കൊടുമുടിയേറി ഫഹദ്​ ബദർ

ദോഹ: ചൈന- പാക്​ അതിർത്തിയിലെ കാരകോറം മലനിരകളിലെ ബ്രാഡ്​ പീക്​ കൊടുമുടി കീഴടക്കി ഖത്തറിൻെറ പർവതാരോഹകൻ ഫഹദ്​ അബ്​ദുറഹ്​മാൻ ബദർ. സമുദ്ര നിരപ്പിൽ നിന്നും 8047 മീറ്റർ ഉയരത്തിൽ മഞ്ഞുവിരിച്ച്​ നിൽക്കുന്ന ലോകത്തിലെ ഉയരമേറിയ കൊടുമുടികളിലൊന്നായ ​ബ്രോഡ്​ പീക്കിൽ മാസങ്ങൾ പിന്നിട്ട ദൗത്യത്തിനൊടുവിലാണ്​ ഫഹദ്​ അബ്​ദുൽ റഹ്​മാൻ ഖത്തറിൻെറ പതാക നാട്ടിയത്​.

ലോകത്തിൽ ഉയരത്തിൽ 12ാം സ്​ഥാനത്താണ്​ ഏറെ അപകടം പതിയിരിക്കുന്ന ബ്രോഡ്​ പീക്​ കൊടുമുടി. ഹിമാലൻ പർവത നിരയുടെ ഭാഗമായ നേപ്പാളിലെ 'അമ ദബ്ലം' കൊടുമുടി കീഴടക്കിക്കൊണ്ടായിരുന്നു ഈ വർഷം ജനുവരിയിൽ ഫഹദിൻെറ പർവതാരോഹണത്തിൻെറ തുടക്കം. 6812 മീറ്റർ ഉയരെയുള്ള കൊടുമുടിയാണ്​ അമ ദബ്ലം. വിജയകരമായി ഈ പർവതാരോഹണത്തിൻെറ ആത്മവിശ്വാസവുമായാണ്​ അദ്ദേഹം, പാക്​-ചൈന അതിർത്തിയിലെ കാരകോറം മലകൾക്കു മുകളിലെത്തിയത്​. ഇതോടെ, 8000 മീറ്ററിന്​ മുകളിലുള്ള മൂന്ന്​ കൊടുമുടികൾ ഫഹദ്​ കാൽകീഴിലാക്കിക്കഴിഞ്ഞു. ലോകത്തെ ഏറ്റവും ഉയരം കൂടിയ മൗണ്ട്​ എവറസ്​റ്റ്​, ഉയരത്തിൽ നാലാമതുള്ള ലോത്​സെ എന്നിവയാണ്​ ഇതിനകം കീഴടക്കിയത്​.

അറബ്​ മണ്ണിൽ നിന്നും ഈ നേട്ടം സ്വന്തമാക്കിയ പർവതാരോഹകർ വിരലിൽ എണ്ണാവുന്നവർ മാത്രമാണുള്ളത്​.'ഏറ്റവും ദുർഘടവും, എന്നാൽ ആസ്വാദ്യകരവുമായിരുന്നു ബ്രോഡ്​ പീകിലേക്കുള്ള യാത്ര. യാത്രക്കിടയിൽ ഏറെ ദുരിതങ്ങളും വെല്ലുവിളികളും ഉണ്ടായപ്പോഴും ലക്ഷ്യം നേടിയെടുക്കുകമാത്രമായിരുന്നു മനസ്സിൽ. ഏറ്റവും ഉയരത്തിൽ ഖത്തറിൻ ദേശീയ പതാക സ്​ഥാപിക്കുകയെന്ന ലക്ഷ്യം എനിക്ക്​ ആവേശമായി. ഓരോ ഇഞ്ച്​ ചുവടിലും ഈ സ്വപ്​നമായിരുന്നു കരുത്തായത്​. മുൻ അനുഭവങ്ങളേക്കാൾ ഏറെ വെല്ലുവിളി നിറഞ്ഞതായിരുന്നു ഈ ദൗത്യം. മഞ്ഞുവീഴ്​ചയും കൂടുതൽ ഉൾപ്രദേശമായതും മറ്റുകൊടുമുടികളേക്കാൾ വിസ്​തൃതിയേറിയതുമെല്ലാം ​പരീക്ഷണമായി. ദൈവത്തിനു സ്​തുതി. ഞാൻ ലക്ഷ്യം നേടിയിരിക്കുന്നു' -പർവതം കീഴടക്കിക്കൊണ്ടുള്ള ചിത്രം പങ്കുവെച്ച്​ ഫഹദ്​ ബദർ പറഞ്ഞു.

യാത്രക്കിടെ ഇദ്ദേഹത്തിന്​ പരിക്കും പറ്റി. മഞ്ഞുകൊണ്ടുണ്ടാവുന്ന ശരീരവീക്കം കാരണം പ്രയാസം അനുഭവപ്പെടുകയും ചെയ്​തു. ഓക്​സിജൻെറ കുറവു കാരണം 7800 മീറ്റർ ഉയരത്തിൽ ഒരു രാത്രി മുഴുവൻ ചെലവഴിക്കേണ്ടിവരും വന്നു. ശേഷം ബേസ്​ ക്യാമ്പിലെ സൈനിക ആശുപത്രിയിൽ നിന്ന്​ ചികിത്സതേടിയാണ്​ വീണ്ടും മുന്നോട്ടുപോയത്​.40കാരനായ ഫഹദ്​ ഖത്തറിൽ മുതിർന്ന ബാങ്ക്​ ഉദ്യോഗസ്​ഥൻ കൂടിയാണ്​.