കോവിഡ്​ പ്രതിസന്ധി: നാട്ടിലേക്ക്​ മടങ്ങിയ പ്രവാസികളുടെ വിവരശേഖരണവുമായി കെ.എം.സി.സി

ദോഹ: കോവിഡ്​പ്രതിസന്ധിയിൽ വിവിധ പ്രതിസന്ധികളിലകപ്പെട്ട്​ നാട്ടിലേക്ക്​ മടങ്ങിയ പ്രവാസികളുടെ വിശദമായ കണക്കെടുപ്പിന്​ ഖത്തര്‍ കെ.എം.സി.സി ഒരുങ്ങുന്നു. ജോലി നഷ്​ടപ്പെട്ടും ബിസിനസ് തകര്‍ന്നും അനാരോഗ്യം കാരണവും നാട്ടിലേക്കു മടങ്ങേണ്ടിവന്ന പ്രവാസികളുമായി ബന്ധപ്പെട്ട വിവരങ്ങൾ സർക്കാർ അധികൃതരെ അറിയിക്കുന്നതിൻെറ ഭാഗമായാണ്​ ഇതെന്ന്​ ബന്ധപ്പെട്ടവർ അറിയിച്ചു.

വാര്‍ഡ്, പഞ്ചായത്ത്, മണ്ഡലം, ജില്ല അടിസ്ഥാനത്തിലാണ് ഈ കണക്കെടുപ്പ് നടത്തുക. കോവിഡിനു മുമ്പും കോവിഡ് കാലത്തും കൊവിഡിനു ശേഷവും കേരളത്തിലേക്ക് മടങ്ങിയ അല്ലെങ്കില്‍ മടങ്ങേണ്ടിവന്ന ആളുകളുടെ സ്ഥിതിവിവരങ്ങളാണ് ശേഖരിക്കുന്നത്.കെ.എം.സി.സി സംഘടന സംവിധാനം ഉപയോഗിച്ചും ബഹുജന പങ്കാളിത്തത്തോടെയും ഗൂഗിള്‍ ഫോറം വഴി വിവരങ്ങള്‍ ശേഖരിക്കാനാണ് ഉദ്ദേശിക്കുന്നത്. ഈ സര്‍വേ പൂര്‍ത്തിയായാല്‍ ലഭ്യമാകുന്ന വിവരങ്ങള്‍ പരിശോധിച്ച് വിവരങ്ങള്‍ തരംതിരിക്കാന്‍ വിദഗ്ധ സമിതി രൂപവത്​കരിക്കും.

ആ വിവരങ്ങളുടെ അടിസ്ഥാനത്തില്‍ മടങ്ങിവന്ന പ്രവാസികളുടെ പുനരധിവാസത്തിനായി സംസ്ഥാന–കേന്ദ്ര സര്‍ക്കാറുകള്‍ ആവിഷ്കരിച്ചിട്ടുള്ള വിവിധ പദ്ധതികളെക്കുറിച്ചുള്ള ബോധവത്​കരണവും ആനുകൂല്യങ്ങള്‍നേടിയെടുക്കേണ്ട മാര്‍ഗനിര്‍ദേശങ്ങള്‍ ലഭ്യമാക്കാനും വേണ്ടിയാണ് ഈ സര്‍വ്വേ നടത്തുന്നത്.അതോടൊപ്പം, വിവിധ രാജ്യങ്ങളില്‍ പുനർ ജോലി വിന്യാസത്തിനുള്ള സാധ്യതകളും അവസരങ്ങളും കെ.എം.സി.സി വെബ്സൈറ്റ് വഴിയും ജോബ് പോര്‍ട്ടല്‍ വഴിയും പരമാവധി പരിചയപ്പെടുത്തും.

എന്നാല്‍, പുനരധിവാസത്തിനോ പുനർ ജോലി വിന്യാസത്തിനോ ഉള്ള ഉത്തരവാദിത്തം ഒരു കാരണവശാലും ഖത്തര്‍ കെ.എം.സി.സി ഈ സര്‍വ്വേയിലൂടെ ഏറ്റെടുക്കുന്നതല്ല. ഇത്തരത്തിലുള്ള ആളുകൾക്ക്​ ജോലിസംബന്ധമായ വിവരങ്ങൾ കൈമാറുകയാണ്​ ലക്ഷ്യമിടുന്നത്​. പൂര്‍ണമായും സൗജന്യമായാണ്​ സര്‍വേ നടത്തുക.

സ്ഥിതി വിവരണക്കണക്കിലൂടെ വിവിധ സര്‍ക്കാര്‍ ഏജന്‍സികളുടെ ശ്രദ്ധ ക്ഷണിക്കാനും ബോധവത്​കരണം നടത്താനും മാത്രം ഉദ്ദേശിച്ചു കൊണ്ടുള്ളതാണ് സർവേയെന്ന്​ ഭാരവാഹികള്‍ വ്യക്തമാക്കി.www.kmccqatar.com/registration എന്ന ഗൂഗിൾ ഫോമിലാണ് വിവരങ്ങൾ നൽകേണ്ടത്. ഏതു രാജ്യത്തുനിന്ന് മടങ്ങിപ്പോയവർക്കും സർവേയിൽ പങ്കെടുക്കാം.