ഇന്ത്യൻ എംബസി ചോദിക്കുന്നു: പാസ്​പോർട്ട്​ വീട്ടുപടിക്കൽ വേണോ​?

ദോഹ: അധിക ചാർജ്​ നൽകി പാസ്​പോർട്ട്​ തപാൽവഴി വീട്ടുപടിക്കൽ എത്തിക്കുന്ന സേവനത്തിൽ നിങ്ങൾക്ക്​ താൽപര്യമുണ്ടോ? -പ്രവാസി ഇന്ത്യക്കാരോടായി ഖത്തറിലെ ഇന്ത്യൻ എംബസിയുടേതാണ്​ ചോദ്യം.

എംബസി വഴി പുതുക്കാൻ അപേക്ഷിക്കുന്ന പാസ്​പോർട്ടുകൾ തിരികെ, തപാൽ വഴി അയക്കുന്ന സംവിധാന​ത്തെ കുറിച്ചാണ്​ ഖത്തറിലെ ഇന്ത്യൻ നയതന്ത്ര കാര്യാലയത്തിൻെറ ആലോചന. ഇതിനായി സമൂഹമാധ്യമങ്ങൾ വഴി പ്രവാസി ഇന്ത്യക്കാരിൽനിന്നും എംബസി അഭിപ്രായങ്ങളും ക്ഷണിച്ചുതുടങ്ങി. ഇന്ത്യൻ എംബസിയുടെ ഫേസ്​ബുക്ക്​​, ട്വിറ്റർ പേജുകൾ വഴി അഭിപ്രായ വോ​ട്ടെടുപ്പിലൂടെയാണ്​ പ്രതികരണം സമാഹരിക്കുന്നത്​.

നാലു ദിവസമായി തുടരുന്ന സർവേയിൽ പുതിയ നീക്കത്തെ പ്രവാസിസമൂഹം ഒന്നാകെ സ്വാഗതം ചെയ്യുന്നു. 15 മുതൽ 20വരെ ഖത്തർ റിയാൽ അധികമായി ഈടാക്കുന്ന തപാൽ ഡെലിവറി സംവിധാനത്തിൽ താൽപര്യമുണ്ടോ എന്നായിരുന്നു ചോദ്യം. ട്വിറ്റർ വഴിയുള്ള വോ​ട്ടെടുപ്പ്​ കഴിഞ്ഞ ദിവസം അവസാനിപ്പിച്ചെങ്കിലും ഫേസ്​ ബുക്കിലൂടെ ഇപ്പോഴും അ​ഭിപ്രായ സമാഹരണം തുടരുന്നു.

ട്വിറ്ററിൽ 462 പേർ അഭിപ്രായം രേഖപ്പെടുത്തി. ഇവരിൽ എംബസിയുടെ നീക്കത്തെ സ്വാഗതം ചെയ്യുന്നവരായിരുന്നു ഭൂരിപ​ക്ഷവും. 87.6 ശതമാനം പേരാണ്​ അതേ എന്ന്​ രേഖപ്പെടുത്തിയത്​. എതിരഭിപ്രായമുള്ളത്​ വെറും 12.4 ശതമാനം പേർക്ക്​.

ഫേസ്​ബുക്കിൽ ഗൂഗി​ൾ ഫോറം വഴിയാണ്​ വോ​ട്ടെടുപ്പ്​.വോ​ട്ട്​ ചെയ്യാനുള്ള ​ഓപ്​ഷനുതാഴെ കമൻഡ്​​ ബോക്​സിലെത്തിയും പ്രവാസികൾ തങ്ങളുടെ അഭിപ്രായം രേഖപ്പെടുത്തുന്നു.പാസ്​പോർട്ട്​ പുതുക്കുന്നതിനായി വാങ്ങുന്ന ഫീസിൽ ഉൾപ്പെടുത്തി തന്നെ തപാൽവഴി വീട്ടിലെത്തിക്കാൻ തയാറാവണമെന്ന്​ ട്വിറ്ററിൽ ​'രാജ' എന്ന പ്രൊഫൈലിൽ ഒരാൾ ആവശ്യപ്പെടുന്നു.

