ലോകകപ്പിന്​ തയാറെടുത്ത്​ ആംബുലൻസ്​ സർവിസ്​

ദോഹ: ലോകമേളയെ വരവേൽക്കാനൊരുങ്ങുമ്പോൾ അടിമുടി സജ്ജമാവുകയാണ്​ ഖത്തർ. ​സ്​റ്റേഡിയങ്ങൾ മുതൽ സുരക്ഷയും അനുബന്ധ സംവിധാനങ്ങളുമായി എല്ലാ മേഖലയും പരീക്ഷിക്കപ്പെട്ടുകൊണ്ട്​ ഫിഫ അറബ്​ കപ്പിലൂടെ ഖത്തർ തയാറെടുപ്പ്​ വി​ളിച്ചോതി. അതിൽ സുപ്രധാനമായിരുന്നു ഹമദ്​ മെഡിക്കൽ കോർപറേഷന്‍റെ ആംബുലൻസ്​ സർവിസ്​ യൂനിറ്റിന്‍റെയും സേവനം. സ്​റ്റേഡിയങ്ങൾ, കളിക്കളങ്ങൾ, ​മത്സരങ്ങളുമായി ബന്ധപ്പെട്ട തിരക്കേറിയ ഭാഗങ്ങൾ, മെട്രോ സ്​റ്റേഷനുകൾ, റോഡുകൾ തുടങ്ങി അപായം ഏതു​നിമിഷവും സംഭവിക്കാവുന്ന മേഖലകളിലെല്ലാം ഏത്​ അടിയന്തര സാഹചര്യവും നേടാനുള്ള തയാറെടുപ്പുകളോടെ ഒരുങ്ങിനിന്ന്​, നിർണായക ഇടപെടലുകൾ നടത്തിയ ആംബുലൻസ്​ സർവിസ്​ വിഭാഗം ലോകകപ്പിന്​ ഒരുങ്ങിയെന്നതിന്‍റെ അടയാളപ്പെടുത്തലായി ഫിഫ അറബ്​ കപ്പ്​ മാറിയെന്ന്​ അധികൃതർ വെളിപ്പെടുത്തുന്നു. ആറ്​ വേദികളിലായി നടന്ന അറബ്​ കപ്പ്​, ലോകകപ്പ്​ പോലെതന്നെ പ്രധാന ഇനമായാണ്​ പരിഗണിക്കപ്പെട്ടത്​.

ഈ വർഷത്തെ വി​ശ്വമേളയിലേക്കുള്ള ഒരുക്കമായി അറബ്​ കപ്പ്​ മാറ്റപ്പെട്ടു -ആംബുലൻസ്​ സർവിസ്​ അസിസ്റ്റന്‍റ്​ എക്സിക്യൂട്ടിവ്​ ഡയറക്ടർ അലി ദാർവിഷ്​ പറയുന്നു. 'കാണികളുടെ എണ്ണവും മത്സരം നടന്ന സ്​റ്റേഡിയങ്ങളും പരിഗണിക്കുമ്പോൾ അറബ്​ കപ്പ്​ ലോകകപ്പിന്‍റെ തയാറെടുപ്പ്​ എന്നനിലയിൽ ഉപയോഗപ്പെടുത്താനായി. അറബ്​ കപ്പിനിടയിൽ സ്​റ്റേഡിയങ്ങളിലും മറ്റുമായി കൃത്യമായ ആസൂത്രണത്തോടെ ആംബുലൻസ്​ സർവിസ്​ നിയന്ത്രിക്കപ്പെട്ടിരുന്നു. മാനേജർ, സീനിയർ ഓപറേഷൻ സൂപ്പർ വൈസർ, ഓപറേഷൻ ഓഫിസ്​, ലോജിസ്റ്റിക്സ്​ സൂപ്പർവൈസർ, പാരാമെഡിക്​ വിഭാഗം, ക്ലിനിക്കൽ പരിചരണത്തിന്​ സീനിയർ കൺസൽട്ടന്‍റ്​ സേവനം എന്നിവയോടെയാണ്​ ഓരോ സ്​റ്റേഡിയത്തിലും സർവിസ്​ യൂനിറ്റുകൾ സജ്ജമാക്കിയത്​. സ്​റ്റേഡിയം മാനേജർ നാഷനൽ കമാൻഡിങ്​ സെന്‍ററുമായി ഏകോപിപ്പിച്ചായിരുന്നു പ്രവർത്തനം ​നിയന്ത്രിച്ചിരുന്നത്​ -അലി ദാർവിഷ്​ വിശദമാക്കി. വിവിധ വിഭാഗങ്ങളെ ​ഏകോപിപ്പിച്ചുകൊണ്ട്​ ആംബുലൻസ്​ സർവിസ്​ നൽകിയ സേവനങ്ങൾ ​ഫിഫയുടെ പ്രശംസ പിടിച്ചുപറ്റിയതായും അദ്ദേഹം പറഞ്ഞു. അറബ്​ കപ്പ്​ ഫൈനലും ​ഖത്തർ ദേശീയദിനവും ഓരേ ദിവസമെത്തിയത്​ രണ്ട്​ വലിയ ആഘോഷങ്ങളെ ഒരു വീഴ്ചയുമില്ലാതെ കൈകാര്യം ചെയ്യാനുള്ള പരിചയസമ്പത്തും നൽകിയതായി അദ്ദേഹം വിശദീകരിച്ചു. സുപ്രീം കമ്മിറ്റി ഫോർ ഡെലിവറി ആന്‍റ്​ ലെഗസിയുമായി ചേർന്നാണ്​ ആംബുലൻസ്​ സർവിസിന്‍റെയും പ്രവർത്തനം.

