സ​േന്താഷവേളകളിൽ രക്തംകൊണ്ട്​ സ്​നേഹം പകരുന്നവൻ

ദോഹ: പിറന്നാളായാലും വിവാഹ വാർഷികമായാലും ജീവിതത്തിലെ സന്തോഷനിമിഷങ്ങളിൽ കേക്ക്​ മുറിയും വിനോദയാത്രയും ആഘോഷങ്ങളുമല്ല പി.സി. നൗഫൽ കട്ടുപ്പാറയുടെ രീതി. ​ജീവിതത്തിലെ ഏറ്റവും പ്രിയപ്പെട്ട നിമിഷങ്ങളിലെല്ലാം അദ്ദേഹം ആശുപത്രിയിലേക്ക്​ ​ഓടിയെത്തും.

എന്നിട്ട്​, ബ്ലഡ്​ ബാങ്കിലേക്ക്​ രക്തം പകരും. കഴിഞ്ഞ കുറെ വർഷങ്ങളായുള്ള ശീലം ​ഇക്കുറി 10ാം വിവാഹ വാർഷികത്തിലും മലപ്പുറം പെരിന്തൽമണ്ണ സ്വദേശിയായ നൗഫൽ തെറ്റിച്ചില്ല. ജൂ​ൈല​ 24ന്​ പ്രിയതമക്കൊപ്പം വാർഷിക​ം ആഘോഷിക്കുന്നതിന്​ പകരം, നൗഫൽ ഓടിയെത്തിയത്​ ഖത്തർ ഹമദ്​ ആശുപത്രിയിലെ ബ്ലഡ്​ ബാങ്കിലേക്ക്​. കഴിഞ്ഞ മൂന്നു വർഷമായി ഖത്തറിൽതന്നെയായിരുന്നു നൗഫൽ വിവാഹ വാർഷികങ്ങൾക്ക്​ രക്തം നൽകിയത്​. അതിനു​ മു​മ്പ്​ പലതവണയായി നാട്ടിലും നൽകി.

ഒരു വ്യക്തിക്ക് ജീവിതത്തില്‍ ചെയ്യാന്‍ കഴിയുന്ന ഏറ്റവും ഹൃദയസ്പര്‍ശിയായ ജീവകാരുണ്യ പ്രവൃത്തിയാണ് രക്തദാനം എന്നാണ്​ നൗഫലിൻെറ വിശ്വാസം. അതുകൊണ്ടുകൂടിയാണ്​ ഈ ചെറുപ്പക്കാരൻ തൻെറ ജീവിതത്തിലെ നല്ല ദിനങ്ങളെ രക്തദാനംകൊണ്ട്​ പുണ്യവത്​കരിക്കുന്നതും.

ആ ദിവസങ്ങളിൽ നൗഫൽ മാത്രമല്ല, ഒരു പിടികൂട്ടുകാരെ ഒപ്പംകൂട്ടിയാണ്​ രക്തം നൽകാനെത്തുന്നതും. കഴിഞ്ഞ ദിവസം ഹമദിലെത്തിയതും അങ്ങനെതന്നെ. ഖത്തറിലെ പൊതു-സാമൂഹികരംഗങ്ങളിൽ സജീവ സാന്നിധ്യം കൂടിയാണ്​ സ്വകാര്യ കമ്പനിയിൽ ബിസിനസ്​ ഡെവലപ്​മെൻറ്​ മാനേജറായി ജോലിചെയ്യുന്ന നൗഫൽ.

നാട്ടിലും ഖത്തറിലുമായി നിരവധി സംഘടനകളുടെ നേതൃസ്ഥാനത്തും സജീവമായിരുന്നു. കോളജ്​ പഠന കാലത്ത്​ വിദ്യാർഥി പ്രസ്ഥാനങ്ങളിൽ ജില്ല ഭാരവാഹിയായിരുന്ന ഇദ്ദേഹം, ഖത്തറിൽ യൂത്ത്​ വിങ്​, ഇൻകാസ്​, ഡോം മലപ്പുറം ഉൾപ്പെടെ നിരവധി സംഘടനകളുടെ ഭാഗം കൂടിയാണ്​. അവരുടെയെല്ലാം രക്തദാന ക്യാമ്പുകൾക്ക്​ ചുക്കാൻ പിടിക്കുന്നതും നൗഫലാണ്​.

കഴിഞ്ഞ ഡിസംബർ 27ന്​ പിറന്നാളിനും റമദാനിലും രക്തദാനം ചെയ്​തു. ആറുമാസത്തിനിടെ മൂന്നുതവണയായി രക്തദാനം ചെയ്​തതായും നൗഫൽ 'ഗൾഫ്​ മാധ്യമ​'ത്തോട്​ പറഞ്ഞു.ഭാര്യ ഷബ്​നക്കും മകൻ ഇവാൻ മുഹമ്മദിനുമൊപ്പം ഖത്തറിൽ കുടുംബസമേതം കഴിയുന്നു.