ഹമദ് വിമാനത്താവളത്തിന് വീണ്ടും നേട്ടം

ദോഹ: ഹമദ് രാജ്യാന്തര വിമാനത്താവളത്തിന് വീണ്ടും നേട്ടം. ബ്രിട്ടീഷ് സ്​റ്റാൻഡേഡ് ഇൻസ്​റ്റിറ്റ്യൂഷ‍െൻറ (ബി.എസ്.ഐ) അസറ്റ് മാനേജ്മെൻറ് സിസ്​റ്റം ഐ.എസ്.ഒ 55001: 2014 അംഗീകാരം നിലനിർത്തി. മൂന്ന് വർഷത്തേക്കാണ് അംഗീകാരം.

വിമാനത്താവള അടിസ്​ഥാന സൗകര്യങ്ങളിലെ മികവുറ്റതും കാര്യക്ഷമമായതുമായ അസറ്റ് മാനേജ്മെൻറ് സംവിധാനത്തിനുള്ള അംഗീകാരമാണ് ബി.എസ്.ഐ അസറ്റ് മാനേജ്മെൻറ് സിസ്​റ്റം ഐ.എസ്.ഒ സർട്ടിഫിക്കേഷൻ. 2018 മുതൽ ഈ അംഗീകാരം ദോഹ ഹമദ് രാജ്യാന്തര വിമാനത്താവളത്തിന് ലഭിച്ചുകൊണ്ടിരിക്കുന്നുണ്ട്.അസറ്റ് ഓപറേഷനുമായി ബന്ധപ്പെട്ട അസസ്​മെൻറ് ഓഫ് റിസ്​ക്, കോസ്​റ്റ്, പെർഫോമൻസ്​ മേഖലകളിലെ മികവിനാണ് അംഗീകാരം ലഭിച്ചിരിക്കുന്നത്.

അംഗീകാരം നിലനിർത്താനായതിൽ അഭിമാനമുണ്ടെന്നും അസറ്റ് മാനേജ്മെൻറിലെ പ്രയാസങ്ങളും ചെലവുകളും കുറച്ച് വിമാനത്താവളത്തിെൻറ ബിസിനസ്​ ലക്ഷ്യങ്ങൾ കൈവരിക്കുന്നതിൽ പങ്കാളികളാവുകയാണ് ലക്ഷ്യമെന്നും ഫെസിലിറ്റീസ്​ മാനേജ്മെൻറ് സീനിയർ വൈസ്​ പ്രസിഡൻറ് മൈക്കൽ മക്മില്ലൻ പറഞ്ഞു. കോവിഡ്​ പ്രതിരോധരംഗത്ത്​ മികച്ച നടപടികളാണ്​ വിമാനത്താവളം സ്വീകരിക്കുന്നത്​. കോവിഡ്–19 പ്രതിരോധ മേഖലയിൽ സ്​കൈട്രാക്സിെൻറ പഞ്ചനക്ഷത്ര പദവി നേടി മിഡിലീസ്​റ്റിലും ഏഷ്യയിലും പഞ്ചനക്ഷത്ര പദവി ലഭിക്കുന്ന ആദ്യ വിമാനത്താവളമായി ഹമദ് മാറിയിട്ടുണ്ട്​. ആഗോള തലത്തിൽ തന്നെ മഹാമാരിക്കെതിരായ പ്രതിരോധ പ്രവർത്തനങ്ങളിൽ ചുരുക്കം വിമാനത്താവളങ്ങൾക്ക് മാത്രമാണ് പഞ്ചനക്ഷത്ര പദവി ലഭിച്ചിരിക്കുന്നത്.

പഴുതടച്ച കോവിഡ്–19 പ്രതിരോധ പ്രവർത്തനങ്ങളാണ് ഹമദിന് തുണയായത്. കോവിഡ്–19 സുരക്ഷ മാനദണ്ഡങ്ങൾ വിമാനത്താവളത്തിൽ നടപ്പാക്കിയെന്ന് സ്​കൈട്രാക്സ്​ വിലയിരുത്തി. യാത്രക്കാരുടെ സുരക്ഷ ഉറപ്പാക്കുന്നതിെൻറ ഭാഗമായി ഈയടുത്ത് 15 പി.പി.ഇ വെൻഡിങ്​ മെഷീനുകൾ വിമാനത്താവളത്തിൽ സ്​ഥാപിച്ചിരുന്നു. ഇതോടൊപ്പം മാസ്​ക്, ​കൈയുറ, ഹാൻഡ് സാനിറ്റൈസറുകൾ, ഫേസ്​ ഷീൽഡ് സംവിധാനങ്ങളും യാത്രക്കാർക്ക് വിമാനത്താവള അധികൃതർ ഉറപ്പുവരുത്തുന്നുണ്ട്.