സിദ്രയിൽ കോവിഡ്​ പരിശോധന ഓൺലൈൻ ബുക്കിങ്​ വഴി മാത്രം

ദോഹ: കോവിഡ്​ പരിശോധനക്ക്​ ഓൺലൈൻ രജിസ്​ട്രേഷൻ നിർബന്ധമാക്കി സിദ്ര മെഡിസിൻ. ഖത്തറിലെ നിലവിലെ കോവിഡ്​ സാഹചര്യങ്ങളുടെ അടിസ്ഥാനത്തിലാണ്​ പരിശോധനക്ക്​ വരുന്നവർക്കുള്ള​ രജിസ്​ട്രേഷൻ ഓൺലൈൻ വഴിയാക്കിയത്​. നേരിട്ട്​ വന്ന്​ രജിസ്റ്റർ ചെയ്യാനോ പരിശോധന നടത്താനോ കഴിയില്ലെന്ന്​ സിദ്ര മെഡിസിൻ അറിയിപ്പിൽ വ്യക്​തമാക്കി.

https://www.sidra.org/covid-19-pcr-and-antibody-testing എന്ന ലിങ്ക്​ വഴി പരിശോധനക്ക്​ രജിസ്റ്റർ ചെയ്യാവുന്നതാണ്​.

പരിശോധനക്ക്​ വരുന്നവർ കോവിഡ്​ പ്രോട്ടോകോൾ പാലിക്കണമെന്നും ജീവനക്കാരുടെ നിർദേശങ്ങൾ പാലിച്ച്​ മാന്യമായി പെരുമാറണമെന്നും അറിയിപ്പിൽ നിർദേശിക്കുന്നു. ഫലം ലഭിക്കുന്ന സമയ ദൈര്‍ഘ്യത്തിന് അനുസരിച്ച് മൂന്ന് വ്യത്യസ്ത നിരക്കുകളില്‍ സിദ്രയിൽ പി.സി.ആര്‍ പരിശോധനയുള്ളത്​.

160 റിയാൽ (18 മണിക്കൂറിനുള്ളിൽ ഫലം), 300 റിയാൽ (എട്ട്​ മണിക്കൂറിനുള്ളിൽ ഫലം. സാമ്പിൾ വൈകുന്നേരം ആറിന്​ മുമ്പ്​ നൽകണം), 660 റിയാൽ (മൂന്ന്​ മണിക്കൂറിനുള്ളിൽ ഫലം, സാമ്പിൾ രാത്രി 10ന്​ മുമ്പ്​ നൽകണം).

വ്യാഴാഴ്ച 542 കോവിഡ്​ കേസുകളാണ്​ ഖത്തറിൽ റിപ്പോർട്ട്​ ചെയ്തത്​. വർധിച്ചുവരുന്ന കോവിഡ്​ വ്യാപനത്തിന്‍റെ പശ്ചാത്തലത്തിലാണ്​ ​സിദ്രയിൽ നിയന്ത്രങ്ങൾ ഏർപ്പെടുത്തിയത്​. 380 പേർക്ക്​ സമ്പർക്കത്തിലൂടെയാണ്​ രോഗബാധ. ഒരു മരണവും വ്യാഴാഴ്ച സ്ഥിരീകരിച്ചു.