പോസ്​റ്റൽ സർവിസ്​ നല്ല നീക്കമാണ്​. എംബസിയുടെ മറ്റു സേവനങ്ങൾകൂടി ഓൺലൈൻ വഴിയാക്കിയാൽ സൗകര്യമാവും എന്നാണ്​ ഷാകിർ സെയ്​ദ്​ എന്ന പ്രൊഫൈൽ ആവശ്യപ്പെടുന്നത്​.ഡെലിവറി മാത്രമല്ല, പാസ്​പോർട്ട്​ പുതുക്കുന്നതിനുള്ള അപേക്ഷ സമർപ്പിക്കലും ഓൺലൈൻ വഴിയാക്കണമെന്നാണ്​ മറ്റൊരാളുടെ ആവശ്യം.

പൊതുജനങ്ങളുടെ അഭിപ്രായമറിഞ്ഞശേഷം ഇതുസംബന്ധിച്ച്​ തീരുമാനമെടുക്കുമെന്നാണ്​ എംബസിയുടെ അറിയിപ്പ്​. പ്രവാസിസമൂഹം ​സ്വാഗതം ചെയ്യുകയാണെങ്കിൽ, ഖത്തറിലെ തപാൽസേവനങ്ങളുടെ കാര്യക്ഷമതകൂടി ഉറപ്പാക്കിയശേഷം അധിക ചാർജ്​ ഈടാക്കി വൈകാതെ തന്നെ പുതുക്കുന്ന പാസ്​പോർട്ടുകളുടെ ഡോർ ഡെലിവറി സംവിധാനം സാക്ഷാത്​കരിക്കപ്പെടും. ഇതുവഴി, സമയലാഭം, സാമ്പത്തികലാഭം, സുരക്ഷിതത്വം തുടങ്ങി പല നേട്ടങ്ങളാണ്​ പ്രവാസികളെ കാത്തിരിക്കുന്നത്​.

'എംബസിയുടേത്​ നല്ല നീക്കം'

'ഇന്ത്യൻ എംബസിയുടെ ഏറ്റവും പോസിറ്റിവായ നീക്കമാണിത്​. നിലവിൽ ഞാൻ വക്രയിലാണ്​ താമസിക്കുന്നത്​. ഒ​ാരോ ആവശ്യത്തിനുമായി ഇന്ത്യൻ എംബസിയിലെത്തുക പ്രായോഗിക ബുദ്ധിമുട്ടാണ്​. സ്വന്തം വാഹനവുമായി പോയാൽ ഡി​േപ്ലാമാറ്റിക്​ ഏരിയയായ എംബസി പരിസരങ്ങളിൽ പാർക്കിങ്​ ഏറെ ബുദ്ധിമുട്ടാണ്​.

അതൊഴിവാക്കാൻ പല ആവശ്യങ്ങൾക്കും ടാക്​സി വിളിച്ചാണ്​ എംബസിയിലേക്ക്​ പോവുക. അപ്പോൾ 80 റിയാൽ എങ്കിലും ചുരങ്ങിയത്​ ചെലവാകും. 15-20 റിയാൽ അധികം ഈടാക്കിയാലും പാസ്​പോർട്ട്​ തപാൽവഴി വീട്ടിലെത്തിക്കാനാവുമെങ്കിൽ വലിയ സൗകര്യമാവും. പാസ്​പോർട്ട്​ പുതുക്കുന്നസമയങ്ങളിൽ പോസ്​റ്റൽ ഡെലിവറി വേ​ണോ, നേരിട്ടുവന്ന്​ കലക്​ട്​ ചെയ്യുമോ എന്ന ഓപ്​ഷൻ വെച്ചാൽ ഫലപ്രദമാവും'

(ഖത്തർ എയർവേസ്​​ ടെക്​നിക്കൽ റിക്വയർമെൻറ്​ വിഭാഗം സീനിയർ പ്രോഗ്രാം ഓഫിസറായ സന്ധ്യ കണ്ണൂർ ഇരിക്കൂർ സ്വദേശിയാണ്​. 13 വർഷമായി കുടുംബ സമേതം ഖത്തറിലുണ്ട്​)

