കളിമാത്രമല്ല; വായുവും ശുദ്ധമാവും

ദോഹ: എല്ലാം സംശുദ്ധമായിരിക്കണമെന്ന്​ ലോകകപ്പ്​ സംഘാടകർക്ക്​ നിർബന്ധമാണ്​. കളി മൈതാനവും സ്​റ്റേഡിയങ്ങളും റോഡുകളും മാത്രമല്ല, വായും ശുദ്ധമായിരിക്കണമെന്ന നിർബന്ധബുദ്ധി. അതിൻെറ ഭാഗമായാണ്​ ലോകകപ്പ്​ വേദികളിലെ അന്തരീക്ഷവായുവിൻെറ നില പരിശോധിക്കുന്ന 'എയർ ക്വാളിറ്റി മോണിറ്ററിങ്​ സ്​റ്റേഷൻ' സുപ്രിംകമ്മിറ്റി സ്ഥാപിക്കുന്നത്​. ലോകകപ്പ്​ വേദികളിൽ സ്​ഥാപിക്കുന്നതിന്​ മ​ുന്നോടിയായി ഖത്തർ സർവകലാശാലാ പരിശീലന കേന്ദ്രത്തിൽതന്നെ കഴിഞ്ഞ ദിവസം നിരീക്ഷണ യൂനിറ്റ്​ സ്ഥാപിച്ചു.

സുപ്രീംകമ്മിറ്റിയും മുനിസിപ്പാലിറ്റി-പരിസ്ഥിതി മന്ത്രാലയവും ചേർന്നാണ്​ മോണിറ്ററിങ്​ സ്​റ്റേഷൻ ഒരുക്കിയത്​. അധികം വൈകാതെ ലോകകപ്പ്​ വേദികളിലൊന്നായ അൽജനൂബ്​ സ്​റ്റേഡിയത്തിൽ അടുത്ത യൂനിറ്റ്​ സ്ഥാപിക്കും. അന്തരീക്ഷ വായുവിൻെറ അളവ്​, താപനില, മറ്റു ഘടകങ്ങൾഎന്നിവയെല്ലാം മോണിറ്ററിങ്​ സ്​റ്റേഷൻ നിരീക്ഷിക്കും.

സ്​റ്റേഷനിൽനിന്നുള്ള റിപ്പോർട്ടിൻെറ അടിസ്ഥാനത്തിൽ അന്തരീക്ഷ വായു മെച്ചപ്പെടുത്താനുള്ള നടപടികൾ സ്വീകരിക്കാൻ കഴിയുമെന്ന്​ സുപ്രീംകമ്മിറ്റി ലോക്കൽ സ്​റ്റേക്​ഹോൾഡർ മാനേജർ ജാസിം അൽ ജൈദ അറിയിച്ചു.പരിസ്ഥിതി സൗഹൃദമായ ലോകകപ്പ്​ എന്ന ലക്ഷ്യത്തിൽ ഒന്നു മാത്രമാണ്​ ശുദ്ധമായ അന്തരീക്ഷവായു ഉറപ്പാക്കുക എന്നതും​.