കോവിഡ്​: നാടി​നെയോർത്ത്​ വേവലാതി വേണ്ട, ഞങ്ങളുണ്ടെന്ന്​ അധികൃതർ

ദോഹ: കൊടിയത്തൂർ ഏരിയ സർവിസ് ഫോറത്തി​െൻറ നേതൃത്വത്തിൽ കൊടിയത്തൂർ പഞ്ചായത്ത്​ ജനപ്രതിനിധികളുമായി ആശയവിനിമയം നടത്തി. നാട്ടിലെ നിലവിലെ സാഹചര്യത്തിൽ പ്രവാസികൾക്കുണ്ടാകുന്ന ആശങ്കകൾ ദൂരീകരിക്കാനും നിജസ്ഥിതികൾ വിവരിക്കാനുമായി സൂമിലൂടെയായിരുന്നു പരിപാടി. പഞ്ചായത്ത്​ പ്രസിഡൻറ്​ ഷംലൂലത്ത്, വാർഡ് അംഗങ്ങളായ ടി.കെ. അബൂബക്കർ മാസ്​റ്റർ, ഫസൽ കൊടിയത്തൂർ എന്നിവർ പങ്കെടുത്തു. നിദാൽ അബ്​ദുൽ അസീസ്​ ഖിറാഅത്ത്​ നടത്തി. ഫോറം ജനറൽ സെക്രട്ടറി അമീൻ കൊടിയത്തൂർ സ്വാഗതം പറഞ്ഞു. പ്രസിഡൻറ്​ അബ്​ദുൽ അസീസ് പുതിയൊട്ടിൽ അധ്യക്ഷത വഹിച്ചു. സെക്രട്ടറി അമീർ അലി റിപ്പോർട്ട് അവതരിപ്പിച്ചു. കോവിഡ്​ മഹാമാരിക്കെതിരെ പോരാടുന്നവർക്ക് ഐക്യദാർഢ്യം പ്രകടിപ്പിച്ചു.

പഞ്ചായത്തിൽ കൂടുതൽ പോസിറ്റിവ് കേസുകൾ റിപ്പോർട്ട് ചെയ്തെങ്കിലും എല്ലാവരും ചേർന്നുള്ള നിരന്തര പ്രയത്നത്തിലൂടെ കേസുകൾ കുറച്ചുകൊണ്ടു വരുന്നതിന് കാര്യക്ഷമമായി ശ്രമിക്കുന്നതായി പ്രസിഡൻറ്​ അറിയിച്ചു. പ്രവാസികൾ അനാവശ്യമായി ആശങ്കപ്പെടേണ്ടതില്ല. സർക്കാർ തലത്തിൽ സാധ്യമായ കാര്യങ്ങളെല്ലാം ചെയ്യുന്നുണ്ട്.

ജില്ല തലത്തിൽ നോട്ട് മാപ് ചാർട്ടിൽ കൊടിയത്തൂർ മുന്നിലാണ്​. കോവിഡ് നിയന്ത്രണവും രോഗീ പരിചരണവും വാർഡ് തലത്തിൽ കാര്യക്ഷമമായി നടക്കുന്നുണ്ട്​. പഞ്ചായത്തിലെ മെഡിക്കൽ പ്രവർത്തനങ്ങൾക്ക്​ നേതൃത്വമേകുന്ന ഡോക്ടർ മനുലി​െൻറ പ്രവർത്തനങ്ങളെയും ആർ.ആർ.ടി പ്രവർത്തകരെയും പൊലീസ്, ആരോഗ്യ പ്രവർത്തകർ, രാഷ്​ട്രീയ പ്രവർത്തകർ, അധ്യാപകർ അടക്കമുള്ളവരെയും യോഗം അഭിനന്ദിച്ചു. ഫോറത്തി​െൻറ നേതൃത്വത്തിൽ നാട്ടിൽ നടത്തുന്ന കാരുണ്യ പ്രവർത്തനങ്ങൾ സ്തുത്യർഹമാണെന്ന് പഞ്ചായത്ത്​ പ്രസിഡൻറ്​ പറഞ്ഞു. ഡൊമിസിലിയറി സെൻററുകൾക്ക് ആവശ്യമായ സാധനകളുടെ ലിസ്​റ്റ്​ പ്രസിദ്ധീകരിച്ച ഉടൻ തന്നെ പ്രവാസികൾ പഞ്ചായത്തുമായി ബന്ധപ്പെടുകയും എല്ലാ വിധ സഹായങ്ങളും വാഗ്​ദാനം നൽകുകയുമുണ്ടായി. ആദ്യ പടിയായി ഓക്സി മീറ്ററുകൾ സംഭാവന നൽകി.

ഖത്തർ സർക്കാർ സ്വദേശി വിദേശി പരിഗണയില്ലാതെ നൽകി വരുന്ന അന്താരാഷ്​ട്ര നിലവാരത്തിലുള്ള കോവിഡ് കെയർ പ്രവർത്തനങ്ങൾ സംബന്ധിച്ച്​ ഹമദ് മെഡിക്കൽ കോർപറേഷൻ ജീവനക്കാരൻ യാസീൻ അബ്​ദുല്ല വിശദീകരിച്ചു.

പ്രവാസികൾക്കും കൂടി നിക്ഷേപ അവസരമുള്ള നല്ല പദ്ധതികൾ സമർപ്പിച്ചാൽ പരിഗണിച്ചു വേണ്ട സഹായങ്ങൾ നൽകാമെന്ന് പഞ്ചായത്ത് ഭാരവാഹികൾ പറഞ്ഞു. കാവിൽ അബ്​ദുറഹിമാൻ, ഇ.എ. നാസർ, സി.കെ. റഫീഖ്, ടി.ടി. അബ്​ദുല്ലാഹി, ടി.കെ. ഫിൽസർ തുടങ്ങിയവർ ചർച്ചയിൽ പങ്കെടുത്തു.

ബാക്കിർ, ടി. ഫാസില, പി.പി.സി. ഷിഹാബുദ്ദീൻ എന്നിവരെ ഇലക്​ഷൻ പ്രവചനമത്സര വിജയികളായും സീനത്ത് മുജീബ്, ആഷിഖ് അലി, പി.പി.സി അബ്​ദുൽ സലാം എന്നിവരെ പ്രോത്സാഹന സമ്മാന ജേതാക്കളായും വൈസ് പ്രസിഡൻറ്​ വി.വി. ഷഫീഖ് പ്രഖ്യാപിച്ചു. സെക്രട്ടറി ഇല്യാസ് നന്ദി പറഞ്ഞു.