ഹനിയ്യയെ അന്ത്യയാത്രയാക്കാൻ ജൂത റബായിമാരെത്തി; ആരാണ്​​ സ്വതന്ത്ര ഫലസ്​തീന്​ പിന്തുണ നൽകുന്ന ‘നെതുറെ കർത’​ വിഭാഗം?

ദോഹ: വെള്ളിയാഴ്​ച ദോഹയിൽ നടന്ന ഹമാസ്​ നേതാവ്​ ഇസ്​മാഈൽ ഹനിയ്യയുടെ മയ്യിത്ത്​ നമസ്​കാരത്തിന് പിന്നാലെ സാമൂഹിക മാധ്യമങ്ങളിൽ നിറഞ്ഞു നിൽക്കുന്നത്​ രണ്ട്​ ജൂത പുരോഹിതരു​ടെ ചിത്രങ്ങളാണ്​. റബായിമാരുടെ വേഷത്തിൽ ഫലസ്​തീൻ കഫിയ്യ അണിഞ്ഞ്​, ഫലസ്​തീനും ചെറുത്തുനിൽപ്​ പോരാളികൾക്കും പിന്തുണ നൽകുന്ന പ്ലക്കാർഡുമേന്തി ജനാസ നമസ്​കാരത്തിൻെറ ഭാഗമാവാനെത്തിയ രണ്ടുപേർ. സുരക്ഷാ പരിശോധന കടന്ന്​ പള്ളിയിലേക്ക്​ നടന്നുനീങ്ങുന്ന വിഡിയോ ദൃശ്യങ്ങളും പിന്നാലെ, നമസ്​കാര ശേഷം പ്ലക്കാർഡേന്തിയും കഫിയ്യ അണിഞ്ഞും അവർ ഫലസ്​തീന്​ പിന്തുണയും നൽകുന്നു.

ബുധനാഴ്​ച തെഹ്​റാനിൽ വെച്ച്​ കൊല്ലപ്പെട്ട ഇസ്​മാഈൽ ഹനിയ്യക്ക്​ ആദരവർപ്പിക്കാനും, ഫലസ്​തീൻ ചെറുത്തുനിൽപ്​ പോരാട്ടങ്ങളോട്​ ഐക്യപ്പെടാനുമായിരുന്നു ജൂത സമൂഹത്തിലെ ന്യൂനപക്ഷ വിഭാഗമായ ‘നെതുറെ കർത’ എന്ന സംഘാംഗങ്ങൾ ദോഹയിലെത്തിയത്​. ‘ജൂതന്മാർ സയണിസ്​റ്റുകളല്ല’ എന്ന സന്ദേശമുള്ള പ്ലക്കാർഡുകളേന്തിയായിരുന്നു ഇമാം മുഹമ്മദ്​ബിനു അബ്​ദുൽവഹാബ്​ പള്ളിയിൽ ഇവർ ഹനിയ്യക്ക്​ അന്ത്യാഞ്​ജലി അർപ്പിച്ചത്​.

സയണിസ്​റ്റ്​ വിരുദ്ധരായ ഈ സംഘം സ്വതന്ത്ര ഫലസ്​തീന് വേണ്ടിയുള്ള വാദത്തിലൂടെ പ്രശസ്​തരാണ്​. ‘നഗരത്തിൻെറ കാവൽക്കാർ’ എന്നർഥമുള്ള അരാമിക് പദമാണ് ‘നെതുറെ കർത’. സയണിസത്തെ നിരാകരിക്കുകയും ഇസ്രായേൽ രാഷ്ട്ര നിലനിൽപിനെ എതിർക്കുകയും ചെയ്യുന്ന ജൂത പ്രസ്ഥാനമാണ്​ ഇത്​. ഇ​സ്രായേലിൻെറ ആക്രമണങ്ങളെയും അധിനിവേശത്തെയും തുറന്നെതിർക്കുന്നതിലൂടെയും ഇവർ ശ്രദ്ധേയമാണ്​. അക്രമണങ്ങളിലൂടെ ഭൂമി കൈവശപ്പെടുത്തുന്നത്​ ‘ദൈവഹിതത്തിന്​ വിരുദ്ധമാണെന്ന്​ വാദിക്കുകയും ഫലസതീൻ മണ്ണ്​ ഫലസ്​തീനികൾക്ക്​ തിരികെ നൽകണമെന്ന്​ ആവശ്യപ്പെടുകയും ചെയ്യുന്ന ‘നെതുറെ കർത’ 1935ലാണ് രൂപവത്കരിക്കുന്നത്​. ജറുസലേം ആസ്​ഥാനമായി പ്രവർത്തിക്കുന്നവർ അമേരിക്ക, ബ്രിട്ടൻ തുടങ്ങിയ രാജ്യങ്ങളിലുമുണ്ട്​.

ഇസ്​മാഈൽ ഹനിയ വധിക്കപ്പെട്ട വാർത്തക്കു പിന്നാലെ, അപലപിച്ചും ആക്രമണങ്ങളെ തള്ളിയും നതുറെ കർത റബായിമാർ രംഗത്തെത്തിയിരുന്നു. ഇസ്​മാഈൽ ഹനിയക്ക്​ ഫലസ്​തീൻെറ ഭൂപടമുള്ള ചിത്രം സമ്മാനിക്കുന്ന ഫോ​ട്ടോ പങ്കുവെച്ചുകൊണ്ടായിരുന്നു ‘നതുറെ കർത’യുടെ അനുശോചനം.