അമീർ കപ്പടിച്ച്​ ദുഹൈൽ

ദോഹ: 30,000ത്തോളം പേർ തിങ്ങിനിറഞ്ഞ ഗാലറിയും രാഷ്ട്ര നായകൻ അമീർ ശൈഖ്​ തമീം ബിൻ ഹമദ്​ ആൽഥാനിയും ഫിഫ അധ്യക്ഷൻ ജിയാനി ഇൻഫന്‍റിനോയും സാക്ഷിയായ കളിമുറ്റത്ത്​ നിന്നും 50ാമത്​ അമീർ കപ്പിൽ ദുഹൈൽ എഫ്​.സിയുടെ മുത്തം.

ആവേശകരമായ ഫൈനലിൽ ആദ്യ മിനിറ്റ്​ മുതൽ കളിയുടെ മേധാവിത്വം സ്വന്തമാക്കി ദുഹൈൽ എഫ്​.സി തുടർച്ചയായ ഗോളുകളിലുടെ ഗറാഫയുടെ കിരീടസ്വപ്നങ്ങൾക്ക്​ ബ്രേക്കിട്ടു. തീർത്തും ഏകപക്ഷീയമായ അങ്കത്തിൽ 5-1നായിരുന്നു കിരീട വിജയം. ദുഹൈൽ എഫ്​.സിയുടെ നാലാം അമീർ കപ്പ്​ വിജയം കൂടിയാണിത്​.

ദുഹൈൽ ഷോ

കളിയുടെ അഞ്ചാം മിനിറ്റിൽ എഡ്​മിൽസൺ ജൂനിയറിലൂടെയാണ്​ ദുഹൈലിന്‍റെ ഗോൾവേട്ടക്ക്​ തുടക്കമിടുന്നത്​. ഓഫ്​സൈഡെന്ന്​ തോന്നിയ ലോങ്​ ക്രോസിനെ മനോഹരമായി കാലിൽ കുരുക്കിയായിരുന്നു എഡ്​മിൽസൺ ആദ്യ ഗോൾ കുറിച്ചത്​. ആദ്യ ഗോളിന്​ സമാനമായി തന്നെ മറ്റൊരു ലോങ്​ ക്രോസ്​ 18ാം മിനിറ്റിൽ രണ്ടാം ഗോളായി പിറന്നു.

കണക്ട്​ ചെയ്ത്​ ​പന്തു വാങ്ങിയ മൈകൽ ഒലുങ്കയായിരുന്നു ഗറാഫ ഗോൾ കീപ്പറുടെ ഇടപടലിനും മുമ്പേ വലകുലുക്കിയത്​. തുടക്കത്തിലേറ്റ ഇരട്ട പ്രഹരത്തിൽ വിറച്ച ഗറാഫ പിന്നീട്​ ഗോൾ വഴങ്ങാതെ ആദ്യ പകുതി പിടിച്ചു നിന്നു. ദേശീയ ടീം അംഗം ഹുമാം അഹദും അഹമ്മദ്​ അലാൽദിനുമൊന്നും ഇരു വിങ്ങുകളിലുടെയും ശ്രമിച്ചിട്ടും ആക്രമിച്ചു കയറിയ ദുഹൈലിന്​ മുന്നിൽ പിടിച്ചു നിൽക്കാനായില്ല. ആദ്യ പകുതി പിരിയുമ്പോൾ 2-0തന്നെയായിരുന്നു സ്​കോർ.

രണ്ടാം പകുതിയിൽ ഖത്തറിന്‍റെ സൂപ്പർ ​താരം അൽ മുഈസ്​ അലിയിലുടെ ദുഹൈൽ ഗോളെണ്ണം വീണ്ടും കൂട്ടി. 52ാം മിനിറ്റിൽ ​എഡ്​മിൽസണും ടോബി ആൽവീൽഡും നൽകിയ ടച്ചിൽ നിന്നും മുഈസ്​ അലി മനോഹരമായി വലകുലുക്കി ഗറാഫയുടെ പോരാട്ട വീര്യ​ങ്ങളെല്ലാം തച്ചുടച്ചു. തൊട്ടടുത്ത മിനിറ്റിൽ ദുഹൈലിന്‍റെ പ്രതിരോധത്തിലെ വീഴ്ചക്കിടെ, കൂട്ടയാക്രമണത്തിൽ ഗറാഫ ആശ്വാസ ഗോൾ കുറിച്ചു. സുഫിയാൻ ഹനി നൽകി ബാക്ഹീൽ പാസിൽ നിന്നും അഹമദ്​ അലാൽദിനായിരുന്നു സ്​കോർ. പക്ഷേ, പിന്നെയും ദുഹൈൽ ഗോളടി തുടർന്നു.

58ാം മിനിറ്റിൽ എഡ്​മിൽസൺ ബോക്സിനുള്ളിൽ നിന്നും നൽകിയ പാസിൽ ഫെർജാനി സാസി നാലാമത്തെ ഗോൾ കുറിച്ചു. 85ാം മിനിറ്റിൽ അതിവേഗ റണ്ണപ്പിലൂടെ പന്ത്​ വലയിലാക്കി അബ്​ദുൽറഹ്​മാൻ ഫഹ്​മി പട്ടിക തികച്ച്​ തങ്ങളുടെ കിരീടം ഉറപ്പാക്കി.