ഇൗത്തപ്പഴ ഫെസ്​റ്റ്​ അടുത്തയാഴ്​ച

ദോഹ: ഖത്തർ കാത്തിരിക്കുന്ന ഈത്തപ്പഴ ഫെസ്​റ്റിന്​ വ്യാഴാഴ്​ച തുടക്കമാവും. നേരത്തേ ശനിയാഴ്​ച തുടങ്ങുമെന്നറിയിച്ച ഫെസ്​റ്റ്​ അടുത്ത വ്യാഴാഴ്​ചയിലേക്ക്​ മാറ്റിയതായി അറബ്​ പത്രം റിപ്പോർട്ട്​ ചെയ്​തു. പ്രാദേശിക തോട്ടങ്ങളിൽനിന്നും വിളവെടുത്ത ഇൗത്തപ്പഴങ്ങളുടെ വൈവിധ്യവുമായാണ്​ രാജ്യത്തെ പ്രശസ്​തമായ ഇൗത്തപ്പഴ ഫെസ്​റ്റിന് സൂഖ്​ വകിഫിൽ​ തുടക്കം കുറിക്കുന്നത്​.

​രണ്ടാഴ്​ച നീളുന്ന ഫെസ്​റ്റിൽ 80ഓളം ഇൗത്തപ്പഴ കർഷകർ തങ്ങളുടെ വിഭവങ്ങളുമായെത്തും. വൈകീട്ട്​ നാലു​ മുതൽ 10വരെയാണ്​ സന്ദർശകർക്ക്​ പ്രവേശനം. പ്രാദേശിക കർഷകരെയും ഫാമുകളെയും പിന്തുണക്കാൻ ലക്ഷ്യമിട്ട്​ സംഘടിപ്പിക്കുന്ന ഫ്രഷ്​ ലോക്കൽ ഡേറ്റ്​സ്​ ഫെസ്​റ്റിവലിൻെറ ആറാം സീസണിനാണ്​ തുടക്കമാവുന്നത്​. കഴിഞ്ഞ സീസൺ ഫെസ്​റ്റ്​ കോവിഡ്​ കാരണം മുടങ്ങിയതിനാൽ ഇക്കുറി കൂടുതൽ വിപുലമായാണ്​ സംഘടിപ്പിക്കുന്നത്​.

രാജ്യത്തെ വിവിധതരം ഈത്തപ്പഴങ്ങളുടെ പ്രദർശനവും വിൽപനയും ഉണ്ടായിരിക്കും. ഫെസ്​റ്റിന്​ മുന്നോടിയായ പ്രദർശനത്തിനെത്തുന്ന ഈത്തപ്പഴങ്ങളുടെ സാമ്പ്​ൾ ശേഖരിച്ച്​ ആരോഗ്യ മന്ത്രാലയത്തിനു കീഴിലെ ലബോറട്ടറികളിൽ പരിശോധന നടത്തും. കീടനാശിനികളുടെ അംശം ഇല്ലെന്ന്​ ഉറപ്പുവരുത്താനാണിത്​.