വിദ്വേഷ പരാമർശം: ദുർഗാദാസിനെ ഖത്തറിലെ ജോലിയിൽനിന്നും പിരിച്ചുവിട്ടു

ദോഹ: വിദ്വേഷ പരാമർശത്തിലൂടെ വിവാദത്തിലായ മലയാളം മിഷൻ മുൻ കോഓഡിനേറ്റർ ദുർഗാദാസ് ശിശുപാലനെ ജോലിയിൽനിന്നും നീക്കം ചെയ്ത്​ കമ്പനി അധികൃതർ. ദോഹയിലെ നാരങ്​ പ്രൊജക്ട്​സ് എന്ന സ്ഥാപനമാണ്​ തങ്ങൾക്ക്​ ലഭിച്ച പരാതികളുടെ അടിസ്ഥാനത്തിൽ സീനിയർ അക്കൗണ്ടന്‍റായ ദുർഗാദാസിനെ ജോലിയിൽനിന്നും പിരിച്ചുവിട്ടുകൊണ്ട്​ നടപടി സ്വീകരിച്ചത്​.

തങ്ങളുടെ ജീവനക്കാരൻ വിദ്വേഷ പരാമർശം നടത്തിയതായി ലഭിച്ച പരാതികളുടെ അടിസ്ഥാനത്തിൽ ജോലിയിൽനിന്നും ഒഴിവാക്കിയതായി നാരങ് പ്രൊജക്സ്​ റീജനൽ ഡയറക്ടർ ടിം മർഫി അറിയിച്ചു.

തിരുവനന്തപുരത്തു നടന്ന ഹിന്ദുമഹാസമ്മേളനത്തിൽ പ​ങ്കെടുത്തുകൊണ്ട്​ നടത്തിയ വിവാദ പരാമർശങ്ങളുടെ പേരിൽ കഴിഞ്ഞ ദിവസം മലയാളം മിഷൻ ഖത്തർ ​ചാപ്​റ്റർ കോഓഡിനേറ്റർ പദവിയിൽനിന്നും ഇയാളെ പുറത്താക്കിയിരുന്നു.