അമീർ കപ്പ്​; അൽ സദ്ദ്​ x അൽ അറബി ഫൈനൽ

ദോഹ: മേയ്​ 12ന്​ അഹമ്മദ്​ ബിൻ അലി സ്​റ്റേഡിയം വേദിയാവുന്ന അമീർ കപ്പ്​ കിരീടപ്പോരാട്ടത്തിൽ ചാമ്പ്യൻ ക്ലബ്​ അൽ സദ്ദും അൽ അറബിയും മുഖാമുഖം. കഴിഞ്ഞ ദിവസം നടന്ന രണ്ടാം സെമി ഫൈനലിൽ അൽ സൈലിയയെ 7-1ന്​ കീഴടക്കിയാണ്​ അൽ അറബി ഫൈനലിൽ ഇടം പിടിച്ചത്​. ക്വാർട്ടറിൽ സീസണിൽ കിരീടം വാരിക്കൂട്ടി കുതിക്കുന്ന ഹെർനാൻ ക്രെസ്​പോയുടെ അൽ ദുഹൈലിനെ അട്ടിമറിച്ചായിരുന്നു അൽ സൈലിയ സെമിയിൽ പ്രവേശിച്ചത്​.

എന്നാൽ, അബ്​ദുല്ല ബിൻ ഖലീഫ സ്​റ്റേഡിയത്തിൽ ചൊവ്വാഴ്​ച രാത്രി പന്തുരുണ്ട്​ തുടങ്ങിയതിനു പിന്നാലെ, സൈലിയ വലയിൽ അൽഅറബിയുടെ ഗോൾ വർഷം തുടങ്ങി. 12ാം മിനിറ്റിൽ ആദ്യം വലകുലുക്കിയ യൂസുഫീ മസാകിനി ഹാട്രിക്​ ഗോളുകളുമായി ടീമിന്റെ പടയോട്ടം നയിച്ചു. ഏറ്റവും ഒടുവിൽ ഇഞ്ചുറി ടൈമിൽ ഏഴാം ഗോൾ കുറിച്ചതും ഇദ്ദേഹമായിരുന്നു. റഫീന്യ (31), അഹമ്മദ്​ സുഹൈൽ (70), ഉമർ അൽ സമോഹ്​ (72, 82) എന്നിവരും അൽ അറബിക്കായി ലക്ഷ്യം കണ്ടു. ടീം ആറ്​ ഗോളിന്​ പിന്നിൽ നിന്നപ്പോൾ മാത്രമായിരുന്നു അൽ സൈലിയക്ക്​ ആശ്വാസ ഗോൾ കുറിക്കാൻ കഴിഞ്ഞത്​. 85ാം മിനിറ്റിൽ കാർലോസ്​ സ്​ട്രാൻബർഗിലൂടെയാണ്​ ആശ്വാസ ഗോൾ പിറന്നത്​.

ആദ്യ സെമിയിൽ അൽ ഷഹാനിയയെ തോൽപിച്ച അൽ സദ്ദാണ്​ കലാശപ്പോരാട്ടത്തിലെ എതിരാളികൾ. മേയ്​ 12ന്​ ലോകകപ്പ്​ ഫൈനൽ വേദിയായ അഹമ്മദ്​ ബിൻഅലി സ്​റ്റേഡിയത്തിലാണ്​ കിരീടപ്പോരാട്ടം.

18 തവണ അമീർ കപ്പ്​ കിരീടം ചൂടിയവരാണ്​ അൽ സദ്ദ് എങ്കിൽ അൽ അറബി എട്ടു തവണ ജേതാക്കളായിരുന്നു. ആദ്യ കാലങ്ങളിൽ ഖത്തറിലെ ക്ലബ്​ ഫുട്​ബാളിലെ പവർ ഹൗസായ അൽ അറബിക്ക്​ വർഷങ്ങളുടെ കാത്തിരിപ്പിനൊടുവിലാണ്​ ഫൈനൽ പ്രവേശനം. 1992-93 സീസണിൽ കിരീടമണിഞ്ഞവർ, 1994ലായിരുന്നു അവസാനമായി ഫൈനൽ കളിച്ചത്​. അൽ സദ്ദ്​ ആവ​ട്ടെ, 2020,2021 സീസണുകളിൽ കിരീടമണിഞ്ഞു. അൽ ദുഹൈലാണ്​ നിലവിലെ ജേതാക്കൾ.