ഫിഫ ലോകകപ്പ്​ ടിക്കറ്റ്​ ബുക്കിങ്ങിന്​ ആവേശ പ്രതികരണം; കുറഞ്ഞ ടിക്കറ്റ്​ നിരക്കുമായി സംഘാടകർ

​​ദോഹ: മെസ്സിയും നെയ്മറും ​എംബാപ്പെയുമെല്ലാം പന്തുതട്ടാൻ ഇനിയും 10 മാസം കാത്തിരിപ്പുണ്ട്​. അതിന്​ മുമ്പ്​, ഇത്​ കാണികളുടെ സമയമാണ്​. ജീവിതത്തിൽ ഒരിക്കലെങ്കിലും ഫിഫ ലോകകപ്പ്​ ഗാലറിയിലിരുന്ന്​ ആസ്വദിച്ച്​ കാണാൻ കൊതിക്കുന്നവർക്ക്​ ബുക്ക്​ ചെയ്ത്​ സീറ്റുറപ്പിക്കാനുള്ള സമയം. ലോകകപ്പി‍െൻറ ആദ്യഘട്ട ടിക്കറ്റ്​ വിൽപന ബുധനാഴ്ച ആരംഭിച്ചപ്പോൾ അത്​ഭുതകരമായ പ്രതികരണമായിരുന്നു ആരാധകരിൽനിന്നുമുണ്ടായത്​. ബുധനാഴ്ച രാവിലെ ഫിഫ ഔദ്യോഗികമായി ടിക്കറ്റ്​ ബുക്കിങ്​ പ്രഖ്യാപിച്ചതോടെ ഒരുമണിയാവാനുള്ള കാത്തിരിപ്പായി. ശേഷം, കണ്ടത്​ ബുക്കിങ്ങിനുള്ള തിരക്കുകൾ. കൃത്യസമയത്തുതന്നെ ഫിഫ ഔദ്യോഗിക വെബ്​സൈറ്റുകളിൽ 'ക്യൂ' തുടങ്ങി. ഖത്തറിലെയും ലോകമെങ്ങുമുള്ള ഫുട്​ബാൾ ആരാധകരും ടിക്കറ്റ്​ ബുക്കിങ്ങിനായുള്ള അന്വേഷണങ്ങളിലും പരതലിലുമായി കഴിഞ്ഞ ദിവസത്തെ പകലുകൾ.

ഖത്തറി‍െൻറയും മേഖലയുടെയും ലോകമെങ്ങുമുള്ള കാൽപന്ത്​ പ്രേമികളുടെയും ലോകകപ്പായിരിക്കും വരാനിരിക്കുന്നതെന്ന്​ ടിക്കറ്റ്​ ബുക്കിങ്​ പ്രഖ്യാപിച്ചുകൊണ്ട്​ ഫിഫ സെക്രട്ടറി ജനറൽ ഫാത്​മ സമൂറ പറഞ്ഞു. ലോകമെങ്ങുമുള്ള കളിയാരാധകർക്ക്​ ഏറ്റവും മികച്ച ഫുട്​ബാൾ നിമിഷങ്ങൾ ലഭ്യമാക്കുകയാണ്​ ടിക്കറ്റ്​ വിൽപനയിലൂടെ പ്രതിഫലിക്കുന്നതെന്ന്​ അവർ പറഞ്ഞു. ചരിത്രത്തിലെ ഏറ്റവും മികച്ച ലോകകപ്പിനായി കളിയാരാധകരെ ഖത്തർ സ്വാഗതം ചെയ്യുകയാണെന്ന്​ സംഘാടരായ സുപ്രീം കമ്മിറ്റി ഫോർ ഡെലിവറി ആൻഡ്​​ ലെഗസി സി.ഇ.ഒ നാസിർ അൽ കാതിർ പറഞ്ഞു. ഖത്തറി‍െൻറ സംസ്കാരവും പാരമ്പര്യവും അനുഭവിച്ചറിയാനും പശ്ചിമേഷ്യയുടെ ഫുട്​ബാൾ ആവേശം ഉൾക്കൊള്ളാനുമുള്ള അവസരമാണിത്​ -നാസർ അൽ കാതിർ പറഞ്ഞു.

