വെറും കത്തുകളല്ല, ഇത്​ ആരോഗ്യപ്രവർത്തകർക്കുള്ള ആദരം

ദോഹ: ഖത്തറിൽ കോവിഡ്-19 പ്രതിരോധ രംഗത്ത് കഠിന പ്രയത്നത്തിലേർപ്പെടുന്ന ആരോഗ്യ പ്രവർത്തകർക്ക് നന്ദി അറിയിക്കാൻ കത്തെഴുതൽ കാമ്പയിനുമായി ഒരു മിടുക്കി. ബിർളാ പബ്ലിക് സ്​കൂളിലെ പൂർവ വിദ്യാർഥിയും പഞ്ചാബ്​ സ്വദേശിയുമായ 17കാരി റിയാ മഹാജനാണ് കാമ്പയിന് പിന്നിൽ.

പർഡ്യൂ യൂനിവേഴ്സിറ്റിയിലേക്ക് ഉപരിപഠനത്തിനായി പ്രവേശനം നേടിയിരിക്കുന്ന റിയ എല്ലാവരോടും ഇത്തരത്തിൽ കത്തെഴുതാൻ ആവശ്യപ്പെടുകയുമാണ്​. കുട്ടികൾ, യുവാക്കൾ, മുതിർന്നവർ എല്ലാവർക്കും കത്തുകളെഴുതാം. ചെറിയ കുറിപ്പുകൾ അല്ലെങ്കിൽ ചുരുങ്ങിയത് ഒരു ചിത്രമെങ്കിലും ആരോഗ്യ പ്രവർത്തകർക്ക് നന്ദി പ്രകാശിപ്പിക്കാനായി സമർപ്പിക്കാം. ഈ എഴുത്തുകൾ സ്​കാൻ ചെയ്ത് ആശുപത്രികളിലേക്കും അവിടെനിന്ന് ആരോഗ്യ പ്രവർത്തകർക്കും അയക്കും.

റിയയുടെ പിതാവ്​ നരിന്ദർ കുമാർ ഡോക്ടറാണ്. കാമ്പയിൻ ആരംഭിച്ച് ഇതിനോടകംതന്നെ നിരവധി കത്തുകളും ചിത്രങ്ങളുമാണ് റിയക്ക് ലഭിച്ചിരിക്കുന്നത്. ഇതുമായി ബന്ധപ്പെട്ട്​ സ്​കൂളുകളെയും കോളജുകളെയും സമീപിക്കുമെന്നും റിയ പറയുന്നു.മുൻനിര ആരോഗ്യ പ്രവർത്തകർക്ക് നന്ദി അറിയിച്ച് എഴുത്തുകളും ചിത്രങ്ങളും കൈമാറാൻ താൽപര്യമുള്ളവർക്ക് അവ സ്​കാൻ ചെയ്ത് lettersforgood2020@gmail.com എന്ന വിലാസത്തിലേക്ക് അയക്കാം.