'അസാധ്യമായി ഒന്നുമില്ല'; ചിഞ്ചു എഴുതിത്തീർത്തത്​ ചരിത്രം

ദോഹ: 'നത്തിങ്​ ഈസ്​ ഇംപോസിബ്​ൾ' -എന്ന ഒറ്റവാക്കുകൊണ്ട്​ അസാധ്യമായി ഒന്നുമില്ലെന്ന്​ തെളിയിച്ചിരിക്കുകയാണ്​ ഖത്തർ പ്രവാസിയായ തൃശൂർ ചാലക്കുടിക്കാരി ചിഞ്ചു വർഗീസ്​. ഒറ്റവാക്കിനെ 80 രൂപത്തിൽ എഴുതിത്തീർത്ത്​ ഈ മലയാളി നടന്നുകയറിയത്​ ഇന്ത്യ ബുക്​ ​ഓഫ്​ റെക്കോഡ്​സിൻെറ പട്ടികയിലേക്ക്​. വ്യത്യസ്​തങ്ങളായ മികവുമായി ചരിത്രം സൃഷ്​ടിച്ചവർക്ക്​ ഇടം നൽകുന്ന 'ഇന്ത്യ ബുക്​ ഓഫ്​ റെക്കോഡിൻെറ' അംഗീകാരം കഴിഞ്ഞ ദിവസം ചിഞ്ചുവിനെ തേടിയെത്തി. 'nothing is impossible' എന്ന ഇംഗ്ലീഷ്​ വാചകത്തെ 80 വ്യത്യസ്​ത ശൈലിയിൽ സ്വന്തം കൈപ്പടകൊണ്ട്​ എഴുതിത്തീർത്താണ്​ ഇവർ റെക്കോഡ്​ ബുക്കിൽ ഇടം പിടിച്ചത്​.

രണ്ടു​ മണിക്കൂർ നീണ്ട സാഹസം അവസാനിക്കു​േമ്പാഴേക്കും 24ഓളം പേജുകൾ കടന്നു. എഴുതിയ പേപ്പറുകളും വിഡീയോയുമെല്ലാം ഇന്ത്യ ബുക്​ അധികൃതർക്ക്​ അയച്ചുനൽകിയ ശേഷം, അവരുടെ പരിശോധനയും കഴിഞ്ഞാണ്​ ഇവ​െര 2022 റെക്കോഡ്​ ബുക്കിൽ ഉൾപ്പെടുത്തിയത്​.

2016ൽ വിവാഹം കഴിഞ്ഞ്​ ആറുമാസത്തിനുശേഷം ഖത്തറിലെത്തിയ ചിഞ്ചു മുഖയ്​നിസിലായിരുന്നു താമസം. കഴിഞ്ഞ ഏപ്രിലിൽ പിതാവ്​ വർഗീസ്​ മണവാളൻെറ മരണത്തെ തുടർന്ന്​ നാട്ടിലെത്തിയതാണ്​. തൻെറ പഠനത്തിനും കലാപരിപാടികൾക്കും പ്രോത്സാഹനം നൽകിയ പിതാവ്​ വിട്ടുപിരിഞ്ഞ ശേഷമായിരുന്നു ചിഞ്ചു ഇന്ത്യ റെക്കോഡിനായി ശ്രമിച്ചത്​. മേയ്​ 16ന്​ വീട്ടിൽ ഇരുന്നു തന്നെയായിരുന്നു എഴുത്ത്​ പൂർത്തിയാക്കിയത്​. അപ്പച്ചൻെറ ചിത്രം സാക്ഷിയാക്കിയായിരുന്നു തൻെറ ചരിത്ര രചനയെന്ന്​ ചിഞ്ചു 'ഗൾഫ്​ മാധ്യമ​'ത്തോട്​ പറയുന്നു.

തൃശൂർ നിർമല കോളജിൽ നിന്നും ബിരുദവും എം.ജി സർവകലാശായിൽനിന്ന്​ എം.ബി.എയും കഴിഞ്ഞ ഇവർ കോളജ്​ അധ്യാപികയായി ഇടക്കാലത്ത്​ പ്രവർത്തിച്ചിരുന്നു. വിവാഹ ശേഷം ഖത്തറിലെത്തിയപ്പോൾ കുടുംബിനിയായി മാറിയതോടെയാണ്​ പഠനകാലത്തെ കലാപ്രവർത്തനങ്ങൾ വീണ്ടും പൊടിതട്ടിയെടുത്തത്​. ചിത്രരചനയും പെയിൻറിങ്ങുമായി സജീവമാവുന്നതിനിടെയാണ്​ പു​തിയൊരു റെക്കോഡ്​ കുറിച്ചത്​. ഖത്തർ എവർവേസിൽ ജോലിചെയ്യുന്ന റോബിനാണ്​ ഭർത്താവ്​. മകൻ നാലുവയസ്സുകാരൻ ഇവാൻ. അമ്മ എൽസി.