ധിറുതിവേണ്ട, ഫെബ്രുവരി എട്ടുവരെ സമയമുണ്ട്​

ബൂക്ക്​ ചെയ്യാൻ ഇപ്പോൾ തിക്കും തിരക്കും കൂട്ടേണ്ടതില്ല. ബുധനാഴ്ച ആരംഭിച്ച ആദ്യഘട്ട ബുക്കിങ്​ സൗകര്യം ഫെബ്രുവരി എട്ട്​ ​ഉച്ച ഒന്നുവരെ നീണ്ടുനിൽക്കും. ഈ സമയത്തിനുള്ളിൽ എപ്പോൾ ബുക്​ ചെയ്താലും ഒരേ പരിഗണനതന്നെയാവും എല്ലാവർക്കും. ലോകകപ്പിലെ ഫൈനൽ ഉൾപ്പെടെ 64 മത്സരങ്ങൾക്കായി നീക്കിവെച്ച 30 ലക്ഷം ടിക്കറ്റുകളിൽ 10 ലക്ഷം ടിക്കറ്റുകളാണ്​ ആദ്യ ഘട്ടത്തിൽ കാണികൾക്ക്​ ലഭ്യമാവുക.

ബുക്കിങ്ങി‍െൻറ അടിസ്ഥാനത്തിൽ, മാർച്ച്​ എട്ട്​ മുതൽ റാൻഡം നറുക്കെടുപ്പിലൂടെ ടിക്കറ്റിന്​ അവകാശികളെ തിരഞ്ഞെടുക്കുകയും അവരെ ഇ-മെയിൽ വഴി അറിയിക്കുകയും ചെയ്യുന്നതാണ്​ രീതി. തുടർന്ന്​ പേമെന്‍റ്​ പ്ലാറ്റ്​ഫോം വഴി നിശ്ചിത തുക അടച്ച്​ ടിക്കറ്റ്​ ഉറപ്പിക്കാം. ഖത്തർ റെസിഡന്‍റിന്​ ബാങ്കുകളുടെ വിസ കാർഡ്​ വഴി മാത്രമാവും പണം അടക്കാൻ കഴിയുക. ഖത്തറിന്​ പുറത്തുനിന്ന്​ ടിക്കറ്റ്​ ബുക്ക്​ ചെയ്യുന്നവർക്ക്​ വിസ കാർഡിന്​ പുറമെ മറ്റ്​ പേമെന്‍റ്​ കാർഡുകൾ വഴിയും പണമടക്കാവുന്നതാണ്​.

ബുക്കിങ്​ മൂന്ന്​ വിഭാഗം

വ്യക്​തിഗത മാച്ച്​ ടിക്കറ്റ്​, ടീം സ്​പെസിഫിക്​ ടിക്കറ്റ്​ സീരീസ്​, ഫോർ സ്​റ്റേഡിയം ടിക്കറ്റ്​ സീരീസ്​ എന്നീ മൂന്ന്​ വിഭാഗങ്ങളിലായാണ്​ ടിക്കറ്റ്​ ബുക്കിങ്​ ആരംഭിച്ചത്​.

• വ്യക്​തിഗത മാച്ച്​ ടിക്കറ്റ്​: മത്സരങ്ങൾ കാണാൻ ഏറ്റവും സൗകര്യപ്രദമായ ടിക്കറ്റിങ്​ രീതിയാണ്​ വ്യക്​തിഗത മാച്ച്​ ടിക്കറ്റുകൾ. ഇതുവഴി, മാച്ച്​ നമ്പർ നോക്കി ആരാധകർക്ക്​ തങ്ങളുടെ ടിക്കറ്റ്​ ബുക്ക്​ ചെയ്യാം. കാറ്റഗറി ഒന്ന്​, രണ്ട്​, മൂന്ന്​, നാല്​ വിഭാഗങ്ങളിൽ ഈ ടിക്കറ്റുകൾ ലഭ്യമാണ്​.
• ടീം സ്​പെസിഫിക്​ ടിക്കറ്റ്​ സീരീസ്​: ടീമിനെ പിന്തുടർന്ന്​ കളി കാണുന്ന ആരാധകർക്കാണ്​ ഈ വിഭാഗം ഉപയോഗപ്പെടുക. നിലവിൽ, മുഴുവൻ ടീമുകളും യോഗ്യത നേടാത്തതിനാൽ, അവസാന റൗണ്ടിലുള്ളവർ ഉൾപ്പെടെ 71 ടീമുകളുടെ പേരു വിവരങ്ങൾ ഈ പട്ടികയിലുണ്ടാവും. ഇഷ്ട ടീമി‍െൻറ ഗ്രൂപ്​, നോക്കൗട്ട്​ മത്സരങ്ങൾക്ക്​ ടിക്കറ്റ്​ ബുക്ക്​ ചെയ്യാവുന്നതാണ്​.
• ഫോർ സ്​റ്റേഡിയം ടിക്കറ്റ്​ സീരീസ്​: സ്​റ്റേഡിയങ്ങളുടെ മത്സര ഗാംഭീര്യം ആസ്വദിക്കാൻ ഇഷ്ടപ്പെടുന്നവർക്ക്​ ഈ വിഭാഗത്തിൽ ടിക്കറ്റുകൾ ​തിരഞ്ഞെടുക്കാവുന്നതാണ്​. ഒരു ടിക്കറ്റിൽ തുടർച്ചയായി നാലു ദിവസങ്ങളിൽ നാല്​ സ്​റ്റേഡിയങ്ങളിൽ കളി കാണാനുള്ള സൗകര്യമാണ്​ ആരാധകർക്ക്​ ഒരുക്കുന്നത്​.

