ഫിഫ അറബ്​ കപ്പ്​: കിക്കോഫും ഫൈനലും അൽബെയ്​ത്​ സ്​റ്റേഡിയത്തിൽ

ദോഹ: ​2022 ഫിഫ ലോകകപ്പിൻെറ വിളംബരമായി ഖത്തർ വേദിയൊരുക്കുന്ന ഫിഫ അറബ്​ കപ്പ്​ ചാമ്പ്യൻഷിപ്​ വേദികൾ പ്രഖ്യാപിച്ചു. ഈ വർഷം നവംബർ 30ന്​ നടക്കുന്ന ഉദ്​ഘാടന മത്സരത്തിനും ഡിസംബർ 18ൻെറ ഫൈനലിനും അൽബെയ്​ത്​ സ്​റ്റേഡിയമാണ്​ വേദി. ഫിഫ ലോകകപ്പിൻെറ ഉദ്​ഘാടനവേദി കൂടിയാണ്​ പരമ്പരാഗത അറബ്​ തമ്പുകളുടെ മാതൃകയിൽ നിർമിച്ച അൽബെയ്​ത്​ സ്​റ്റേഡിയം.

നിര്‍മാണ ജോലികള്‍ 100 ശതമാനവും പൂർത്തിയായി അണിഞ്ഞൊരുങ്ങി നിൽക്കുന്ന അല്‍ ബെയ്ത്ത് സ്​റ്റേഡിയത്തി​െൻറ ഉദ്ഘാടനം കൂടിയായിരിക്കും അറബ്​ കപ്പിൻെറ കിക്കോഫ്​. അറബ് ആഫ്രിക്കന്‍ മേഖലകളില്‍നിന്നുള്ള 16 ടീമുകളാണ് ടൂര്‍ണമെൻറില്‍ മാറ്റുരക്കുന്നത്​.

നവംബര്‍ 30ന് ആതിഥേയരായ ഖത്തറും ബഹ്റൈനും തമ്മിലാണ് ഉദ്ഘാടന മത്സരം.അല്‍ തുമാമ, റാസ് ബൂ അബൂദ് എന്നീ സ്​റ്റേഡിയങ്ങളും അറബ് കപ്പിന് വേദിയായി ഉദ്ഘാടനം ചെയ്യപ്പെടുമെന്ന്​ സുപ്രീം കമ്മിറ്റി അറിയിച്ചു.

ഷിപ്പിങ് കണ്ടെയ്നറുകള്‍ ഉപയോഗിച്ച് നിര്‍മിച്ച റാസ് ബൂ അബൂദ് സ്​റ്റേഡിയം ചരിത്രത്തിലാദ്യമായി ലോകകപ്പിന് ശേഷം പൂര്‍ണമായും പൊളിച്ചുകളയുന്ന സ്​റ്റേഡിയം കൂടിയാണ്. റയ്യാന്‍, എജുക്കേഷന്‍ സിറ്റി, അല്‍ ജനൂബ് എന്നിവയിലും അറബ് കപ്പ് മത്സരങ്ങള്‍ നടക്കും.

അറബ് കപ്പി​െൻറ യോഗ്യതാമത്സരങ്ങള്‍ നേരത്തെ ഖത്തറില്‍വെച്ച് പൂർത്തിയായിരുന്നു. ആതിഥേയരായ ഖത്തര്‍ ഉൾപ്പെടെ ഒമ്പത്​ ടീമുകള്‍ നേരിട്ട് യോഗ്യത നേടിയപ്പോള്‍ ഒറ്റമത്സരം വീതമുള്ള യോഗ്യതാ റൌണ്ട് വഴി എട്ട് ടീമുകളും ടൂർണമെൻറിലേക്ക്​ തിരഞ്ഞെടുക്കപ്പെട്ടു.

ഫിക്​സചർ റെഡി

അറബ്​ കപ്പ്​ പോരാട്ടങ്ങളുടെ മത്സര ഫിക്​സ്​ചർ തയാറായി. ഉച്ചക്ക്​ ഒരു മണിക്കാണ്​ ഖത്തർ - ബഹ്​റൈൻ ഉദ്​ഘാടന മത്സരം. ​അതേ ദിവസം, ​ൈവെകീട്ട്​ നാലിനും രാത്രി ഏഴിനും 10നും മത്സരങ്ങളുണ്ട്​. വൈകീട്ട്​ ആറിനാണ്​ ഫൈനൽ മത്സരം.

ഓൺലൈൻ ടിക്കറ്റ്​

അറബ്​ കപ്പിനുള്ള ടിക്കറ്റുകൾ ഇന്നു​ മുതൽ ഓൺലൈനിൽ ലഭ്യമാവും. ഫിഫ വെബ്​സൈറ്റ്​ വഴി അപേക്ഷിച്ച്​ ടിക്കറ്റുകൾ സ്വന്തമാക്കാം.