'സമയവും പണവും ലാഭിക്കാം; സുരക്ഷിതത്വവും'

'എല്ലാ പ്രവാസി ഇന്ത്യക്കാർക്കും ഉപകാരപ്പെടുന്ന നീക്കമാണിത്​. പാസ്​പോർട്ട്​ ഉൾപ്പെടെയുള്ള സേവനങ്ങൾ തപാൽവഴിയാക്കുകയാണെങ്കിൽ സ്വാഗതാർഹം. കോവിഡ്​ സാഹചര്യത്തിൽ സേവനങ്ങൾ വീട്ടുപടിക്കൽ എത്തുന്നത്​ ഏറെ സുരക്ഷിതത്വം നൽകുന്നതാണ്​.

താഴ്​ന്ന വരുമാനമുള്ളവർക്കും മറ്റുമായി പൊതുവാഹന സംവിധാനമുപയോഗിക്കുന്നവർക്ക്​ അത്തരമൊരു സാഹചര്യം ഒഴിവാക്കാൻ കഴിയുന്നത്​ ഏറ്റവും സൗകര്യം.

സമയലാഭമാണ്​ മറ്റൊരു നല്ലകാര്യം. ​േജാലിയിൽനിന്ന്​ അവധിയെടുത്ത്​ പോവുന്നതും എംബസിയിലെത്തി ടോക്കൺ എടുത്ത്​ കാത്തിരിക്കുന്നതും ഒഴിവാകുന്നതുതന്നെ ആശ്വാസകരമാണ്​. സാമ്പത്തികമായി നേട്ടമാവുന്നത്​ മൂന്നാമത്തെ നേട്ടം. 20 റിയാൽവരെ എംബസി ഈടാക്കിയാലും ടാക്​സി വിളിച്ച്​ പോവു​േമ്പാഴുള്ള ​െചലവും ഡ്യൂട്ടി അവധി എടുക്കുന്നതിലെ നഷ്​ടവുമെല്ലാം കണക്കാക്കു​േമ്പാൾ ഏറെ ലാഭകരമാണ്​ ഈ നീക്കം.

എല്ലാ മേഖലയും ഓൺലൈനായി മാറിയ കാലത്ത്​ എംബസിയുടെ മറ്റ്​ സേവനങ്ങൾകൂടി ഓൺലൈനായി മാറുന്നത്​ ഏറെ ആശ്വാസമാവും'.

(ന്യൂദോഹ വാട്ടർ ട്രീറ്റ്​മെൻറ്​ കമ്പനിയുടെ ബിസിനസ്​ ഡെവലപ്​മെൻറ്​ മാനേജറായി പ്രവർത്തിക്കുകയാണ്​ മലപ്പുറം മഞ്ചേരി സ്വദേശിയായ ശ്യാം)

എല്ലാവർക്കും ഗുണകരം

'ഒരു സംശവുമില്ല ഞങ്ങളെ പോലുള്ളവർക്ക്​ ഏറ്റവും ഗുണകരമായ കാര്യമാണിത്​.

സ്വന്തമായി വാഹനമൊന്നുമില്ലാത്തവർക്ക്​ വലിയ ബുദ്ധിമുട്ടാണ്​ നേരിട്ട്​ എംബസിയിലെത്തി പാസ്​പോർട്ട്​ വാങ്ങുകയെന്നത്​. പലപ്പോഴും രണ്ടും മൂന്നും തവണയെല്ലാം പോയി വരണം. ലീവെടുത്തും മറ്റും പോവുന്നത്​ പ്രയാസമാണ്​. അപേക്ഷിച്ചുകഴിഞ്ഞാൽ സമയമാവു​േമ്പാൾ തപാൽവഴി എത്തുമെങ്കിൽ സമയവും ​കാശും ലാഭിക്കാനാവും'

(​സ്വകാര്യ കമ്പനിയിൽ ഡ്രൈവറായി ജോലി ചെയ്യുന്നു, മലപ്പുറം ചേകന്നൂർ സ്വദേശി)