ഇനി നല്ല തണുപ്പൻ സൗന്ദ​ര്യത്തിലലിയാം

ദോഹ: അടുത്തയാഴ്​ച മുതൽ രാജ്യത്ത്​ തണുപ്പുകാല ക്യാമ്പിങ്​ സീസണിന്​ തുടക്കം. ഇനി നല്ല രസികൻ തണുപ്പേറ്റ്​ മരുഭൂമിയിലും മറ്റും ടെൻറുകൾക്കുള്ളിൽ കഴിഞ്ഞുകൂടാം. ഇതുമായി ബന്ധപ്പെട്ട്​ മുനിസിപ്പാലിറ്റി പരിസ്​ഥിതി മന്ത്രാലയം നടപടികൾ തുടങ്ങി. രാജ്യത്തിൻെറ വിവിധ ഭാഗങ്ങളിൽ ക്യാമ്പുകൾ സ്​ഥാപിക്കാനുള്ള വിവിധ ഘട്ടങ്ങളിലെ ഫീസുകളും അധികൃതർ പ്രഖ്യാപിച്ചു. ബീച്ചുകൾ, സീസൈഡ്​, നാച്വറൽ റിസർവുകൾ എന്നിവിടങ്ങളിൽ ക്യാമ്പുകൾ സ്​ഥാപിക്കുന്നതിന് 10,000 റിയാലാണ്​ ഫീസ്​ ഈടാക്കുക. ക്യാമ്പിങ്​ സീസണുള്ള രജിസ്​ട്രേഷനുകൾ മൂന്ന്​ ഘട്ടങ്ങളിലായാണ്​ ക്രമീകരിച്ചിരിക്കുന്നത്​.
ആദ്യഘട്ടം: ഈ ഘട്ടത്തിൽ ഒക്​ടോബർ 11നാണ്​ രജിസ്​ട്രേഷൻ നടത്തേണ്ടത്​. നടപടികൾ പൂർത്തിയാക്കുന്നവർക്ക്​ ഒക്​ ടോബർ 13 മുതലാണ്​ ക്യാമ്പിങ്​ നടത്താൻ അനുമതി നൽകുക. അൽശമാൽ, അൽഗശമിയ, സീലൈൻ, റാസ്​ മത്​ബക്​, അറദ, സിക്രീത്ത്​, അൽ നഗ്​യാൻ, അൽ കറാന, അഷർജി, ഉം അൽ മാ എന്നിവിടങ്ങളിലാണ്​ ഇവർക്ക്​ ക്യാമ്പിങ്ങിനായി അനുവദിക്കുക.രണ്ടാംഘട്ടം: ഒക്​ടോബർ 14നാണ്​ രണ്ടാംഘട്ടത്തിനുള്ള രജിസ്​ട്രേഷൻ നടത്തേണ്ടത്​. ഒക്​​േടാബർ 16 മുതൽ ഇവർക്ക്​ അൽറീം റിസർവ്​, അൽ മറൂന, അൽ മസ്​റുഅ, ഉം അൽ അഫാഇ, അൽ ഹാഷിം, അബൂദലൗഫ്​, അൽ സുബാറ, അൽ ഉദൈ​, സൗത്​ അൽ ഖറാഇജ്​, അബു സംറ എന്നിവിടങ്ങളിൽ ക്യമ്പ്​ ചെയ്യാനുള്ള അനുമതി ലഭിക്കും.

മൂന്നാം ഘട്ടം: ഒക്​ടോർ 18നാണ്​ ഈ ഘട്ടത്തിനായി രജിസ്​റ്റർ ​െചയ്യേണ്ടത്​. ഒക്​ടോബർ 20 മുതൽ ക്യാമ്പിങ്ങിന്​ അനുമതി ലഭിക്കും. റൗദത്​ റാഷിദ്​, റൗദത്​ അയ്​ഷ, അൽഖോർ, അൽവാബ്​, മുഖിത്​ന, അൽഗരിയ, അൽ മുഫൈർ, റാസ്​ അൽനൗഫ്​, അൽ അതുരിയ, അൽ സനാ, വെസ്​റ്റ്​ അൽ റയിസ്​ എന്നിവിടങ്ങിലാണ്​ ഇവർക്ക്​ അനുമതി ലഭിക്കുക. അന്തരീക്ഷ താപനില കുറഞ്ഞുതുടങ്ങിയതോടെ ശൈത്യകാല ക്യാമ്പിങ്​ സീസണായി കാത്തിരിക്കുകയാണ് സ്വദേശികളും വിദേശികളുമടക്കം എല്ലാവരും. തണുപ്പുകാലമെത്തുന്നതോടെ നിരവധി പേരാണ് കുടുംബങ്ങളുമൊത്ത് ക്യാമ്പിങ്​ സീസൺ ആസ്വദിക്കാനായി പ്രത്യേകം നിശ്ചയിക്കപ്പെടുന്ന പ്രദേശങ്ങളിലെത്തിച്ചേരുന്നത്.

നൂറ്റാണ്ടുകൾക്ക് മുമ്പുള്ള ജീവിത രീതിയെ അനുസ്​മരിക്കുന്നതിനും നഗരത്തി​െൻറ തിരക്കുകളിൽനിന്നും കോലാഹലങ്ങളിൽനിന്നും അകന്ന് പ്രകൃതിയുടെ ലാളനയേറ്റ് സമയം ചെലവഴിക്കുന്നതിനുമുള്ള സുവർണാവസരം കൂടിയാണ് ഓരോ ക്യാമ്പിങ്​ സീസണും നൽകുന്നത്.കോവിഡ് -19 അന്തരീക്ഷത്തിൽ ക്യാമ്പിങ്​ സീസണും അനുബന്ധ പ്രവർത്തനങ്ങളും റദ്ദാക്കുമെന്ന ആശങ്കയുണ്ടായിരുന്നു. എന്നാൽ, മന്ത്രാലയം ക്യാമ്പിങ്ങിനുള്ള നടപടികൾ തുടങ്ങിയതോടെ ഈ ആശങ്ക മാറിയിട്ടുണ്ട്​.

കോവിഡ് -19 കാരണം അവധിക്കാലം ചെലവഴിക്കാൻ പുറത്തു പോകാനാകാതെയും കൂടുതൽ കാലം വീടുകൾക്കുള്ളിൽ സമയം ചെലവഴിക്കുകയും ചെയ്ത സ്വദേശികളും വിദേശികളുമായിരിക്കും ഈ വർഷത്തെ ക്യാമ്പിങ്​ സീസണായി ഏറെ അക്ഷമരായി കാത്തിരിക്കുന്നത്.ക്യാമ്പർമാർ സുരക്ഷ മുൻകരുതലുകളും മറ്റു നിയന്ത്രണങ്ങളും കൂടുതൽ കർശനമായി പാലിക്കുകയാണെങ്കിൽ ഈ വർഷത്തെ ക്യാമ്പിങ് സീസണും വലിയ വിജയമാകും. കഴിഞ്ഞ വർഷം ഒക്ടോബർ 30ന് ആരംഭിച്ച് മാർച്ച് അവസാനം വരെയായിരുന്നു ക്യാമ്പിങ്​ സീസൺ.