ഏപ്രിൽ, മേയ് മാസം: സകാത് ഫണ്ടിൽനിന്ന്​ ചെലവഴിച്ചത് മൂന്നു കോടി റിയാൽ

ദോഹ: ഈ വർഷം ഏപ്രിൽ- മേയ്​ മാസത്തിൽ ഔഖാഫ് ഇസ്​ലാമികകാര്യ മന്ത്രാലയത്തിന് കീഴിലുള്ള സകാത് ഫണ്ടിൽനിന്ന്​ വിവിധ മേഖലകളിലായി സഹായ ഇനത്തിൽ ചെലവഴിച്ചത് 3.09 കോടി ഖത്തർ റിയാൽ. മാസാന്ത സഹായം, സ്​കൂൾ പഠന ഫീസ്​, ചികിത്സ ചെലവ്, ഒറ്റത്തവണയുള്ള സഹായം, കടംകൊണ്ട് ബുദ്ധിമുട്ടുന്നവർക്ക്, ചാരിറ്റി ബാസ്​കറ്റ് തുടങ്ങിയവ ഉൾപ്പെടുന്നതാണ് സഹായധനം. പൂർണമായും ശരീഅത്ത് നിയമങ്ങൾക്കനുസൃതമായാണ് സർക്കാർ സംവിധാനമായ സകാത് ഫണ്ട് ശേഖരിക്കുന്നതും വിതരണം ചെയ്യുന്നതും. അർഹരായ കുടുംബങ്ങൾക്ക് സ്​ഥിരമായി നൽകിവരുന്ന ഇനത്തിൽ 1.88 കോടി ഖത്തർ റിയാലും ഒറ്റത്തവണയായി നൽകിയ ഇനത്തിൽ 1.21 കോടി ഖത്തർ റിയാലും കഴിഞ്ഞ രണ്ട് മാസങ്ങളിലായി സകാത് ഫണ്ടിൽനിന്ന്​ ചെലവഴിച്ചു.

രാജ്യത്തിനകത്തുള്ള 1896 കുടുംബങ്ങളാണ്​ ഗുണഭോക്​താക്കളായത്​. കോവിഡ് പശ്ചാത്തലത്തിൽ സകാത് ഫണ്ടിൽനിന്ന്​ സഹായത്തിനായുള്ള അപേക്ഷകളും നിലവിലെ സഹായം പുതുക്കുന്നതിനുള്ള അപേക്ഷകളും സകാത് ഫണ്ടി​െൻറ www.zf.org.qa/help വെബ് അഡ്രസ്​ വഴിയാണ് സമർപ്പിക്കേണ്ടത്.

കൂടാതെ സകാത് ഫണ്ടിലേക്ക് തങ്ങളുടെ സകാത് നൽകാൻ ഉദ്ദേശിക്കുന്നവർക്ക് ഓഫിസുകളിലോ കളക്​ഷൻ പോയൻറുകളിലോ നേരിട്ടെത്തി സകാത് നൽകുന്നതിന്​ പകരം www.zf.org.qa/donation എന്ന വെബ് അഡ്രസ്​ ഉപയോഗിച്ച് നൽകാം. തങ്ങളുടെ സകാത് വിഹിതം എത്രയുണ്ടെന്നും ലിങ്കിലൂടെ അറിയാനാകും. സകാത് ഫണ്ടി​െൻറ ഖത്തർ ഇസ്​ലാമിക് ബാങ്ക്, ഖത്തർ ഇൻറർനാഷനൽ ഇസ്​ലാമിക് ബാങ്ക്, അൽ റയ്യാൻ ബാങ്ക്, ദുഖാൻ ബാങ്ക് അക്കൗണ്ടുകൾ വഴിയും സകാത് നൽകാവുന്നതാണ്. ഖത്തർ ഇസ്​ലാമിക് ബാങ്കി​െൻറ എ.ടി.എം മെഷീൻ വഴിയും മൊബൈൽ ആപ് വഴിയും നൽകാം.

അതോടൊപ്പം സൽവാ റോഡിലെ പ്രധാന ഓഫിസ്​, മറ്റു ശാഖാ ഓഫിസുകൾ, കളക്​ഷൻ പോയൻറുകൾ എന്നിവിടങ്ങളിലും സ്വീകരിക്കും. കൂടുതൽ വിവരങ്ങൾക്ക് 55199996, 55199990 എന്നീ നമ്പറുകളിൽ ബന്ധപ്പെടാം.