ഖത്തറിൽ‘ക്ലിക്കാ’യി മലയാളികൾ

ദോഹ: ഖത്തർ ഇസ്​ലാമിക മതകാര്യ മന്ത്രാലയം സംഘടിപ്പിച്ച ഫോ​ട്ടോഗ്രഫി മത്സരത്തിൽ സമ്മാനങ്ങൾ വാരിക്കൂട്ടി മലയാളി ഫോ​ട്ടോഗ്രാഫർമാർ. മാസങ്ങൾ നീണ്ടുനിന്ന മത്സരത്തിൽ 49 രാജ്യങ്ങളിൽനിന്നായി 694 പേർ മാറ്റുരച്ചപ്പോഴാണ്​ വിവിധ വിഭാഗങ്ങളിൽ ചിത്രങ്ങളൊപ്പിയെടുത്ത്​ പ്രവാസി മലയാളികൾ ഫോ​ട്ടോഗ്രഫി മിടുക്ക്​ തെളിയിച്ചത്​. അന്താരാഷ്​​ട്ര തലം, ഖത്തറിൽനിന്നുള്ളവർക്ക്​ മാത്രമായൊരുക്കിയ നാച്വർ ആൻഡ്​ വൈൽഡ്​ ലൈഫ്​, ക്രിയേറ്റേഴ്​സ്​ ക്രിയേറ്റിവിറ്റി എന്നീ വിഭാഗങ്ങളിലാണ്​ മത്സരങ്ങൾ നടന്നത്​.

പ്രകൃതിയുടെയും വന്യജീവികളുടെയും കഥ പറയുന്ന പ്രാദേശിക വിഭാഗത്തിൽ ആദ്യ മൂന്ന്​ സ്ഥാനവും മലയാളികൾ സ്വന്തമാക്കി. പൊന്നാനി സ്വദേശി മുഹമ്മദ്​ അഷ്​റഫ്​ കാരിയിൽ ഒന്നും ഗുരുവായൂർ സ്വദേശിനി നിഫിബ സുനീർ രണ്ടാം സ്ഥാനവും ചാവക്കാട്​ സ്വദേശി അബ്​ദുൽ സലീം മൂന്നാം സ്ഥാനവും നേടി. പത്തു വർഷത്തോളമായി ഫോ​ട്ടോഗ്രഫി ഹോബിയാക്കി നാട്​ ചുറ്റുന്ന അഷ്​റഫിന്റെ നീർകാക്ക മീൻ പിടിക്കുന്ന നിമിഷം ഒപ്പിയെടുത്ത ചിത്രമാണ്​ ഒന്നാം സ്ഥാനം നേടിയത്​.

അൽ സൈലിയയിലെ മലിനജല ശുദ്ധീകരണ പ്ലാന്‍റിനോട്​ ചേർന്നുണ്ടായ ജലാശയത്തിൽനിന്ന് ദിവസങ്ങളുടെ കാത്തിരിപ്പിനൊടുവിൽ പകർത്തിയ ചിത്രമാണ്​ ഇതെന്ന്​ അഷ്​റഫ്​ ‘ഗൾഫ്​ മാധ്യമ’ത്തോട്​ പറഞ്ഞു. ഒന്നരവർഷം മുമ്പായിരുന്നു അഷ്​റഫ്​ ഈ ചിത്രം പകർത്തിയത്​. 10,000 റിയാലാണ്​ ഒന്നാം സമ്മാനത്തിനുള്ള തുക. ഏഴായിരം, 5000 റിയാലാണ് രണ്ടും മൂന്നും സമ്മാനങ്ങൾ.

വൊഡഫോൺ ഖത്തറിൽ ഫെസിലിറ്റി സൂപ്പർ വൈസറായി ജോലിചെയ്യുന്ന അഷ്​റഫിന്​​ തന്‍റെ അവധി ദിനങ്ങളിൽ ചിത്രങ്ങൾ തേടിയിറങ്ങുന്നത്​ പതിവാണ്​.

വെള്ളിയാഴ്​ച പ്രവാസികളിൽ വലിയൊരു പങ്കും ​ഉച്ചവരെ കിടന്നുറങ്ങു​മ്പോൾ പുലർച്ച മൂന്നിനുതന്നെ തുടങ്ങുന്നതാണ്​ അഷ്​റഫിന്റെ ഫോ​ട്ടോ തേടിയുള്ള യാത്ര. സൂര്യനുദിക്കും മു​മ്പേ തുടങ്ങുന്ന യാത്രകളിൽ ഒപ്പിയെടുത്തത്​ നിരവധി ചിത്രങ്ങൾ. ക​ഴിഞ്ഞ അഞ്ചു വർഷമായി കെനിയയിലേക്കുള്ള ഫോ​ട്ടോഗ്രഫർമാരുടെ ടൂറിനും അഷ്​റഫും സംഘവും നേതൃത്വം നൽകുന്നുണ്ട്​. നേരത്തേ പരിസ്ഥിതി മന്ത്രാലയത്തിന്‍റെ ഫോ​ട്ടോഗ്രഫി മത്സരത്തിലും ഇദ്ദേഹം സമ്മാനം നേടിയിരുന്നു.

എൻജിനീയർ ബിരുദധാരിയാണ് രണ്ടാം സ്ഥാനം നേടിയ നിഫിബ. ഫോട്ടോഗ്രാഫറായ ഭർത്താവ് സുനീറിന്റെ കാമറ ഉപയോഗിച്ച് ഫോട്ടോഗ്രഫിക്ക് പിന്നാലെ കൂടിയ ഇവർ, കഴിഞ്ഞ ആറു വർഷമായി സജീവമായി രംഗത്തുണ്ട്. ഐ.സി.സി ​ഫോട്ടോഗ്രഫി മത്സരത്തിലും വിജയിച്ചിരുന്നു. ലോകകപ്പിനോടനുബന്ധിച്ച് ദർബ് അൽ സാഇയിൽ നടന്ന പ്രദർശനത്തിലും പ​​ങ്കെടുത്തു. ഇർകിയയിലെ ഫാം സന്ദർശനത്തിനിടെയാണ് സമ്മാനാർഹമായ ചിത്രം പകർത്തിയതെന്ന് നിഫിബ പറയുന്നു.

നീല കവിളൻ വേലിത്തത്ത എന്നറിയ​പ്പെടുന്ന ബ്ലൂ ചീക്ക്ഡ് ബീ ഈറ്റർ ഇണകൾ തുമ്പിയെ കൊക്കിലൊതുക്കുന്നതാണ് ചിത്രം. മത്സരത്തിന്റെ ഓരോ വിഭാഗങ്ങളിലും 15 പേരുടെ ചിത്രങ്ങൾ ഫൈനൽ റൗണ്ടിൽ ഇടംനേടിയിട്ടുണ്ട്. പ്രോത്സാഹന സമ്മാനത്തിനും മലയാളി ഫോട്ടോഗ്രാഫമാർ അർഹരായി. ഔഖാഫിന്റെ ആറാമത് ഫോട്ടോഗ്രഫി മത്സരത്തിന് ഒക്ടോബർ ഒന്നിന് തുടക്കമാവും.