പഴം, പച്ചക്കറി ഇറക്കുമതിക്ക്​ മുൻകൂർ അനുമതി വേണം

ദോഹ: ഡിസംബർ ഒന്നു​ മുതൽ രാജ്യത്തേക്ക്​ പഴങ്ങളും പച്ചക്കറികളും ഇറക്കുമതി ചെയ്യുന്നതിന്​ മുൻകൂർ അനുമതി ആവശ്യമാണെന്ന്​ മുനിസിപ്പാലിറ്റി മന്ത്രാലയത്തി​െൻറ നിർദേശം​. മന്ത്രാലയം വിളിച്ചു ചേർത്ത പഴങ്ങളുടെയും പച്ചക്കറികളുടെയും വിതരണക്കാരുടെ യോഗത്തിലാണ്​ ഇക്കാര്യം അറിയിച്ചത്​. ഭക്ഷ്യ സുരക്ഷാ വകുപ്പ് ഡയറക്ടര്‍ ഡോ.മസൗദ് ജാറല്ല അല്‍ മറി, കാര്‍ഷികകാര്യ വകുപ്പ് ഡയറക്ടര്‍ യൂസഫ് ഖാലിദ് അല്‍ ഖുലൈഫി, കാർഷിക വകുപ്പിലെ ഉദ്യോഗസ്​ഥർ, നിരവധി വിതരണക്കാർ തുടങ്ങിയവര്‍ യോഗത്തില്‍ പങ്കെടുത്തു. ഉൽപന്നങ്ങളുടെ ഗുണനിലാവരം ഉറപ്പുവരുത്തുന്നതിനും പച്ചക്കറികളും പഴങ്ങളും ആവശ്യമായതിലും കൂടുതൽ ഇറക്കുമതി ചെയ്യുന്നതിലൂടെ പാഴാവുന്നത്​ ഒഴിവാക്കാനും ലക്ഷ്യമിട്ടാണ്​ പുതിയ നിയന്ത്രണങ്ങളെന്ന്​ മന്ത്രാലയം അറിയിച്ചു. വിതരണക്കാര്‍ക്ക് പച്ചക്കറികളും പഴങ്ങളും ഇറക്കുമതി ചെയ്യുന്നതിനുള്ള അനുമതിക്കായി നവംബർ ഒന്നു​ മുതൽ 20 വരെ ഇമെയിൽ വഴി അപേക്ഷിക്കാം. importrequests@mme.gov.qa എന്ന വിലാസത്തിലാണ്​ അപേക്ഷകൾ സമർപ്പിക്കേണ്ടത്​. മന്ത്രാലയത്തി​െൻറ വെബ്​സൈറ്റിൽ നിന്നും എഫ്​-എ.എ.ഡി-പി.പി 02 എന്ന ​അപേക്ഷാ ഫോറം ഡൗൺലോഡ്​ചെയ്​ത്​ ഓരോ ​മാസത്തേക്കും ഇറക്കുമതി ചെയ്യുന്ന സാധനങ്ങളുടെ വിശദാംശങ്ങളും തൂക്കവുമെല്ലാം വ്യക്​തമാക്കി വേണം അപേക്ഷ സമർപ്പിക്കാൻ.

'രാജ്യത്തെ ഭക്ഷ്യസുരക്ഷ ഉറപ്പാക്കുന്നതി​െൻറ ഭാഗമായി, ഇറക്കുമതി ചെയ്യുന്ന ഭക്ഷ്യവസ്​തുക്കൾ നിരീക്ഷിക്കാൻ ഇതുവഴി കഴിയുമെന്ന്​ ഡോ. മസൂദ്​ ജാറല്ലാ അൽ മറി പറഞ്ഞു. രാജ്യത്തെ എല്ലാവിഭാഗം ഉപഭോക്​താക്കൾക്കും ഗുണനിലവാരമുള്ള ഭക്ഷ്യവസ്​തുക്കൾ ഉറപ്പാക്കാനാണ്​ മന്ത്രാലയം ഇത്തരമൊരു നടപടിക്രമം പ്രാബല്യത്തിൽ വരുത്തുന്നതെന്നും അദ്ദേഹം പറഞ്ഞു. ഭക്ഷ്യവസ്​തുക്കൾ പാഴാവുന്നത്​ ഒഴിവാക്കുകയെന്നത്​ ​ദേശീയ ഭക്ഷ്യ സുരക്ഷാ പദ്ധതിയുടെ ലക്ഷ്യം കൂടിയാണ്​. ഇറക്കുമതിചെയ്യുന്ന ഭക്ഷ്യ വസ്​തുക്കൾ, ഖത്തറിലെത്തി ഉപഭോക്​താക്കളിൽ എത്തുന്നതു​ വരെ 14 ശതമാനം ഭക്ഷ്യവസ്​തുക്കൾ പാഴാവുന്നു എന്നാണ്​ റിപ്പോർട്ട്​. ഇറക്കുമതിക്ക്​ പെർമിറ്റ്​ സംവിധാനമൊരുക്കുന്നതിലൂടെ ഈ നഷ്​ടം കുറയാമെന്നും അദ്ദേഹം പറഞ്ഞു.