ഖത്തറിന്​ രാജ്യാന്തര തലത്തിൽ അഭിനന്ദനം

ദോഹ: അഫ്​ഗാനിലെ രാഷ്​ട്രീയ പ്രതിസന്ധിക്ക്​ പരിഹാരം കാണാനും അഭയാർഥികൾക്ക്​ ഇടം ഒരുക്കാനും വിദേശ പൗരന്മാരുടെ സുരക്ഷിത ഒഴിപ്പിക്കലിന്​ വഴിയൊരുക്കാനും ഖത്തർ നടത്തുന്ന ഇടപെടലിന്​ രാജ്യാന്തര സമൂഹത്തിൻെറ അഭിനന്ദനം.

അഫ്​ഗാനിൽ നിന്നുള്ള അഭയാര്‍ഥികള്‍ക്ക് അഭയം നല്‍കിയ ഖത്തറിനെ ഐക്യരാഷ്​ട്രസഭ റെഫ്യൂജി വിഭാഗം മേധാവി ഫിലിപോ ഗ്രാന്‍ഡി ഫോണിലും ട്വിറ്ററിലും അഭിനന്ദിച്ചു. രാഷ്​ട്രീയ പ്രതിസന്ധി രൂക്ഷമാവുമ്പോഴും അഭയാര്‍ഥി പ്രശ്‌നങ്ങള്‍ അവഗണിക്കാന്‍ ഖത്തര്‍ മുതിര്‍ന്നില്ല.

മികച്ച മധ്യസ്ഥരെന്ന നിലയില്‍ അഫ്ഗാന്‍ സമാധാന ചര്‍ച്ചകള്‍ക്ക് ആതിഥേയത്വം വഹിക്കുകയും നിര്‍ധനരായ അഭയാര്‍ഥികളെ അല്‍ ഉദൈദ് സൈനിക താവളത്തില്‍ അഭയം നൽകാൻ വഴിയൊരുക്കുകയും ചെയ്​തതിനെ ഔദ്യോഗിക ട്വിറ്റര്‍ അക്കൗണ്ടിൽ ഗ്രാന്‍ഡി അഭിനന്ദിച്ചു. കഴിഞ്ഞ ദിവസം ഖത്തർ വിദേശകാര്യ മന്ത്രി ശൈഖ്​ മുഹമ്മദ്​ ബിൻ അബ്​ദുൽറഹ്​മാൻ ആൽഥാനിയെ ഫോണിൽ വിളിച്ചും അദ്ദേഹം നന്ദി അറിയിച്ചു. അഫ്​ഗാനിലെ സ്​ഥിതിഗതികൾ ഇരുവരും ചർച്ച ചെയ്​തു.

അമേരിക്കൻ വിദേശകാര്യ സെക്രട്ടറി ആൻറണി ബ്ലിങ്കനും ഐക്യരാഷ്​ട്രസഭ സെക്രട്ടറി ജനറൽ അ​േൻറാണിയോ ഗുട്ടറസും ഖത്തർ വിദേശകാര്യ മ​ന്ത്രിയെ വിളിച്ച്​ സംസാരിച്ചു. അഫ്​ഗാനിലെ നിലവിലെ രാഷ്​ട്രീയ സ്​ഥിതിഗതികൾ ചർച്ച ചെയ്​ത ബ്ലിങ്കൻ രാജ്യത്ത്​ സമാധാനം പുനഃസ്​ഥാപിക്കാൻ ഖത്തർ നടത്തുന്ന ശ്രമങ്ങൾക്ക്​ നന്ദി പറഞ്ഞു. അഫ്​ഗാനിൽ പൗരന്മാർക്ക്​ സുരക്ഷയും സ്വസ്​ഥതയും ഉറപ്പാക്കണമെന്നും സമാധാനപരമായ ഭരണകൈമാറ്റമുണ്ടാവണമെന്നും അദ്ദേഹം പറഞ്ഞു.

ഇന്തോനേഷ്യ വിദേശകാര്യ മന്ത്രി റെ​േൻറാ ലെസ്​റ്റാറി പ്രിയാൻസറി, ദക്ഷിണ കൊറിയ വിദേശകാര്യ മന്ത്രി ചുങ്​ ഇയു യോങ് എന്നിവരും ഖത്തർ വിദേശകാര്യ മന്ത്രിയുമായി ഫോണിൽ സ്​ഥിതി വിലയിരുത്തി.