ഖത്തർ പൗരന്മാർക്ക്​ ഇനി അമേരിക്കൻ യാത്രക്ക്​ വിസ വേണ്ട; 90 ദിവസം വരെ താമസിക്കാം

ദോഹ: ഖത്തരി പൗരന്മാർക്ക് ഇനി അമേരിക്കയിലേക്ക്​​ വിസയില്ലാതെ തന്നെ യാത്ര ചെയ്യാം. വിസ രഹിത പ്രവേശനം അനുവദിക്കുന്ന രാജ്യങ്ങളുടെ പട്ടികയിൽ ഖത്തറിനെയും ഉൾപ്പെടുത്തിയതായി ​അമേരിക്കൻ ഹോംലാൻഡ്​ സെക്യൂരിറ്റി അറിയിച്ചു. ഇതാദ്യമായാണ്​ ഒരു ഗൾഫ്​ രാജ്യത്തെ വിസ രഹിത പ്രോഗ്രാമിൻെറ ഭാഗമാക്കുന്നത്​.

ഡിസംബർ ഒന്ന്​ മുതൽ പ്രാബല്ല്യത്തിൽ വരുന്ന പദ്ധതി പ്രകാരം ഖത്തരി പൗരന്മാർക്ക്​ അമേരിക്കയിലെത്തി 90 ദിവസം വരെ വിസയില്ലാതെ താമസിക്കാം. ഇരു രാജ്യങ്ങളും തമ്മിലെ ശക്​തമായ ഉഭയകക്ഷി, നയതന്ത്ര, സുരക്ഷാ സൗഹൃദത്തിൻെറ ഭാഗമായാണ്​ അപൂർവം രാജ്യങ്ങൾക്ക്​ മാത്രം ഇടം പിടിച്ച വിസ രഹിത പ്രവേശനം പട്ടികയിൽ ഖത്തറിനെയും ഉൾപ്പെടുത്തിയത്​.

അമേരിക്കൻ വിദേശകാര്യ സെക്രട്ടറി ആൻറണി ബ്ലിങ്കൻെറ നിർദേശ പ്രകാരം ഖത്തറിനെയും വിസ രഹിത ​പ്രോഗ്രാം (വി.ഡബ്ല്യൂ.പി) രാജ്യങ്ങളുടെ പട്ടികയിൽ ഉൾപ്പെടുത്തിയതായി ആഭ്യന്തര സുരക്ഷാ സെക്രട്ടറി അലയാന്ദ്രോ മയോർകാസ്​ അറിയിച്ചു.