രാജ്യാന്തര കാണികൾക്ക്​ ഏറെ സൗകര്യമുള്ള മാർഗമാണിത്​. ഉദാഹരണം: സീരീസ്​ 'എ'യിൽ നവംബർ 21ന്​ അൽ തുമാമ സ്​റ്റേഡിയം, 22ന്​ അൽ ജനൂബ്​ സ്​റ്റേഡിയം, 23ന്​ ഖലീഫ ഇന്‍റർനാഷനൽ സ്​റ്റേഡിയം, 24ന്​ ലുസൈൽ സ്​റ്റേഡിയം എന്നിവിടങ്ങളിൽ കളി കാണാം. കാറ്റഗറി ഒന്നിന്​ 3200, കാറ്റഗറി രണ്ടിന്​ 2400 റിയാൽ മൂന്നിന്​ 1000 റിയാൽ എന്നിങ്ങനെയാണ്​ നിരക്ക്​.

ഒരാൾക്ക്​ എത്ര ടിക്കറ്റ്​?

ഒരു മത്സരത്തിന്​ ഒരാൾക്ക്​ ആറ്​ ടിക്കറ്റുകൾ വരെ ബുക്ക്​ ചെയ്യാം. എന്നാൽ, ടൂർണമെന്‍റിലുടനീളം 60 ടിക്കറ്റുകൾ വരെ മാത്രമേ ബുക്ക്​ ചെയ്യാൻ കഴിയുകയുള്ളൂ. കുടുംബത്തിനും സൂഹൃത്തുക്കൾക്കുമായി ടിക്കറ്റ്​ ബുക്ക്​ ചെയ്ത്​ ലോകകപ്പ്​ ആസ്വാദ്യകരമാക്കാൻ ഫിഫ ആഹ്വാനം ചെയ്യുന്നു.

ഫാൻ ഐഡിയുണ്ട്​

ഫിഫ അറബ്​ കപ്പിൽ നടപ്പാക്കി വിജയിച്ച ഫാൻ ഐഡി കാർഡായ (ഹയ്യാ കാർഡ്​) ലോകകപ്പിലുമുണ്ടാവുമെന്ന്​ ഫിഫ. സ്​റ്റേഡിയത്തിലേക്കുള്ള പ്രവേശനം, യാത്ര, പൊതുഗതാഗത സംവിധാനം, വിദേശത്തുള്ളവർക്ക്​ ഖത്തറിലെത്താനുള്ള വിസ എന്നിവയായെല്ലാം ഉപയോഗിക്കാവുന്ന ഫാൻ ഐഡി കാർഡ്​ ലോകകപ്പ്​ ചരിത്രത്തിലെ തന്നെ അതിശയമായി മാറും. റഷ്യ ലോകകപ്പിൽ നടപ്പാക്കിയ ഫാൻ ഐഡിയെ കൂടുതൽ പരിഷ്കാരങ്ങളും ഡിജിറ്റലൈസ്​ ചെയ്തുമാണ്​ ഖത്തർ അവതരിപ്പിക്കുന്നത്​. അറബ്​ കപ്പിൽ സ്​റ്റേഡിയത്തിലേക്കുള്ള പ്രവേശനത്തിനും മെട്രോ റെയിൽ, മെട്രോ ലിങ്ക്​- കർവ ബസുകൾ, വിദേശകാണികൾക്ക്​ രാജ്യത്തേക്കുള്ള പ്രവേശന പാസ്​ എന്നിവയായെല്ലാം ഹയ്യാകാർഡായിരുന്നു ഉപയോഗിച്ചത്​.