ഖത്തർ ഹമദ്​ എയർപോർട്ടിന്​ ലോകാറാങ്കിങിൽ മൂന്നാം സ്​ഥാനം; മിഡിൽ ഈസ്​റ്റിൽ ഒന്നാംസ്​ഥാനം

ദോഹ: ലോകത്തെ മികച്ച മൂന്നാമത്തെ വിമാനത്താവളമായി ഖത്തർ ഹമദ്​ ഇൻറർനാഷനൽ എയർപോർട്ടിനെ തെരഞ്ഞെടുത്തു. സ്​കൈട്രാക്​സ്​ വേൾഡ്​ എയർപോർട്ട്​ അവാർഡ്​ 2020 ലാണ്​ ഖത്തർ എയർപോർട്ടിന്​ നേട്ടം. മിഡിൽ ഈസ്​റ്റിലെ മികച്ച വിമാനത്താവളമായും ഇതിനെ തെ​രഞ്ഞെടുത്തു. 

2014 ൽ പ്രവർത്തനം തുടങ്ങിയ ഖത്തർ ഹമദ്​ എയർപോർട്ട്​ ലോക റാങ്കിങിൽ ഒാരോ വർഷവും നില മെച്ചപ്പെടുത്തുന്നുണ്ട്​. 2019 ൽ നാലാം സ്​ഥാനത്തായിരുന്നു. അതാണ്​ ഇപ്പോൾ മൂന്നാം സ്​ഥാനത്തേക്ക്​ എത്തിയിരിക്കുന്നത്​. 

സ്​കൈട്രാക്​സ്​ 550 ഒാളം എയർപോർട്ടുകളെ ഉൾപ്പെടുത്തി യാത്രക്കാരിൽ നിന്ന്​ അഭിപ്രായശേഖരണം നടത്തിയാണ്​ റാങ്കിങ്​ നടത്തുന്നത്​. മിഡിൽ ഈസ്​റ്റിലെ മികച്ച എയർപോർട്ടായി ഖത്തറിനെ തെരഞ്ഞെടുക്കുന്നത്​ തുടർച്ചയായ ആറാമത്തെ വർഷമാണ്​. ജീവനക്കാരുടെ സേവനങ്ങൾക്ക്​ മിഡിൽ ഈസ്​റ്റിൽ ഖത്തർ എയർപോർട്ടിന്​ ഒന്നാം സ്​ഥാനം ലഭിക്കുന്നത്​ തുടർച്ചയായ അഞ്ചാം വർഷമാണ്​. 

2017 മുതൽ ഖത്തർ എയർപോർട്ട്​ അതി​​െൻറ പഞ്ചനക്ഷത്ര പദവി നിലനിർത്തുന്നുണ്ട്​.