ആരോഗ്യ വിഭാഗത്തിന്​ ആശ്വാസത്തിന്റെ ഈദ്;​ അപകടങ്ങളും അത്യാഹിതങ്ങളും കുറഞ്ഞു

ദോഹ: ഈദ്​ അവധിയുടെ തിരക്കേറിയ ദിവസങ്ങൾ അവസാനിക്കുമ്പോൾ ആശ്വാസത്തോടെ ഹമദ്​ മെഡിക്കൽ കോർപറേഷൻ എമർജൻസി വിഭാഗവും ആംബുലൻസ്​ സർവിസ്​ വിഭാഗവും. പെരുന്നാളിന്റെ പ്രധാന അവധി ദിനങ്ങൾ അവസാനിച്ച്​, സ്വകാര്യ മേഖലകളിലെ ഓഫിസുകൾ ബുധൻ, വ്യാഴം ദിവസങ്ങളിൽതന്നെ സജീവമായിരുന്നു.

പ്രധാന കേന്ദ്രങ്ങളിലെ വിനോദ പരിപാടികളും അവസാനിച്ചു. എന്നാൽ, മുൻ വർഷങ്ങളെ അപേക്ഷിച്ച്​ അവധിക്കാലത്തെ അപകടങ്ങളും ആശുപത്രികളിലെ എമർജൻസി അന്വേഷണങ്ങളും കുറഞ്ഞതായി ഹമദ്​ മെഡിക്കൽ കോർപറേഷൻ അധികൃതർ അറിയിച്ചു.

ഈദ്​ അവധി ദിനങ്ങളിൽ ആംബുലൻസ്​ സേവനങ്ങൾ ആവശ്യപ്പെട്ടുകൊണ്ടുള്ള നോൺ എമർജൻസി വിളികൾ കുറഞ്ഞതായി എച്ച്​.എം.സി ആംബുലൻസ്​ സർവിസ്​ അസി. എക്​സിക്യൂട്ടിവ്​ ഡയറക്​ടർ അലി ദാർവിഷ്​ പറഞ്ഞു. ‘വേർ ഫോർ യുവർ കെയർ’ എന്ന പേരിൽ ദേശീയതലത്തിൽ നടന്ന കാമ്പയിന്റെ ഫലമായി അടിയന്തരമല്ലാത്ത ആവശ്യങ്ങൾക്കുള്ള ആംബുലൻസ്​ കാൾ കുറഞ്ഞതായാണ്​ വിലയിരുത്തൽ. പൊതുജനങ്ങളെ എമർജൻസി മെഡിക്കൽ കണ്ടീഷൻ സംബന്ധിച്ച്​ ബോധവത്കരിച്ചതിന്റെ ഫലംകൂടിയാണ്​ ഇതിൽ പ്രകടമാവുന്നത്​.

പെരുന്നാളിലെ ആദ്യ മൂന്നു ദിവസങ്ങളിൽ 971 സർവിസ്​ കാളുകളാണ് ആംബുലൻസ്​ വിഭാഗത്തിലെത്തിയത്​. 2024 ചെറിയ പെരുന്നാളിന്റെ മൂന്നു​ ദിനങ്ങളിൽ ഇത്​ 2846 കാളുകളായിരുന്നു. നിരന്തരമായ ബോധവത്കരണത്തിലൂടെ 65 ശതമാനം വരെ കുറക്കാൻ കഴിഞ്ഞു.

അനാവശ്യമായ ​കാളുകൾ കുറയുന്നതിലൂടെ ജീവൻ അപകടത്തിലുള്ള എമർജൻസി കേസുകളിൽ കൃത്യമായ ആംബുലൻസ്​ മെഡിക്കൽ സേവനം എത്തിക്കാൻ വഴിയൊരുക്കുന്നതാണ്​. കഴിഞ്ഞ വർഷം 13 തവണയാണ്​ എയർ ആംബുലൻസ്​ സർവിസ്​ ഉപയോഗിക്കേണ്ടി വന്നതെങ്കിൽ ഇത്തവണ ആറായി കുറഞ്ഞു.

വിവിധ ഭാഗങ്ങളിൽ 65 സ്റ്റേഷനുകളിലായി 120ഓളം ആംബുലൻസുകളാണ്​ അടിയന്തര മെഡിക്കൽ സാഹചര്യം നേരിടാനായി സജ്ജമാക്കിയത്​. സൂപ്പർവൈസർ, പാരാമെഡിക്​സ്​ ഉൾപ്പെടെ വിവിധ സംവിധാനങ്ങളോടെയാണ്​ ആംബുലൻസുകൾ ഒരുക്കിയത്​. നഗര പ്രദേശങ്ങൾക്കും ആഘോഷ കേന്ദ്രങ്ങൾക്കും പുറമെ, ഡ്യൂൺ ഏരിയകളിലും ആംബുലൻസ്​ സേവനം ഉറപ്പാക്കി. സീലൈൻ, ഖോർ അൽ ഉദൈദ്​ ഉൾപ്പെടെ പ്രദേശങ്ങളിൽ എയർ ആംബുലൻസും ഏർപ്പെടുത്തിയിരുന്നു.

അവധി ദിനങ്ങളിൽ ആശുപത്രിയിലെത്തിയ കേസുകളുടെ എണ്ണത്തിലും മുൻ വർഷ​ത്തേക്കാൾ കാര്യമായ കുറവുണ്ടായതായി അധികൃതർ അറിയിച്ചു. മൂന്നു​ ദിനങ്ങളിലായി 1926 എമർജൻസി കേസുകളാണ്​ എച്ച്​.എം.സിയിലെത്തിയത്​. ഇവയിൽ ഏറെയും നിസ്സാരമായ ആരോഗ്യ കേസുകളായിരുന്നു.

ചെറുതും വലുതുമായി 119 അപകട കേസുകളും റിപ്പോർട്ട്​ ചെയ്​തു. 22 കാർ അപകട കേസുകൾ ഉൾപ്പെടെയാണിത്​. മുൻ വർഷങ്ങളേക്കാൾ കേസുകളുടെ എണ്ണം കുറഞ്ഞതായി ആക്​സിഡന്റ് ആൻഡ്​ എമർജൻസി വിഭാഗത്തിലെ ​ഡോ. ആയിഷ അൽ സദ അറിയിച്ചു.