ഹമദ് മെഡിക്കൽ കോർപറേഷന്​ അടിയന്തരമായി രക്തം വേണം

ദോഹ: എ പോസിറ്റിവ്, എ നെഗറ്റിവ് ഗ്രൂപ് രക്തം അടിയന്തരമായി ആവശ്യമുണ്ടെന്ന് ഹമദ് മെഡിക്കൽ കോർപറേഷനിലെ ബ്ലഡ് ഡോണർ സെൻറർ അറിയിച്ചു.രക്തദാതാക്കളെ അടിയന്തരമായി ആവശ്യപ്പെട്ട് സമൂഹ മാധ്യമങ്ങളിലൂടെയാണ് എച്ച്.എം.സി അറിയിപ്പ് പുറത്തുവിട്ടത്. രക്തദാനത്തിന് സന്നദ്ധതയുള്ള പുരുഷൻമാർ ഞായർ മുതൽ വ്യാഴം വരെയുള്ള ദിവസങ്ങളിൽ രാവിലെ ഏഴ്​ മുതൽ രാത്രി 9.30 വരെ ബ്ലഡ് ഡോണർ സെൻററിലെത്തണം. ശനിയാഴ്ച രാവിലെ എട്ട്​ മുതൽ ഉച്ച രണ്ട്​ വരെയും രക്തം സ്വീകരിക്കുമെന്നും വെള്ളിയാഴ്ച അവധിയായിരിക്കുമെന്നും എച്ച്.എം.സി വ്യക്തമാക്കി.

അതേസമയം, സാറ്റലൈറ്റ് ബ്ലഡ് ഡോണർ സെൻററിൽ രക്തദാതാക്കളായ സ്​ത്രീകൾ ഞായർ മുതൽ വ്യാഴം വരെയുള്ള ദിവസങ്ങളിൽ രാവിലെ ഏഴ്​ മുതൽ രാത്രി 9.30 വരെയുള്ള സമയങ്ങളിലെത്തി രക്തദാനം ചെയ്യാം. വെള്ളി, ശനി ദിവസങ്ങളിൽ സാറ്റലൈറ്റ് സെൻറർ അവധിയായിരിക്കും. 44391081 നമ്പറിൽ കൂടുതൽ വിവരങ്ങൾ അറിയാം.