കൊസോവോക്ക്​ മരുന്നും വെള്ളവുമായി ഖത്തർ ചാരിറ്റി

ദോഹ: വിഷദുരന്തത്തി​െൻറ ദുരിതം പേറുന്ന കൊസോവോയിലെ ആയിരങ്ങൾക്ക്​ ആശ്വാസവുമായി ഖത്തർ ചാരിറ്റി. കൊസോവോയിലെ ഡെചാൻ പ്രവിശ്യയിലുണ്ടായ വിഷദുരന്തത്തിൽ​ 5000ത്തോളം പേരാണ്​ ഇരകളായത്​. കുടിവെള്ളം വഴി പടർന്നുവെന്ന്​ സംശയിക്കപ്പെടുന്ന ദുരന്തത്തി​െൻറ കാരണങ്ങൾ കണ്ടെത്താൻ രാജ്യാന്തര ഏജൻസികളും സംഘങ്ങളും സജീവമായ അന്വേഷണം തുടരുന്നതിനിടെയാണ്​ മരുന്നും കുടിവെള്ളവുമായി ഖത്തർ ചാരിറ്റി രംഗത്തെത്തിയത്​. പ്രാദേശിക ഭരണകൂടവുമായി സഹകരിച്ചാണ്​ മരുന്നും ചികിത്സയും കുടിവെള്ളവുമൊരുക്കിയത്​. വിഷയത്തിൽ അടിയന്തരമായി ഇടപെട്ട ഖത്തർ ചാരിറ്റിക്ക്​ ഡെചാൻ മേയർ ബഷ്​കിം റമോസാജ്​ നന്ദി അറിയിച്ചു.

രാജ്യത്തെ സാമൂഹിക -സന്നദ്ധ മേഖലയിലെ പ്രവർത്തനങ്ങൾക്കായി കഴിഞ്ഞ ഏപ്രിലിൽ ഖത്തർ ചാരിറ്റിയും കൊസോവോ സർക്കാറും തമ്മിൽ കരാറിൽ ഒപ്പു​െവച്ചിരുന്നു. ഇതുപ്രകാരം പള്ളികൾ, കിണറുകൾ, ദരിദ്രകുടുംബങ്ങൾക്കുള്ള സാമ്പത്തിക സഹായങ്ങൾ, 866 കുടുംബങ്ങളുടെ വൈദ്യുതി എന്നിവ ലഭ്യമാക്കുന്നതു​ സംബന്ധിച്ചായിരുന്നു കരാർ. ഇതിനിടെയാണ്​ ജൂൺ പകുതിയോടെ രാജ്യത്തി​െൻറ പടിഞ്ഞാറൻ മേഖല വിഷദുരന്തത്തിന്​ ഇരയായത്​.

നിലവിൽ അനാഥ സംരക്ഷണം, വിദ്യാഭ്യാസ പ്രവർത്തനങ്ങൾ തുടങ്ങിയ മേഖലകളിൽ 5000ത്തിലേറെ പേർക്ക്​ ഖത്തർ ചാരിറ്റിയുടെ സേവനങ്ങൾ ലഭ്യമാവുന്നുണ്ട്​.