ജി.സി.സി അക്വാട്ടിക്​ ചാമ്പ്യൻഷിപ്​ ഖത്തറിൽ

ദോഹ: 28ാമത്​ ഗൾഫ്​ കോർപറേഷൻ കൗൺസിൽ അക്വാട്ടിക്​ ചാമ്പ്യൻഷിപ്പിന്​ ഖത്തർ വേദിയാവും. ഖത്തർ സ്വിമ്മിങ്​ ​അസോസിയേഷൻ ആതിഥ്യം വഹിക്കുന്ന ചാമ്പ്യൻഷിപ്​ ആഗസ്​റ്റ്​ 19 മുതൽ 22 വരെ ഹമദ്​ അക്വാട്ടിക്​ സെൻററിൽ നടക്കും. കഴിഞ്ഞ ദിവസം ചേർന്ന സംഘാടക സമിതി യോഗം ചാമ്പ്യൻഷിപ്​ ഒരുക്കങ്ങൾക്ക്​ രൂപം നൽകി. 2020ൽ നടക്കേണ്ടിയിരുന്ന ചാമ്പ്യൻഷിപ്​ കോവിഡ്​ വ്യാപനത്തെ തുടർന്നാണ്​ മാറ്റിവെച്ചത്​.

ഖത്തറാണ്​ നിലവിലെ ജേതാക്കൾ. ഇക്കുറി സ്വന്തം മണ്ണിൽ മേഖലയിലെ നീന്തൽ കിരീടം നിലനിർത്താനാവും ആതിഥേയരുടെ ശ്രമം. 2019ൽ കുവൈത്തിൽ നടന്ന ചാമ്പ്യൻഷിപ്പിൽ 17 സ്വർണവും 10 വെള്ളിയും ഏഴ്​ വെങ്കലവുമായി 34മെഡലുകളോടെയാണ്​ ഖത്തർ ജേതാക്കളായത്​. മേഖലയിൽ നീന്തൽ മത്സരങ്ങളിൽ നിർണായക ശക്​തിയായ ഖത്തർ ലോക അക്വാട്ടിക്​ വേദിയായ 'ഫിന'യുടെ വാർഷിക കോൺഗ്രസിന്​ കഴിഞ്ഞ മാസം വേദിയായിരുന്നു. 2023ലെ ലോകചാമ്പ്യൻഷിപ്​ വേദിയും ഖത്തറാണ്​.