ഫരീജ്​ അലി അടിപ്പാത തുറന്നു; യാത്രാസമയം കുറയും

ദോഹ: ഡി ​റിങ്​ റോഡിലെ ഫരീജ്​ അൽ അലി ഇന്‍റർസെക്ഷൻ (അൽ തദമൻ ഇന്‍റർസെക്ഷൻ) അടിപ്പാതയും കാര്യേജ്​ വേയും ഗതാഗതത്തിനായി തുറന്നുകൊടുത്തു. ​പൊതുമരാമത്ത്​ വിഭാഗമായ അശ്​ഗാൽ നേതൃത്വത്തിൽ നിർമാണം പൂർത്തിയാക്കിയ അടിപ്പാത ശനിയാഴ്ച​ രാവിലെയാണ്​ പൊതുഗതാഗതത്തിനായി തുറന്നത്​. മേഖലയിലെ ഗതാഗതക്കുരുക്ക്​ ഒഴിവാക്കുന്നതിൽ ഏറെ നിർണായകമാണ് പുതിയ അടിപ്പാത. പാത തുറന്നു നൽകിയതോടെ ഡി റിങ്​ റോഡിനും ദോഹ എക്സ്​പ്രസ്​ വേക്കുമിടയിലെ യാത്ര കൂടുതൽ എളുപ്പമാവും. 70 ശതമാനത്തോളം യാത്രാസമയവും ലാഭിക്കാനാവും. നുഐജ, അൽ ഹിലാൽ ഓൾഡ് എയർപോർട്ട് തുടങ്ങിയ പ്രദേശങ്ങളിലെ ജനങ്ങൾക്കും, വിദ്യാഭ്യാസ സ്ഥാപനങ്ങൾ, വാണിജ്യകേന്ദ്രങ്ങൾ എന്നിവക്ക്​ പുതിയപാത ഏറെ ഗുണം ചെയ്യും. ​ഫെരീജ് അൽ അലി, നുഐജ, ലുലു തുടങ്ങിയ ഇന്‍റർസെക്ഷനുമായി ബന്ധപ്പെടുത്തിയാണ് പുതിയ കാരേജ്​വേ നിർമിച്ചിരിക്കുന്നത്​. ഇരു വശത്തേക്കും മൂന്നിൽനിന്നും നാലുവരിയായി വർധിപ്പിച്ചാണ്​ ഇന്‍റർസെക്ഷൻ പുർത്തിയാക്കിയത്​. മണിക്കൂറിൽ 12,000ത്തിൽനിന്നും 16,000 വാഹനങ്ങൾ കടന്നുപോവാനാവും വിധമാണ്​ പാത വിപുലമാക്കിയത്​.

ഒരു കി.മീ ദൈർഘ്യമുള്ള ഫരീജ്​ അലി അണ്ടർപാസ്​ വഴി ദോഹ എക്സ്​പ്രസ്​ വേയിൽനിന്നും ഡി ​റിങ്​ റോഡിലേക്ക്​ ട്രാഫിക്​ തടസ്സങ്ങളൊന്നുമില്ലാതെ വാഹനങ്ങൾക്ക്​ പ്രവേശിക്കാൻ കഴിയുമെന്നതാണ്​ പ്രധാന സവിശേഷത. ഇരു വശങ്ങളിലേക്കും മൂന്ന്​ വരികളിലായി ആറ്​ വരികളിൽ വിശാലമായ വാഹന സഞ്ചാരപാതയാണ്​ സജ്ജീകരിച്ചത്​. നേരത്തേതിൽനിന്നും 50 ശതമാനം വരെ യാത്രാസമയം ലാഭിക്കാൻ കഴിയുമെന്ന്​ അശ്​ഗാൽ അറിയിച്ചു. മണിക്കൂറിൽ ഇരുവശങ്ങളിലേക്കുമായി 12,000 വാഹനങ്ങൾക്ക്​ ഒരു തടസ്സവുമില്ലാതെ സഞ്ചരിക്കാൻ കഴിയും. മഴവെള്ളം ഒഴുകിപ്പോകാനായി 3.5 കിലോമീറ്റർ നീളത്തിൽ ഡ്രെയിനേജ്​ ശൃംഖലയും നിർമിച്ചിട്ടുണ്ട്​. മൈക്രോ ടണലിങ്ങിലൂടെ വെള്ളം, വൈദ്യുതി, ഡ്രെയിനേജ്​, കമ്യൂണിക്കേഷൻ നെറ്റ്​വർക്ക്​ സംവിധാനങ്ങളും പൂർത്തിയാക്കിയിട്ടുണ്ട്​. 17,000 ടൺ സ്റ്റീൽ, ഒരു ലക്ഷം ടൺ അസഫാൾട്ട്​, 1.05 ലക്ഷം ​ചതുരശ്ര മീറ്റർ കോൺക്രീറ്റ്​, 3.5 കി.മീ ​മഴവെള്ള ടണൽ, 30 കി.മീ ഇലക്​ട്രിസിറ്റി നെറ്റ്​വർക്ക്​, 32 കി.മീ അടിസ്ഥാന സൗകര്യ സംവിധാനങ്ങൾ തുടങ്ങിയവയാണ്​ നിർമാണത്തിന്‍റെ വിശദാംശങ്ങൾ. നിർമാണത്തിനായി ഉപയോഗിച്ച അസംസ്കൃത വസ്തുക്കളിൽ 66 ശതമാനവും ഖത്തറിൽനിന്നു തന്നെയുള്ളവയാണെന്ന്​ അശ്​ഗാൽ പ്രോജക്ട്​ വിഭാഗം മാനേജർ എൻജിനീയർ യൂസുഫ് അൽ ഇമാദി അറിയിച്ചു.