സ്വാ​ത​ന്ത്ര്യ​ദി​ന ആ​ഘോ​ഷ​ങ്ങ​ൾ​ക്ക്​ തു​ട​ക്ക​മാ​യി

ദോ​ഹ: ​സ്വാ​ത​​ന്ത്ര്യ ദി​നാ​ഘോ​ഷ​ങ്ങ​ളു​ടെ ആ​ഗ​സ്റ്റി​നെ വ​ര​വേ​റ്റ്​ ഖ​ത്ത​റി​ലെ ഇ​ന്ത്യ​ൻ സ​മൂ​ഹം. രാ​ജ്യ​ത്തി​ന്‍റെ 75ാമ​ത്​ സ്വാ​ത​ന്ത്ര്യ​ദി​നം ആ​ഘോ​ഷി​ക്കു​ന്ന ആ​സാ​ദി കാ ​അ​മൃ​ത്​ മ​ഹോ​ത്സ​വ​ത്തി​ന്‍റെ ഭാ​ഗ​മാ​യി ഇ​ന്ത്യ​ൻ ക​ൾ​ച​റ​ൽ സെ​ന്‍റ​ർ സം​ഘ​ടി​പ്പി​ക്കു​ന്ന സാം​സ്കാ​രി​ക പ​രി​പാ​ടി​ക​ൾ​ക്ക്​ പ്രൗ​ഢ​ഗം​ഭീ​ര​മാ​യി തു​ട​ക്കം കു​റി​ച്ചു. സം​ഗീ​ത, നൃ​ത്ത​മേ​ള​ക​ളോ​ടെ​യാ​ണ്​ തി​ങ്ക​ളാ​ഴ്ച ആ​ഘോ​ഷ​ങ്ങ​ൾ​ക്ക്​ തു​ട​ക്കം കു​റി​ച്ച​ത്.

ദേ​ശ​ഭ​ക്​​തി ഗാ​ന​ങ്ങ​ളും നൃ​ത്ത​ങ്ങ​ളും ക​ലാ​രൂ​പ​ങ്ങ​ളു​മാ​യി ത്രി​വ​ർ​ണ​ത്തി​ൽ ചാ​ലി​ച്ച പ​രി​പാ​ടി​ക​ളോ​ടെ​യാ​ണ്​ ഐ.​സി.​സി അ​ശോ​ക ഹാ​ളി​ൽ മെ​ഗാ കാ​ർ​ണി​വ​ലി​ന്​ തു​ട​ക്ക​മാ​യ​ത്. ആ​ഗ​സ്റ്റ്​ ഒ​ന്നി​ന്​ ആ​രം​ഭം കു​റി​ച്ച പ​രി​പാ​ടി​ക​ൾ 19ാം തീ​യ​തി​വ​രെ നീ​ണ്ടു​നി​ൽ​ക്കും.

തി​ങ്ക​ളാ​ഴ്ച ഐ.​സി.​സി അ​ശോ​ക ഹാ​ളി​ല്‍ ഇ​ന്ത്യ​ന്‍ അം​ബാ​സ​ഡ​ർ ഡോ. ​ദീ​പ​ക് മി​ത്ത​ല്‍ ഉ​ദ്ഘാ​ട​നം ചെ​യ്തു. ത​ത്സ​മ​യ സം​ഗീ​ത​വും നൃ​ത്ത​വും കോ​ര്‍ത്തി​ണ​ക്കി ഒ​രു മ​ണി​ക്കൂ​റി​ല​ധി​കം നീ​ണ്ട പ​രി​പാ​ടി​ക​ളാ​ണ് ഉ​ദ്ഘാ​ട​ന ദി​ന​ത്തി​ല്‍ അ​ര​ങ്ങേ​റി​യ​ത്. തി​ര​ഞ്ഞെ​ടു​ക്ക​പ്പെ​ട്ട ഗ്രൂ​പ്പു​ക​ളാ​ണ് ആ​ദ്യ​ദി​ന​ത്തി​ല്‍ ക​ലാ​പ​രി​പാ​ടി​ക​ള്‍ അ​വ​ത​രി​പ്പി​ച്ച​ത്. ദേ​ശ​ഭ​ക്​​തി ഗാ​ന​ങ്ങ​ൾ കോ​ർ​ത്തി​ണ​ക്കി​യ ഫ്യൂ​ഷ​ൻ സം​ഗീ​ത​ത്തോ​ടെ​യാ​യി​രു​ന്നു ച​ട​ങ്ങു​ക​ൾ​ക്ക്​ തു​ട​ക്കം കു​റി​ച്ച​ത്. തു​ട​ർ​ന്ന്, ​നൃ​ത്ത പ​രി​പാ​ടി​ക​ളും മ​റ്റു​മാ​യി ഒ​രു മ​ണി​ക്കൂ​റി​ലേ​റെ പ​രി​പാ​ടി​ക​ൾ നീ​ണ്ടു​നി​ന്നു.

ര​ണ്ടാം ദി​ന​മാ​യ ചൊ​വ്വാ​ഴ്ച ഐ.​സി.​സി യൂ​ത്ത് വി​ങ്ങി​ന്റെ നേ​തൃ​ത്വ​ത്തി​ൽ പ​രി​പാ​ടി​ക​ള്‍ അ​ര​ങ്ങേ​റി. ബു​ധ​നാ​ഴ്ച ലൈ​വ് ഓ​ര്‍ക്ക​സ്ട്ര​യു​മാ​യി ആ​സ്വാ​ദ​ക​രു​ടെ മ​നം ക​വ​രും. ദി​വ​സ​വും വൈ​കീ​ട്ട് 7.30 മു​ത​ല്‍ 8.30 വ​രെ​യാ​ണ് സം​ഗീ​ത-​നൃ​ത്ത മേ​ള ന​ട​ക്കു​ന്ന​ത്. നാ​ളെ ക​ര്‍ണാ​ട​ക സം​ഘ ഖ​ത്ത​റി​ന്റെ സം​ഗീ​ത നി​ശ​യാ​ണ് അ​ര​ങ്ങേ​റു​ന്ന​ത്.

വെ​ള്ളി​യാ​ഴ്​​ച വി​വി​ധ പ​രി​പാ​ടി​ക​ളാ​ണ്​ ഇ​ന്ത്യ​ൻ സ​മൂ​ഹ​ത്തി​നാ​യി കാ​ത്തി​രി​ക്കു​ന്ന​ത്. പോ​സ്റ്റ​ർ നി​ർ​മാ​ണം, ഉ​പ​ന്യാ​സ മ​ത്സ​രം, ക​വി​ത ര​ച​ന, പോ​സ്റ്റ്​ കാ​ർ​ഡ്​ നി​ർ​മാ​ണം, രം​​ഗോ​ലി എ​ന്നി​വ​യു​മാ​യി ഉ​ച്ച 12 മു​ത​ൽ മ​ത്സ​ര​വേ​ദി​ക​ൾ സ​ജീ​വ​മാ​കും. തു​ട​ർ​ന്ന്​ രാ​ത്രി 7.30 മു​ത​ൽ ഇ​ൻ​കാ​സ്​ ഖ​ത്ത​ർ നേ​തൃ​ത്വ​ത്തി​ൽ ക​ൾ​ച​റ​ൽ പ​രി​പാ​ടി​ക​ളും അ​ര​ങ്ങേ​റും.

ഐ.​സി.​സി സ്വാ​ത​ന്ത്ര്യ​ദി​നാ​ഘോ​ഷ പ​രി​പാ​ടി​യി​ൽ അ​വ​ത​രി​പ്പി​ച്ച നൃ​ത്തം