ഖത്തറിന്​ പൊൻതൂവലായി എച്ച്.എം.സി

ദോഹ: ഹമദ് മെഡിക്കൽ കോർപറേഷന് (എച്ച്.എം.സി) കീഴിലെ അവയവമാറ്റ ശസ്​ത്രക്രിയ വിഭാഗം മേഖലയിലെതന്നെ മുൻനിര കേന്ദ്രമായി മാറുന്നു. അവയവമാറ്റ ശസ്​ത്രക്രിയയിലെ അത്യാധുനിക സംവിധാനങ്ങളാണ് ഹമദ് മെഡിക്കൽ കോർപറേഷനിൽ സജ്ജീകരിച്ചിരിക്കുന്നത്. രാജ്യത്തെ പ്രഥമ ശ്വാസകോശം മാറ്റിവെക്കൽ ശസ്​ത്രക്രിയ ഈയടുത്ത് വിജയകരമായി പൂർത്തിയാക്കിയത് എച്ച്.എം.സിയുടെ അവയവ മാറ്റിവെക്കൽ പദ്ധതിയി​ലെ നാഴികക്കല്ലായി.

1986ലാണ് ഖത്തറിൽ അവയവം മാറ്റിവെക്കുന്ന ശസ്​ത്രക്രിയകൾക്ക് തുടക്കം കുറിക്കുന്നത്. ഇതിന് ശേഷം ഓരോ വർഷവും നാൽപതോളം വൃക്ക മാറ്റിവെക്കൽ ശസ്​ത്രക്രിയകളാണ് എച്ച്.എം.സിയിൽ നടക്കുന്നത്. വൃക്ക, കരൾ തുടങ്ങിയവയും മാറ്റിവെച്ചിരുന്നു. ഇപ്പോൾ ശ്വാസകോശം മാറ്റിവെക്കൽ ശസ്​ത്രക്രിയക്കും തുടക്കംകുറിച്ചതാണ്​ നിർണായക നേട്ടം. മേഖലയിലെതന്നെ ഏറ്റവും സമഗ്രമായ അവയവമാറ്റ ശസ്​ത്രക്രിയ കേന്ദ്രമായി എച്ച്.എം.സി മാറിക്കൊണ്ടിരിക്കുകയാണ്.

അവയവം മാറ്റിവെക്കൽ രംഗത്തെ വിദഗ്ധരും പരിചയസമ്പന്നരായ സർജൻമാരും നഴ്സുമാരും സാമൂഹിക പ്രവർത്തകരും പുനരധിവാസ ജീവനക്കാരും ഡയറ്റീഷ്യൻസുമടങ്ങുന്ന വലിയ സംഘമാണ് അവയവയമാറ്റ ശസ്​ത്രക്രിയ പരിപാടിക്ക് പിന്നിൽ പ്രവർത്തിക്കുന്നതെന്ന് ചീഫ് മെഡിക്കൽ ഓഫിസർ ഡോ. അബ്​ദുല്ല അൽ അൻസാരി പറഞ്ഞു.

ദേശമോ വംശമോ നോക്കാതെ എല്ലാവർക്കും തുല്യവും ഗുണമേന്മയുള്ളതുമായ ചികിത്സ ഉറപ്പുവരുത്തുകയാണ് ലക്ഷ്യം. 2019ലാണ് ഹൃദയ, ശ്വാസകോശ മാറ്റിവെക്കൽ കർമസേനയെ നിയോഗിച്ചത്​. വലിയ കടമ്പകൾക്ക് ശേഷം പ്രഥമ ശ്വാസകോശം മാറ്റിവെക്കൽ ശസ്​ത്രക്രിയക്കാണ് എച്ച്.എം.സി സാക്ഷ്യം വഹിച്ചിരിക്കുന്നത്​. എച്ച്.എം.സിക്കും ഖത്തറിനും ഇത് അഭിമാനനേട്ടമാണ്​ -ഡോ. അൽ അൻസാരി കൂട്ടിച്ചേർത്തു.

അവയവദാനത്തിലൂടെയും അവയവം മാറ്റിവെക്കലിലൂടെയും വർഷങ്ങളായെടുത്ത പ്രവർത്തനങ്ങളുടെ ഫലമാണ് വിജയകരമായ ശ്വാസകോശം മാറ്റിവെക്കൽ ശസ്​ത്രക്രിയയെന്ന് ഹമദ് ജനറൽ ആശുപത്രി മെഡിക്കൽ ഡയറക്ടർ ഡോ. യൂസുഫ് അൽ മസ്​ലമാനി പറഞ്ഞു. പ്രാദേശികമായും അന്തർദേശീയതലത്തിലുള്ളതുമായ പരിചയസമ്പന്നരും വിദഗ്ധരുമാണ് ഇതിൽ പ്രവർത്തിക്കുന്നതെന്നും ഡോ. അൽ മസ്​ലമാനി വ്യക്തമാക്കി.