സൗദി - ഖത്തർ സഹകരണം; സൽമാൻ രാജാവ്​ ഖത്തർ അമീറിന്​ കത്തയച്ചു

ജിദ്ദ: സൗദിക്കും ഖത്തറിനുമിടയിൽ സഹകരണവും പിന്തുണയും ശക്തിപ്പെടുത്തുന്നതിനായി സൗദി ഭരണാധികാരി സൽമാൻ രാജാവ്​ ഖത്തർ അമീർ ശൈഖ്​ ​തമീം ബിൻ ഹമദ്​ ആൽഥാനിക്ക്​ കത്തയച്ചു. സൗദി വിദേശകാര്യ മന്ത്രി അമീർ ഫൈസൽ ബിൻ ഫർഹാൻ ദോഹയിലെ അമീരി ദിവാനിയിൽ എത്തി ഖത്തർ അമീറിന്​​ കത്ത്​ കൈമാറി. സ്വീകരണ വേളയിൽ സൽമാൻ രാജാവി​െൻറ ആശംസകൾ വിദേശകാര്യ മന്ത്രി ഖത്തർ അമീറിന്​ കൈമാറി. ഖത്തർ ജനതക്ക്​ കൂടുതൽ പുരോഗതിയും സമൃദ്ധിയും നേരുകയും ചെയ്​തു. ഖത്തറിലെ സൗദി അംബാസഡർ അമീർ മൻസൂർ ബിൻ ഖാലിദ് ബിൻ ഫർഹാൻ, വിദേശകാര്യ മന്ത്രി ഒാഫീസ്​ ജനറൽ മേധാവി അബ്​ദുൽറഹ്​മാൻ അൽദാവൂദ് എന്നിവരും ഒപ്പമുണ്ടായിരുന്നു.