ഉത്തര ധ്രുവങ്ങളും കൂടി കീഴടക്കി എക്സ്​പ്ലോർസ്​ ഗ്രാൻഡ് സ്​ലാം എന്ന പദവിയിലേക്കുള്ള തയാറെടുപ്പിലാണ് ശൈഖ് ആൽഥാനി ഇപ്പോൾ. ഗ്രാൻഡ് സ്​ലാം പദവിയിലേക്കുള്ള അവസാന ലാപ്പിലാണ് ഇപ്പോൾ അദ്ദേഹം. ഇതു നേടുന്നതോടെ ചരിത്രത്തിലെ 50ാമത്തെ വ്യക്തിയും ആദ്യ ഖത്തരിയുമായി അദ്ദേഹം മാറും.

കോവിഡ്-19നെ തുടർന്നുണ്ടായ എല്ലാ പ്രതികൂല സാഹചര്യങ്ങളും തരണം ചെയ്താണ് അമ ദബ്​ലാം കീഴടക്കിയതെന്നത് നേട്ടത്തിനു കൂടുതൽ നിറം പകരുന്നുണ്ട്. ലോകത്തിലെതന്നെ ഏറ്റവും സുന്ദരമായ കൊടുമുടികളിലൊന്നായാണ് അമ ദബ്​ലാം അറിയപ്പെടുന്നത്. കിഴക്കൻ നേപ്പാളിലെ ഖുംബു പ്രദേശത്ത് സ്ഥിതി ചെയ്യുന്ന അമ ദബ്​ലാം പ്രശസ്​തമായ പര്യവേക്ഷണപാത കൂടിയാണ്. കൊടുമുടിയിലേക്കുള്ള പാത ഏറെ പ്രയാസകരമാണെങ്കിലും ഇവിടെനിന്നുള്ള കാഴ്ചകൾ ഏറെ മനോഹരമാണ്​.