ദോഹയും റയ്യാനും ആരോഗ്യ നഗരങ്ങൾ

ദോഹ: ആരോഗ്യ മേഖലയിൽ മികച്ച മുന്നേറ്റം കുറിക്കുന്ന ഖത്തറിന്​ ലോകാരോഗ്യ സംഘടനയുടെ അംഗീകാരം.

ഏറ്റവും മികച്ച ആരോഗ്യ നിലവാരം പുലർത്തുന്നതിനുള്ള ഹെൽത്തി സിറ്റി പുരസ്കാരങ്ങൾക്ക്​ ദോഹ, അൽ റയ്യാൻ മുനിസിപ്പാലിറ്റികൾ അർഹരാ​യപ്പോൾ, ഹെൽത്തി എജുക്കേഷൻ സിറ്റിയെന്ന അംഗീകാരം ഖത്തർ ഫൗണ്ടേഷന്‍റെ വിദ്യാഭ്യാസ ആസ്ഥാനമായ എജുക്കേഷൻ സിറ്റിയെ തേടിയെത്തി.

ഖത്തർ ആരോഗ്യ മന്ത്രാലയവും, മുനിസിപ്പാലിറ്റി മന്ത്രാലയവും സംയുക്തമായി മുശൈരിബ്​ ഡൗൺ ടൗണിൽ നടന്ന ​പ്രൗഢഗംഭീരമായ ചടങ്ങിൽ പുരസ്കാരങ്ങൾ ഏറ്റുവാങ്ങി. പ്രധാനമന്ത്രിയും ആഭ്യന്തരമന്ത്രിയുമായ ശൈഖ്​ ഖാലിദ്​ ബിൻ ഖലീഫ ബിൻ അബ്​ദുൽ അസീസ്​ ആൽഥാനി​ പ​ങ്കെടുത്ത ചടങ്ങിൽ രാജ്യത്തിനുള്ള ലോകാരോഗ്യ സംഘടനയുടെ ആദരവ്​ ബന്ധപ്പെട്ടവർ ഏറ്റുവാങ്ങി.

ഖത്തർ ഫൗണ്ടേഷൻ സി.ഇ.ഒയും വൈസ്​ചെയർപേഴ്​സനുമായ ശൈഖ ഹിന്ദ്​​ ബിൻത്​ ഹമദ്​ ആൽഥാനി, പൊതുജനാരോഗ്യ മന്ത്രി ഡോ. ഹനാൻ മുഹമ്മദ്​ അൽ കുവാരി, മുനിസിപ്പാലിറ്റി മന്ത്രി അബ്​ദുല്ല ബിൻ അബ്​ദുൽ അസീസ്​ ബിൻ തുർകി അൽ സുബൈഈ, ലോകാരോഗ്യ സംഘടന ഈസ്​റ്റേൺ മെഡിറ്ററേനിയൻ റീജനൽ ഡയറക്ടർ ഡോ. അഹമ്മദ്​ അൽ മന്ദാരി, പൊതുജനാരോഗ്യ മ​ന്ത്രാലയം, മുനിസിപ്പാലിറ്റി മന്ത്രാലയം, ഖത്തർ ഫൗണ്ടേഷൻ, ലോകാരോഗ്യ സംഘടന എന്നിവിടങ്ങളിൽ നിന്നുള്ള ഉദ്യോഗസ്ഥരും പ​ങ്കെടുത്തു.

ആരോഗ്യ മേഖലകളിൽ നടപ്പാക്കിയ വിവിധ പദ്ധതികൾ പരിഗണിച്ചാണ്​ പുരസ്കാരം നൽകിയത്​. ഹെൽത്തി സിറ്റി പദ്ധതി പ്രകാരം, ജനങ്ങളുടെ ആരോഗ്യ ക്ഷേമം, പൊതുജനങ്ങൾക്കിടയിലെ ശാക്തീകരണം, കൃത്യമായ നയരൂപവത്​കരണത്തിലൂടെ രോഗപ്രതിരോധ പ്രവർത്തനങ്ങൾ, സമൂഹത്തിലെ എല്ലാ വിഭാഗം ജനങ്ങളുടെയും സഹകരണവും പങ്കാളിത്തവും ഉറപ്പാക്കൽ തുടങ്ങിയ വിവിധ ദൗത്യങ്ങളാണ്​ ഉൾപ്പെടുന്നത്​.

ഖത്തർ ഫൗണ്ടേഷനു കീഴിലെ എജുക്കേഷൻസിറ്റിക്കു കീഴിൽ സർവകലാശാലകൾ, വിദ്യാർഥികൾ, ജീവനക്കാർ, താമസക്കാർ തുടങ്ങി എല്ലാ വിഭാഗം ആളുകളിലേക്കും​ ആരോഗ്യ സുരക്ഷ അവബോധവും പരിപാലനവും ആരോഗ്യ ക്ഷേമ പ്രവർത്തനങ്ങളും എത്തിക്കാൻ കഴിഞ്ഞു. അതിനുള്ള അംഗീകാരമായാണ്​ ഹെൽത്തി എജുക്കേഷൻ സിറ്റി പുരസ്കാരം.

നഗരങ്ങളിലും സമൂഹങ്ങൾക്കിടയിലും പൊതുജനങ്ങളുടെ ആരോഗ്യവും ക്ഷേമവും മെച്ചപ്പെടുത്തുന്നതിന് ഖത്തർ ഫൗണ്ടേഷൻ ഉൾപ്പെടെ നിരവധി വിഭാഗങ്ങളുടെ പ്രതിബദ്ധതയും പ്രവർത്തനവും ആവശ്യമാണെന്ന്​ ​ശൈഖ ഹിന്ദ്​ പറഞ്ഞു.

രാജ്യത്തെ രണ്ട്​ മുനിസിപ്പാലിറ്റികൾക്ക്​ ലോ​കാരോഗ്യ സംഘടനയുടെ 'ഹെൽത്തി സിറ്റി' പുരസ്കാരം ലഭിക്കുന്നത്​ സഹകരിച്ചുള്ള പ്രവർത്തനങ്ങൾക്ക്​ നിർണായകമാണെന്നും അവർ പറഞ്ഞു.

ദേശീയ വിഷന്‍ 2030 എന്ന പദ്ധതിയുടെ ഭാഗമായി കൂടുതല്‍ പരിഷ്‌കരണങ്ങള്‍ ആരോഗ്യരംഗത്ത് വരുത്തുമെന്ന് ആരോഗ്യമന്ത്രി ഡോ. ഹനാൻ മുഹമ്മദ്​ അല്‍ കുവാരി അറിയിച്ചു.

ഖത്തറിലെ എട്ട് മുനിസിപ്പാലിറ്റികളെയും 'ഹെല്‍ത്തി സിറ്റി' നിലവാരത്തിലേക്ക്​ ഉയർത്തുകയാണ്​ ലക്ഷ്യമെന്നും അവർ പറഞ്ഞു