സാ​ങ്കേതിക മേഖല, ജീവനക്കാർക്ക്​ ലഭിച്ച പരിശീലനം, വിഭവശേഷം തുടങ്ങി എല്ലാ മേഖലയിലും അറബ്​ കപ്പിലെ ഓരോ അനുഭവവും ലോകകപ്പിലേക്കുള്ള തയാറെടുപ്പിൽ പാഠമായി മാറും. അടിയന്തര സാഹചര്യങ്ങളിൽ ആശുപത്രിയിലെത്തിക്കും മുമ്പുള്ള പ്രാഥമിക ചികിത്സകൾ, ഗുരുതരാവസ്ഥയിലുള്ളവർക്ക്​ ആശുപത്രിയിലേക്കുള്ള യാത്ര എന്നിവക്കുപുറമെ മറ്റ്​ അടിയന്തര സേവനങ്ങളും ആംബുലൻസ്​ സർവിസ്​ വിഭാഗം ഉറപ്പാക്കുന്നു. അറബ്​ കപ്പിനിടയിലും പതിവ്​ സേവനങ്ങളിൽ തടസ്സമില്ലായിരുന്നുവെന്ന്​ അലി ദാർവിഷ്​ സാക്ഷ്യപ്പെടുത്തുന്നു. കോവിഡ്​ രോഗികൾ, വാക്സിനേഷൻ സെന്‍ററർ തുടങ്ങിയ ദൈനംദിന നടപടികളും മുടക്കമില്ലാതെ തുടർന്നു. മുൻവർഷത്തെ അപേക്ഷിച്ച്​ കഴിഞ്ഞവർഷം ആംബുലൻസ്​ സർവിസ്​ വിഭാഗത്തിന്‍റെ സേവനങ്ങൾ കുറവായിരുന്നുവെന്ന്​ കണക്കുകൾ ചൂണ്ടിക്കിണിക്കുന്നു. 2020ൽ 379212 കേസുക​ളാണ്​ ആകെ കൈകാര്യം ചെയ്തത്​. ഇതിൽ 268953 അടിയന്തര കേസുകളായിരുന്നു. എന്നാൽ, 2021 ജനുവരി മുതൽ നവംബർ അവസാനംവരെയുള്ള കണക്കുകൾ പ്രകാരം 352785 കേസുകളാണ്​ ആകെയുണ്ടായിരുന്നത്​.

ഇവയിൽ 245610 കേസുകളും അടിയന്തരമായിരുന്നുവെന്ന്​ അലി ദാർവിഷ്​ പറഞ്ഞു. ദോഹക്കുള്ളിൽ 10 മിനിറ്റിലും പുറത്ത്​ 15 മിനിറ്റിലുമാണ്​ സർവിസ്​ ഉറപ്പുനൽകുന്നത്​.